Eksotʋs 16 - Chahta Holisso Holitopa 1886

¹ Atuk osh Elim a̱ ashtia tok: mihma Islael okla moma kʋt Sin yakni haiaka, yʋmmʋt Elim micha Saina itin takla talaia ka̱, Echip yakni ya̱ kohcha tok ʋt hʋshi atukla, micha nitak ont isht auahtahlapi fehna ona tok.

² Mihma Islael im ʋlla ʋhleha okla moma kʋt yakni haiaka ya̱ Moses, micha Alon a̱ i̱ sanalit nanumachi tok.

³ Micha Islael im ʋlla ʋhleha hʋt, Chitokaka yʋt ahni na, Echip yakni ya̱ Chihowah ibbak ishit pilli tuk bano, nipi shuti yo̱ il a chieya, micha pʋska ʋpʋt pi kaiya ma, yakni haiaka ilʋppa pisht hʋshla, okla ilʋppa moma ho̱ hohchʋfo isht ʋbit hʋsh tahla chi̱ hoka, im achi tok.

⁴ Yohmi ma Chihowah yʋt Moses a̱, Yakeh, ʋba ya̱ pʋska et hʋchi̱ umbʋche la chi̱ hoke; mikma okla hʋt kohchʋt nitak moma ʋlhpisa kaniohmi ho̱ aiowa bieka; yʋmohmi a̱ nanʋlhpisa ha̱ anowa hinlakmá, keyukmá, nanakmá imomaka pisa la chi̱ hoke.

⁵ Atuk osh yakohma hi oke, nitak ont isht hannalikma isht ʋla tuk ʋt atahla hi oke: mikma nitak moma ka̱ aiowa beka tuk a̱ inlohmi tukla hi oke, achi tok.

⁶ Mihma Moses micha Alon ʋt Islael im ʋlla ʋhleha moma ka̱, Opiakma Chihowah ak osh Echip yakni ya̱ pehlichit a hʋchi kohchi tuk a̱ hʋsh ithaiyana chi̱ hoke.

⁷ Atuk osh onnahinlikma Chihowah a holitopa ya̱ hʋsh pisa chi̱ hoke, Chihowah i̱ sanalit hʋsh nanumachi ka̱ haklo hoka; mikma pishno ʋt nanta pia hatuk o̱ nan ish pi nanumanchi cho? achi tok.

⁸ Micha Moses ʋt Ilʋppak achi̱ hoke, Chihowah yʋt opiakma nipi ʋpa chi̱ ho̱ hʋchima, atuk osh onnahinlikma pʋska hʋchimʋt hʋchi kaiyachikma, Chihowah yʋt nanumachi ishti̱sanalit hʋsh nanumachi ka̱ haklo hoka, pishno ʋto nanta pia hoh cho? hʋsh nanumachi kʋt pishno ak o̱ keyu; amba Chihowah ak oke, im achi tok,

⁹ Mihma Moses ʋt Alon a̱ im anumpulit, Islael im ʋlla ʋhleha okla moma ka̱, Chihowah itikba hʋsh lashke, hʋsh nanumanchi ka̱ haklo hoka, ish im achashke, im achi tok.

¹⁰ Atuk o̱ yakohmi tok, Alon ʋt Islael im ʋlla ʋhleha okla moma ka̱ im anumpuli ma, haiaka pilla okla pit hopo̱koyo ma, yakeh Chihowah isht a holitopa ʋt hoshonti ha̱ fo̱kʋt haiaka tok.

¹¹ Mihma Chihowah yʋt Moses a̱ im anumpulit,

¹² Islael im ʋlla ʋhleha nanuma̱hanchi ka̱ haklo lishke, im anumpulit, opiakma nipi hʋsh pa chi̱ hoke; mikmʋt onnahinlikma pʋska hʋchi kaiya chi̱ hoke; micha ʋno hʋchin Chitokaka Chihowah sia ka̱ hʋsh ithaiyana chi̱ hoke, ish achashke, achi tok.

¹³ Atuk o̱ yakohmi tok, opia ma, kofi ʋt ʋla cha, abinanchi ka̱ ompohomo tok; atuk o̱ onnahinli ma fichak ʋt binah ha̱ apakfopʋt aiasha tok.

¹⁴ Atuk osh fichak itoyula kash osh ʋba ia ma, Yakeh yakni paknaka nana lumbo chipintasi, okti hʋta chipintasi kʋt chohmi hosh aka yo̱ a̱sha tok.

¹⁵ Atuk o̱ Islael im ʋlla ʋhleha hʋt pisa mʋt, ilap bi̱ka, Ilʋppʋt manna yoke, Ilʋppʋt nanta hoh cho? itim achit, nan ik ithano hatuk okʋt; mihma Moses ʋt, Pʋska ilʋppak o̱ hʋsh pa chi̱ ho̱ Chihowah yʋt hʋchima tuk oke.

¹⁶ Nana ilʋppak o̱ Chihowah yʋt apesa tuk oke, Hatak moma kʋt ʋpa he ʋlhpesa kak osh aiowashke, hatak achʋfa ka̱ oma isht ʋlhpisa iskitini achʋfat ishtia, hatak holhtina chi̱ kaniohmi tuk a̱ ʋlhpisashke hatak moma kʋt binah aiasha ka̱ im eshashke, im achi tok.

