Eksotʋs 15 - Chahta Holisso Holitopa 1886

¹ Mihma Moses micha Islael im ʋlla ʋhleha aiena kʋt taloa ilʋppa Chihowah ya̱ in taloa cha, anumpulit, Chihowah ya̱ in taloa la chi̱ hoke, im aiyʋt holitopa hoka, issuba micha im om binili kash okhʋta ha̱ oka kʋniʋchi hoke.

² Chihowah ak osh ʋmi̱ hlampko, micha ʋm ilhtalowak oke, micha aiokcha̱ya li tobʋshke; yʋmmak osh an Chitokaka yoke; atuk o̱ ai ahanta im atahli la chi̱ hoke: a̱ki in Chitokaka yoke, atuk o̱ holitoblichi la chi̱ hoke.

³ Chihowah yʋt hatak tʋnʋp oke, hohchifo kʋt Chihowah yoke.

⁴ Falaoh im itichanʋlli, micha in tʋshka chipota aiena ka̱ okhʋta pit kanchi tuk oke, in kʋpetʋni aiowa ʋhleha hash okhʋta humma ya̱ oka tʋmoli tuk oke.

⁵ Hofobi ʋt ompohomo tuk oke, tʋli chohmit oklobushlit aka ona tuk oke.

⁶ Chihowah ma, chim ishtimpakimma yʋt nan isht im aia̱hli ya̱ isht holitopʋshke, Chihowah ma chim ishtimpakimma yak osh tʋnʋp a̱ bushullichit kanchishke.

⁷ Micha chim aholitopa chinto kak osh chi̱ sanalit hikia tuk a̱ ish im aiyashke, chim ai i̱ nukkilli ya̱ ish kanchi na, onush ʋpi chohmichit hukmit tahli tuk oke.

⁸ Chibishakni fiopa ma oka yʋt isht itʋnaha tuk oke: oka chito ʋt itʋnaha chohmi̱t wakayʋt hikia tuk oke, okhʋta iklʋnna ahofobi yʋt kalampi tuk oke.

⁹ Tʋnʋp ʋt, Hlioli lashke, sakki lashke, nawehpoa ya̱ itakʋshkoa lashke, sabʋnna tuk ʋt sa fihopashke, am bʋshpo falaia ya̱ halʋllit shu̱fi lashke, sʋbbʋk ʋt ishit kanchashke, achi tuk oke.

¹⁰ Chi̱ mahli ha̱ ish om mahlichi na, okhʋta hʋt ompohomo tuk, naki chohmi kʋt oka chito ya̱ a kʋnnia tuk oke.

¹¹ Chihowah ma, naholbʋt toba puta im ai itin takla ya̱, kʋta hak osh chishno chiyuhmi cho? nan ashʋchi ik im iksho holitopa, holitopʋt annoho̱wa kʋt chinto, nafehna yʋmihchi chia hoke: kʋta hak osh chishno chiyuhmi cho?

¹² Chibbak isht impakimma ya̱ ish wieli ma, yakni ʋt ishit nanʋbli tuk oke.

¹³ Chishno ʋt ish i̱ nukha̱klo kak osh okla ha̱ falʋmminchit ish chumpa tuk ʋt pehlichit ish kohcha tuk oke: chimi̱ hlampko ak o̱ ishit pehlichit ish aiahanta holitopa ya̱ isht ish ona tuk oke.

¹⁴ Okla hʋt haklo cha, nukshopa hi oke; Palestina aiasha okla ha̱ nukha̱klo yosh chu̱kʋsh a̱ isha hi oke.

¹⁵ Yohmi ma Etom holitopa ʋhleha hʋt nukhlakancha hi oke; Moab hatak kʋllo ʋhleha ha̱ wʋnihinchi yosh onʋtola hi oke, Kenan aiasha okla hʋt momʋt bilʋt tʋmoa hi oke.

¹⁶ Nukshopa, micha komota hosh onʋtola hi oke; chi shakba kʋllo kak o̱ lumʋt tʋli chohmi na, chim okla hʋt ont ia hi oke, Chihowah ma, okla ish chumpa tuk ʋt ont ia hoke.

¹⁷ Micha chi̱ yakni, nʋnih ha̱ ish ai ʋtta he yosh ish ikbi tok ʋt, ishtonʋt ish a hilecha hi oke. Chihowah ma; ʋlhtipo holitopa yʋmmak oka chibbak osh kʋllochit hilechi tok ʋt, Chihowah ma.

¹⁸ Chihowah yʋt mi̱ko na biliʋt bilia chi̱ hoke, ahanchi tok.

¹⁹ Falaoh im issuba hʋt tʋnʋp im itichanʋlli, micha issuba ombinili aiena kʋt okhʋta ha̱ pit chukowa tuk; mihma Chihowah yʋt okhʋta oka ya̱ falʋmminchit, anonti ishtʋlʋt onochi tuk; amba Islael im ʋlla ʋhleha hʋto, yakni shila yo̱ okhʋta iklʋnna a̱ya tok.

²⁰ Mihma hopaii ohoyo Alon in tek Miliam ʋt timbil i̱shi tok; mihma ohoyo moma kʋt iakaiyʋt timbil ieshi cha, hihi̱hla hosh kohchʋt ia tok.

²¹ Mihma Miliam ʋt im afalʋmminchi mʋt, Chihowah ya̱ hʋsh in taloashke, holitopa hosh im aiya hoka; issuba, micha im ombinili kash aieninchit okhʋta ha̱ pit kanchishke, achi tok.

²² Yohmi ho̱ Moses ʋt Islael a̱ pehlichit okhʋta humma ya̱ ashʋt kohchi tok; mihma okla kohchʋt iʋt, Shu yakni haiaka ya̱ nitak tuchina anowa ona mʋt, oka ik ahayucho tok.

²³ Atuk osh Malah ya̱ ona mʋt Malah oka ya̱ ai ishka he keyu tok; homi hatuk oka; yʋmohmi hatuk o̱ hohchifo ka̱ Malah achi tok.

²⁴ Mihma okla hʋt Moses a̱ nanumachit, Nanta ho̱ il ishka chi̱ cho? achi tok.

²⁵ Mihma Chihowah ya̱ i̱ pa̱ya tok; mihma Chihowah yʋt iti yo̱ pisachi na, yʋmmak ash oka pit okʋchi ma, oka yʋt champulli toba tok; yʋmmak o̱ nanʋlhpisa bilia, micha nan isht apesa yo̱ im ikbi tok, micha yʋmmak o̱ aiimoma ka̱ pisa tok.

²⁶ Micha Hʋchin Chitokaka Chihowah im anumpa ha̱ achunanchit hʋsh i̱ haponaklo cha, itikba ya̱ ai ʋlhpiesa kak o̱ yʋmihinchit, im anumpa ʋlhpisa ha̱ hʋsh i̱ haponaklot, i̱ nanʋlhpisa puta ka̱ hʋsh holitoblikma ililli ilʋppa puta ka̱ Echip okla ha̱ onochi li tok ʋt hʋchi onochi la he keyu hoke; Chihowah sia hosh hʋchi hlakofichi li hoka, achi tok.

²⁷ Atuk osh Elim, yʋmma kʋli hofobi auahtuklo, micha pam iti pokoli untuklo hosh hiohma̱ya tok, mihmʋt yʋmmak o̱ oka bili̱ka binachi tok.