Eksotʋs 19 - Chahta Holisso Holitopa 1886

¹ Islael im ʋlla ʋhleha hʋt Echip yakni ya̱ kohcha tok, hʋshi ont isht atuchina mihi yo̱ nitak fehna Sinai yakni haiaka ya̱ ona tok.

² Lefitim a̱ asha tuk ʋt ia tuk osh Sinai chukushmi ya̱ ona cha, yakni haiaka ya̱ binachi tok; micha yʋmmak o̱ Islael ʋt nʋnih itikba ya̱ abinachit aiasha tok.

³ Mihma Moses ʋt oiyʋt Chitokaka ya̱, im ona tok; mihma Chihowah yʋt nʋnih ha̱ Moses a̱ et ai i̱ howʋt Chekob in chuka achʋfa ya̱ yak ish im achashke, micha Islael im ʋlla ʋhleha ha̱ ish im anolashke.

⁴ Echip okla ha̱ nana ka̱ kaniohmichi li ka̱ hʋsh pisa tuk oke; micha o̱ssi sanahchi om binilichit shaiyalit a̱ bili̱ka hʋch isht ʋla li tuk a̱ hʋsh pisa tuk oke.

⁵ Yʋmohmi hoka himak a̱ ʋm anumpa ha̱ hʋsh im asitia mʋhli cha, a̱ nan itim apesa ya̱ hʋsh holitoblikmʋt, yohmikmʋt okla moma i̱ shahlit ʋmmi hʋchia ha chi̱ hoke; yakni ʋt moma kʋt ʋmmi hoka.

⁶ Mikma ʋm apehlichika na holitopa isht asha, micha okla holitopa, hʋchia ha chi̱ hoke, ish im achashke. Anumpa ilʋppa puta kak o̱ Islael im ʋlla ʋhleha ha̱ ish im anumpulashke, achi tok.

⁷ Mihma Moses ʋt ʋla cha, okla im asʋnonchi ʋhleha ha̱ hoyo cha, anumpa ilʋppa moma Chihowah yʋt im apesa tuk a̱ itikba bohli tok.

⁸ Mihma okla moma kʋt itibafokʋt afalamichit Chihowah yʋt anumpuli tuk moma kak o̱ e yʋmihcha chi̱ hoke, achi tok. Mihma Moses ʋt okla im anumpa ha̱ falamichit Chihowah ya̱ isht im ona tok.

⁹ Mihma Chihowah yʋt Moses a̱, Yakeh, hoshonti sukko ho̱ a foyukʋt chim ʋla la chi̱ hoke; yʋmohmi ho̱ chitim anumpule likma okla hʋt haklo cha, chi yʋmmi na bilia chi̱ hoke, im achi tok. Mihma Moses ʋt okla im anumpa ha̱ Chitokaka ya̱ im anoli tok.

¹⁰ Micha Chihowah yʋt Moses a̱, Iʋt okla ha̱ im ona cha, himak nitak, micha onnaha ya̱ ish hullochashke, mikma i̱ nafoka ya̱ achefa cha,

¹¹ Nitak atuchina chi̱ ka̱ im ʋlhtahashke; nitak ont atuchinakma okla moma kʋt api̱sa ho̱ Chihowah yʋt akowʋt Sinai paknaka ya̱ ʋla chi̱ hoke.

¹² Mikma ai ʋhli apakfoyupa ho̱ okla ha̱ im ikbit, Ahah hʋsh ahni cha, nʋnih ha̱ hʋchik oiyo kashke, micha aiʋhli ya̱ hʋch ik potolo kashke; kʋna kia nʋnih ha̱ potolikmʋt illi pulla hi oke.

¹³ Ibbak achʋfa kia potola he keyu; amba yohmikmʋt tʋli ishit boa he, keyukmʋt nʋhlʋt hlopulla hi oke, ʋlhpoa yokmá keyukmʋt hatak okmá nana kia okcha̱ya he keyu hoke, ishtpu̱fa ʋt ola kʋt falaiakma nʋnih ha̱ ʋla hi oke, ish achashke, im achi tok.

¹⁴ Mihma Moses ʋt nʋnih ha akowʋt okla ha̱ im ona cha, okla hash hullochi tok, mihma i̱ nafohka ya̱ achefa tok.

¹⁵ Mihma okla ha̱, Nitak atuchina chi̱ ka̱ hʋchim ʋlhtahashke, hʋchi tekchi ʋhleha ha̱ bili̱ka hʋchik ono kashke, im achi tok.

¹⁶ Atuk o̱ yakohmi tok, nitak ont atuchina onnahinli ma, hiloha, micha hʋshukmʋlli, micha hoshonti sukko aiena kʋt nʋnih ha̱ onʋtoyula ma, ishtpu̱fa falaia ola kʋt chitoli atampa tok: yohmi na okla moma binah a̱sha tuk ʋt wʋnihinchi tok.

¹⁷ Mihma Chitokaka ya̱ itafama chi̱ ka̱ Moses ʋt okla pehlichit binah ha̱ kohchi tok; mihma nʋnih akishtʋla ak o̱ hieli tok.

¹⁸ Mihma Sinai nʋnih hʋt shobulli bieka tok, Chihowah yʋt luak afoyuka akowʋt ʋla tuk oka, mihma shobulli ʋba ia kʋt tʋli abila shobulli kak a̱ chiyuhmi ma, nʋnih hash osh momʋt winakahanchi fehna tok.

¹⁹ Atuk o̱ ishtpu̱fa falaia ola kʋt falaiʋt chitoli kʋt isht i̱ shahlit ma̱ha̱ya ma, Moses ʋt anumpuli ma Chitokaka yʋt anumpa ha̱ isht im afalaminchi tok.

²⁰ Mihma Chihowah yʋt akowʋt nʋnih paknaka Sinai nʋnih paknaka ya̱ ʋla tok; micha Chihowah yʋt Moses a̱ hoyot nʋnih paknaka isht ona tok. Mihma Moses ʋt oiya tok.

²¹ Mihma Chihowah yʋt Moses a̱, Akowa cha, okla ha̱ atokolit ish i̱ mihashke, ʋbanʋblit ont ia cha, Chihowah ya̱ aiokchilefi cha, lauʋt illi yoba ná.

²² Mikma naholitopa isht asha ʋhleha hʋt Chihowah bili̱ka ona kʋt ile hullochashke, keyukma Chihowah yʋt onʋtola ná, im achi tok.

²³ Mihma Moses ʋt Chihowah ya̱, okla hʋt nʋnih Sinai ha̱ ʋla he keyu hoke; atokolit ish pi̱ miha kʋt, Nʋnih apakfoyupa ka̱ aiʋhli ya̱ hʋsh hilechi cha, hʋsh hullochashke, ish achi tuk oka, im achi tok.

²⁴ Mihma Chihowah yʋt, Mahyá, akowá, atukmʋt ish oiya chi̱ hoke, chishno, micha Alon aienʋt: amba naholitompa isht asha, micha okla aiena kʋto ʋbanʋblit Chihowah ya̱ ik im ono kashke. Chihowah yʋt onʋtola ná, im achi tok.

²⁵ Yohmi ma Moses ʋt akowʋt okla im ona cha, im anumpuli tok.