Eksotʋs 18 - Chahta Holisso Holitopa 1886

¹ Naholitompa ishtʋtta Mitian ʋtta Moses ipochi Chehlo ʋt Chitokaka yʋt Moses, micha im okla Islael aiena ka̱ nana moma i̱ kaniohmihinchi tuk, micha Chihowah yʋt Islael a̱ pehlichit Echip a̱ kohcha tuk a̱ haklo mʋt,

² Yohmi mʋt Moses ipochi Chehlo ʋt Sippolah Moses tekchi ya̱ falʋmmichit pila ha ya̱,

³ Micha ushi tuklo ka̱ eshi tok, yʋmma achʋfa hohchifo kʋt Keshom a tok, a̱ yakni keyu hosh yakni inla yo̱ ahanta li hoke, achi ha tok.

⁴ Mihma achʋfa hohchifo kʋt Eliesi atok, a̱ki in Chitokaka yʋt si apela yosh Falaoh i̱ bʋshpo falaia ya̱ i̱ sa hlakofi chi tuk oke, achi tok.

⁵ Mihmah Moses ipochi Chehlo ʋt Moses ushi ʋhleha, micha tekchi ya̱ pehlichit yakni haiaka Chihowah i̱ nʋnih ha̱ binachit aiasha tuk im ona tok.

⁶ Micha Moses a̱ Ʋno chipochi Chehlo sia hʋt, chi tekchi, micha ushi tuklo kʋt apeha ho̱ pehlichit chim ʋla lishke, im achi tok.

⁷ Mihma Moses ʋt kohchʋt iʋt ipochi yash ont afama cha, im akachunoli cha, i̱ su̱ksowa mʋt, micha im achukma̱ kʋt iti̱ ponaklo mʋt binah ha̱ chukowʋt okla tok.

⁸ Mihma Moses ʋt ipochi ya̱ Islael pulla kak o̱ Chihowah yʋt Falaoh, micha Echip okla aiena ka̱ kaniohmichi tuk, micha hina takla ya̱ na palʋmmi kʋt onʋtola tuk, moma, mikma Chihowah yʋt hlakofichi tuk aiena tuk im anoli tok.

⁹ Mihma Chihowah yʋt Islael a̱ nana achukma ho̱ yʋmihchit, yʋmmak oka Echip okla ibbak a̱ kohchit hlakoffichi tuk aiena ka̱ Chehlo ʋt nayukpa tok.

¹⁰ Micha Chehlo ʋt, Chihowah yʋmmak osh Echip okla ibbak a̱ kohchit micha Falaoh ibbak a̱ kohchit hʋchi hlakoffichi tuk ʋt holitopashke; yʋmmak osh okla hʋt Echip okla ha̱ ibbak nutakʋt aiasha tuk a̱ hlakoffichi tuk ʋt;

¹¹ Himak a̱ Chihowah ak osh naholba puta moma i̱ shahli ka̱ ithana lishke; nana ka̱ ilefehnʋchi hosh yʋmohmi tuk a̱ i̱ shahli hoka, achi tok.

¹² Mihmʋt Moses ipochi Chehlo ʋt Chihowah ya̱ hukmit im issa ya̱ eshi cha, ʋbit im issa tok; mihma Alon, micha Islael im asʋnonchi moma kʋt ʋla cha, Moses ipochi ya̱ Chihowah itikba okla ibai impa tok.

¹³ Atuk osh onnakma yakohmi tok, Moses ʋt okla ha̱ nan im apesʋt binili tok: mihma okla hʋt Moses a̱ i̱ hinli na, onnahinli tuk ʋt opia tok.

¹⁴ Atuk o̱ Moses ipochi ʋt okla ha̱ kaniohmichi moma ka̱ pisa mʋt, Nanta mak o̱ okla ish yʋmihchi cho? Nantihmi ho̱ chishno ak bieka hosh ish binili na, okla moma kʋt chi̱ hieli na, onnahinli tuk ʋt opia hoh cho? im achi tok.

¹⁵ Mihma Moses ʋt ipochi ya̱ Chitokaka ya̱ i̱ ponakla chi̱ kʋt, ʋm ʋla hoka, im achi tok,

¹⁶ Achʋfa hosh inla̱ ya̱ nan iti̱ kaniohmi cha, ʋm ʋlakma im itin takla ya̱ nan im apesa li hoke; micha Chitokaka i̱ nanʋlhpisa, micha i̱ nanʋlhpisa bilia ya̱ ithʋnanchi li hoke, im achi tok.

¹⁷ Mihma Moses ipochi ʋt, Nana ish yʋmihchi kʋt achukma keyushke.

¹⁸ Chishno, micha okla ilʋppa chi apeha aiena kʋt hoyʋblit hʋchi taha chi̱ hoke; nana ilʋppʋt chi̱ weki fehna hoka, chishno ak bano kʋt ish atahla he keyu hoke.

¹⁹ Ʋm anumpa is sa̱ haponaklashke, na chi̱ miha lashke, mikma Chitokaka yʋt chiba foyukashke; mikma chishno ʋt okla ha Chihowah isht ai anumpuli chia hashke: yʋmohmi na, nan im akaniohmi ka̱ Chitokaka ya̱ isht ish im onashke.

²⁰ Micha nana akaniohma he nanʋlhpisa, micha hina ataya he micha natoksʋli ya̱ yʋmihcha he aiena kak o̱ ish im abʋchashke.

²¹ Micha okla moma ka̱ akohchʋt hatak kʋllo, Chitokaka i̱ nukwi̱ya, hatak a̱hli, nan anushkunna ya̱ shitilema ak o̱ ish ahayuchashke; micha yohmi kak o̱, tahlepa sipokni pehlichi, tahlepa pehlichi, pokoli tahlapi pehlichi, micha pokoli pehlichi ish i̱ hiohlechashke.

²² Mikma nitak moma okla ha̱ nan im apesashke, atukma yakohmashke, nana chito moma ka̱ isht chim ʋlashke: nana iskitini moma ka̱ ilapinli hosh apesashke: yohmi ho̱ chishno ʋt ik chi̱ kʋllokma, na weki ka̱ okla chiba shaiyalashke.

²³ Ilʋppak o̱ ish yʋmihchikma, micha Chitokaka yʋt yʋmihchit chim apesakma, yohmikma ish hlopulla chi̱ hoke; mikma okla ilʋppa moma kʋt nuktaiyalʋt im aiasha ya̱ onashke.

²⁴ Yohmi ma Moses ʋt ipochi im anumpa i̱ haponaklo cha, nana achi tuk a̱ moma yʋmihchi tok.

²⁵ Mihmʋt Moses ʋt Islael moma ka̱ hatak kʋllo ha̱ atokolit okla ha̱ i̱ nushkoboka ikbi na, tahlepa sipokni pehlichi, tahlepa pehlichi, pokoli tahlapi pehlichi, micha pokoli pehlichi tok.

²⁶ Mihma nitak moma ho̱ okla nan im apesa tok; nana kʋllo kʋno Moses a̱ isht im ona cha, amba nana iskitini ka̱ilapak inli hosh apesa tok.

²⁷ Mihma Moses ʋt ipochi ya̱ ik ia ahni na, ia tok; mihma iʋt ilap i̱ yakni ya̱ ona tok.