¹⁷ Mihma Islael im ʋlla ʋhleha hʋt yʋmihchi tok, micha kanimi kʋt i̱ shahli, kanimi kʋt ik lauwo ho̱ aiowa tok.

¹⁸ Atuk o̱ oma isht apesa ma, laua aiowa tuk ʋt im atampa kʋt iksho ma, kanomosi aiowa tuk ʋt ik im ono kʋt iksho tok, hatak moma kʋt ʋpa he ʋlhpesa kak osh aiowa tok.

¹⁹ Mihma Moses ʋt A̱sha na kʋna kia onnahinli ik im onno kashke, im achi tuk oke.

²⁰ Yohmi kia Moses a̱ ik i̱ haponaklo tok; amba kanimi kʋt ashanchi na onnahinli onna tok; atuk o̱ shu̱shi tobachi cha shua tok, mihma Moses ʋt i̱ nukhobela tok.

²¹ Atuk o̱ onnahinlikma hatak moma kʋt ʋpa he ʋlhpesa kak osh aiowa beka tok; atuk o̱ hʋshi ʋt lʋshpʋt taha ma bila beka tok.

²² Atuk osh yakohmi tok, nitak ont isht hannali ma inlohmi tuklo pʋska hatak achʋfakmʋt oma tuklot ia ho̱ aiowa tok, mihma okla moma ka̱ pehlichi moma kʋt ʋlʋt, Moses a̱ im anoli tok.

²³ Mihma Ilʋppak o̱ Chihowah yʋt achi tuk oke, Onnaha yʋt a foha Chihowah i̱ nitak holitopa yoke; micha hʋsh pʋska chi̱ kʋt himak nitak ak o̱ hʋsh pʋskashke; micha hʋsh hona chi̱ kʋt hʋsh honashke; micha hʋchim atampa kʋt hʋchin talaia na onnashke.

²⁴ Mihma Moses ʋt im apesa tuk mak o̱ ashanchi na onna tok, mihma shua kʋt iksho ma, shu̱shi nana kia iksho tok.

²⁵ Mihma Moses ʋt, Himak nitak a̱ yʋmmak o̱ hʋshpashke, himak nitak ʋt Chihowah i̱ nitak hullo hoke, himak nitak a̱ haiaka ya̱ a̱sha na ish ahayucha he keyu kʋt.

²⁶ Nitak hannali ho̱ hʋsh aiowa chi̱ hoke; amba nitak untuklo hokʋto nitak holitopa hoke, yʋmmak okʋno hʋsh ahayucha he keyu hoke, achi tok.

²⁷ Atuk o̱ yakohmi tok, nitak ishtuntuklo ka̱ okla hash kanima kʋt aiowa chi hosh kohchʋt ia tuk osh ik ahayucho tok.

²⁸ Mihma Chihowah yʋt Moses a̱, Katiohmi foka ho̱ ʋm anumpa ʋlhpisa, micha a̱ nan ʋlhpisa ka̱ im antia ik hʋchi bʋnno ka chi̱ cho?

²⁹ Yakeh, Chihowah yʋt nitak hullo ya̱ hʋchima tuk oke; yohmi hatuk osh nitak isht hannali ka̱ nitak tuklo pʋska ya̱ hʋchima tuk oke; hatak hʋsh moma kʋt hʋsh ai asha aiyukali hʋsh aiashashke; hatak achʋfa kia nitak ishtuntuklo ka̱ aiasha tuk ʋt kohchʋt ik aiyo kashke, im achi tok.

³⁰ Yohmi ho̱ okla hʋt nitak isht untuklo ka̱ foha tok.

³¹ Mihmʋt Islael in chuka achʋfa yʋt hohchifo ha̱ Manna, achi tok, micha tohbi kʋt kolianta nihi chohmi tok; micha ʋpʋt pisa ka̱ pʋska lumbo foebila ishit toba chohmi tok.

³² Mihma Moses ʋt, Nana ka ilʋppak o̱ Chihowah yʋt apesa tok oke, Hʋchim ai itishali hʋt in talaia chi̱ ho̱, oma achʋfa ho̱ alotolit hʋsh talalashke; yʋmohmi tuk o̱ Echip yakni ya̱ apehlichit hʋchi kohchi li mʋt, yakni haiaka ya̱ pʋska ishit hʋchipeta li tok a̱ pisashke, achi tok.

³³ Micha Moses ʋt Alon a̱, Shuti eshi cha, manna ya̱ oma alota achʋfa ho̱ ish alotolashke, micha hʋchim ai itishali ʋt in talaia chi̱ ho̱ Chihowah itikba ya̱ ish talalashke, im achi tok.

³⁴ Chihowah yʋt Moses a̱ im apesa tuk mak o̱, talaia chi̱ ho̱ Alon ʋt itombi holitopa itikba talali tok.

³⁵ Mihma Islael im ʋlla ʋhleha hʋt manna ʋpʋt itanowa na, afʋmmi pokoli ushta hosh, okla aiasha yakni yo̱ ʋla tok: manna ʋpʋt itanowʋt Kenan yakni aiʋhli ya̱ ona tok.

³⁶ Yohmi ka̱ oma ʋt efa kʋshkoa ishit pokoli hoke.