Eksotʋs 17 - Chahta Holisso Holitopa 1886

¹ Mihma Islael im ʋlla ʋhleha okla moma kʋt yakni haiaka Sin ashʋt ia tok; micha Chihowah yʋt im apesa tuk mak o̱ a̱ya mʋt, Lefetim a̱ binachi tok; mihma okla ishka he ʋt oka ʋt iksho tok.

² Yʋmohmi ho̱ okla hʋt Moses a̱ na mihachit, oka ish pima na, il ishkashke, achi tok, mihma Moses ʋt, Nantihmi ho̱ na hʋs sa mihachi cho? Nantihmi ho̱ Chihowah ya̱ imomaka hʋsh pisa cho? im achi tok.

³ Mihma okla hʋt yʋmma oka bʋnna tok; micha okla hʋt Moses a̱ na mihachit, Katiohmi ho̱ ilʋppa yʋmohmit pehlichit Echip a̱ ish pi kohchi cha, pim ʋlla ʋhleha, micha pi̱ nanʋlhpoa aiena ka̱ oka bʋnnʋchit ʋbit ish pi tahla chi̱ cho? achi tok.

⁴ Mihma Moses ʋt Chihowah ya̱ i̱ pa̱yʋt, Okla ilʋppa katiohmi chi la chi̱ cho? tʋli ishit sa bola̱hosi hoke, achi tok.

⁵ Mihma Chihowah yʋt Moses a̱, Islael im asʋnonchi ʋhleha ha̱ pehlichi cha, okla ha̱ itikba ish iashke, micha chin tʋbi okhina ya̱ isht ish isso tok ʋt ish eshi cha, ish iashke.

⁶ Yakeh, yʋmma chitikba Holeb a̱ tʋli chito paknaka hikia la chi̱ hoke, mihma tʋli ya̱ ish issa chi̱ hoke, mikma oka yʋt tʋli ya̱ a kohcha na, okla hʋt oka ishka chi̱ hoke, im achi tok. Mihma Islael im asʋnonchi ʋhleha hʋt pi̱sa ho̱ Moses ʋt yʋmihchi tok.

⁷ Mihma Islael im ʋlla ʋhleha hʋt na mihachi tuk ak o̱; micha Chihowah ya̱ imomaka pisʋt, Chihowah yʋt piba foka hokmá, keyukmá, nanta cho? achi tuk oka, yʋmma hohchifo ha̱ Massah micha Melibah achi tok.

⁸ Mihma Amalek ʋt ʋla cha, Islael Lefitim a̱ ai itibi tok.

⁹ Mihma Moses ʋt Choshua ya, Hatak a̱ ish atokoli cha, kohchʋt iʋt Amalek a̱ ish itibashke; onnakma Chihowah in tʋbi ya̱ ieshi lish nʋnih paknaka ya̱ hikia la chi̱ hoke, im achi tok.

¹⁰ Yohmi ho̱ Moses ʋt im achi tuk mak o̱ Choshua ʋt yʋmihchi cha, Amalek a̱ itibi tok, Mihma Moses, Alon micha Hu aiena kʋt iʋt nʋnih paknaka ya̱ ona tok.

¹¹ Atuk o̱ yakohmi tok, Moses ʋt ibbak a̱ ʋba wielikma, Islael im aiya tok; atuk osh ibbak a̱ akʋchikma, Amalek ʋt im aiya tok.

¹² Yohmi kia Moses ibbak ʋt weki tok; mihma tʋli eshi cha, nutaka i̱ bohli na, om binili tok, micha Alon micha Hu ʋt achʋfʋt ibbak achʋfa ka̱ ʋba wielichit im ieshi ma, achʋfa kʋt achʋfa ya̱ im eshi tok: mihma ibbak ʋt talaia achʋfa na, hʋshi ʋt pit okatula tok.

¹³ Mihma Choshua ʋt Amalek, micha im okla aiena ka̱ bʋshpo falaia halupa yo̱ ishtimaiya tok.

¹⁴ Mihma Chihowah yʋt Moses a̱, Ilʋppa ithana bilia chi̱ ho̱ holisso ho̱ aholissochit ish takalichashke; micha Choshua ya̱ ish haklochashke, Amalek a̱ ithana ya̱ shutik nutaka ya̱ amosholichit kanchi la chi̱ hoke, im achi tok.

¹⁵ Mihma Moses ʋt alta ikbi cha, hohchifo ha̱ Chihowah nissi, achi tok.

¹⁶ Chihowah yʋt Amalek itim ai itishali itiakaiyʋt ma̱ha̱ya ka̱ itin tanampa chi̱ hosh, Chihowah yʋt anumpa kʋllo, il onochit anumpuli hoke, achi ha tok.