Eksotʋs 14 - Chahta Holisso Holitopa 1886

¹ Mihma Chihowah yʋt Moses a̱ im anumpulit,

² Islael im ʋlla ʋhleha ha̱ ish im anumpoli na, fullotʋt Pihahilolh itikba Miktol micha okhʋta iti takla, Baal‐Sifon i chapaka ya̱k o̱ binachashke.

³ Falaoh ʋt Islael im ʋlla ʋhleha ha̱, Yakni ya̱ ai ia ikithano hoke, yakni haiaka yʋt im okshitʋshke, acha hi oke.

⁴ Mihma Falaoh ya̱ chu̱kʋsh a̱ kʋllochi likma, iakaiya chi̱ hoke, mikma Falaoh, micha in tʋshka moma ka̱ ishit sa holitopa chi̱ hoke. Yʋmohmi ho̱ Echip moma kʋt Chihowah sia ka̱ ithana chi̱ hoke, achi tok. Mihma yʋmohmi tok.

⁵ Atuk o̱ Echip i̱ mi̱ko ya̱, Okla hʋt tihlaia ka̱ im anoli tok: mihma Falaoh chu̱kʋsh, micha in tʋshka ʋhleha chu̱kʋsh aiena kʋt okla hash i̱ sanalit, shanaia cha, Nantihmi ho̱ ilʋppa e yʋmihchit, Islael ʋhleha hʋt pin toksʋla he tuk a̱ ik ia il im ahni tuk oh cho? achi tok.

⁶ Mihmʋt tʋnʋp im itichanʋlli ha̱ atahli mʋt, im okla aiena ka̱ ishtia tok.

⁷ Micha aiowa hosh itichanʋlli tahlepa hannali, micha Echip itichanʋlli moma, micha i̱ kʋpitʋni moma ka̱ ishi tok.

⁸ Mihma Chihowah yʋt Echip i̱ mi̱ko Falaoh ya̱ chu̱kʋsh a̱ kʋllochi na, Islael im ʋlla ʋhleha ha̱ iakaiyʋt hliohli tok; mihma Islael im ʋlla ʋhleha hʋt ibbak kʋllo hosh kohchʋt ia tok.

⁹ Yʋmohmi tuk kia Echip okla hʋt iakaiya tok, (Falaoh ya̱ im issuba, micha tʋnʋp im itichanʋlli moma, im issuba om binit, micha in tʋshka chipota aiena hosh) atuk osh okhʋta lapali ka̱ Pihahilolh ichapaka Baal‐Sefon itikba ak o̱ binachit aiasha na, ont sakki tok.

¹⁰ Atuk osh Falaoh ʋt bili̱ka mi̱hinti ma, Islael im ʋlla ʋhleha hʋt akachakali ma, yakeh, Echip okla hʋt iakaiyʋt minti tok, mihma nukshopa fehna tok, mihmʋt Islael im ʋlla ʋhleha hʋt chitolit Chihowah ya̱ im pa̱ya tok.

¹¹ Mihmʋt Moses a̱ Echip a̱ ahollohpi iksho kak o̱ yakni haiaka a pilla chi̱ ka̱ ilʋppa pisht ish la tuk oh cho? Nantihmi ho̱ ish pi yʋmihchit, Echip yakni ya̱ ish pi kohchi tuk oh cho?

¹² Echip a̱ anumpa ilʋppak o̱ e chim anolit, Ik ashá, ish pim ahni na, Echip okla ilin toksʋlashke, e chim achi tok keyu cho? Echip okla ha̱ il im antia kak osh achukma kʋt haiaka ai illit pi taha chi̱ ka̱ i̱ shali hokah, im achi tok.

¹³ Mihma Moses ʋt okla ha̱, Hʋchi nukshopa ná, lumʋt hieli cha, Chihowah im ai okcha̱ya himak nitak a̱ hʋchi pisacha chi̱ ka̱ hʋsh pisashke: Echip okla ha̱ himak nitak a̱ hʋsh pisa tuk ʋt, himakma anonti hʋchik peso ho̱ bilia chi̱ hoke.

¹⁴ Chihowah yʋt hʋchim itiba chi̱ hoke; mihma luhmʋt hʋsh hiela chi̱ hoke, im achi tok.

¹⁵ Mihma Chihowah yʋt Moses a̱, Nantihmi ho̱ is sa̱ pa̱ya cho? Islael im ʋlla ʋhleha ha̱ ish im anumpuli na, tikba iashke.

¹⁶ Yohmi kia chin tʋbi ya̱ ʋba ish wieli cha, chibbak a̱ okhʋta paknaka ya̱ ish wieli cha, ish iti̱ filʋmmichashke, mikma Islael im ʋlla ʋhleha hʋt yakni shila yo̱ okhʋta iklʋnna hlopulla chi̱ hoke.

¹⁷ Mikma Ʋno, yakeh, ʋno ʋt Echip okla chu̱kʋsh a̱ kʋllochi likma, iakaiya chi̱ hoke, mikma Falaoh, micha in tʋshka moma, micha tʋnʋp im itichanʋlli, micha im issuba ombinili puta ka̱ holitopa isht ishe la chi̱ hoke.

¹⁸ Mihma Echip okla hʋt, Falaoh tʋnʋp im itichanʋlli, micha im issuba ombinili puta ka̱ holitopa isht ishe likma, ʋno ak osh Chihowah sia ka̱ ithana hi oke, im achi tok.

¹⁹ Mihma Chitokaka im enchil ʋt Islael i̱ bina ha̱ tikba a̱ya tuk ʋt kanʋllit a̱sha ka̱ ona tok, mihma toni̱k hoshonti hʋt tikba ia tuk ʋt a̱sha ka̱ ont hikia tok.

²⁰ Mihma Echip okla i̱ bina, micha Islael i̱ bina iti takla ona tok; mihmʋt yʋmmʋno i̱ hoshonti okhlili mʋt, amba ilʋppʋno ninak o̱ in tohwikeli tok; yohmi ho̱ achʋfʋt ont i̱ bilinchi keyu ho̱ ninak ʋt ont hlopulli tok.

²¹ Mihma Moses ʋt ibbak a̱ okhʋta paknaka pit wieli tok; mihma Chihowah yʋt hʋshi akochaka mahli kʋllo ho̱ ishtʋlʋt ninak yʋmmak o̱ hlopullichi cha, oka ya̱ falʋmmichi mʋt, okhʋta ha̱ yakni shila ikbi tok, mihma oka yʋt iti̱ filʋmmi tok.

²² Mihma Islael im ʋlla ʋhleha hʋt yakni shila yo̱ okhʋta iklʋnna ona tok; mihma oka yʋt holihta tobʋt isht impakimma, micha ʋlhfʋbekimma hikia tok.

²³ Mihma Echip okla hʋt iakaiyʋt ma̱ha̱ya mʋt, Falaoh im issuba moma tʋnʋp im itichanʋlli, micha im issuba ombinili puta aiena kʋt okhʋta iklʋnna ona tok.

²⁴ Atuk o̱ yakohmi tok, onnahinli atoni ya̱, Chihowah yʋt toni̱k luak, micha hoshonti ha̱ hlopullichit pisa cha, Echip okla tʋshka chipota ya̱ komuntʋchi tok.

²⁵ Micha tʋnʋp im itichanʋlli chʋnaha ya̱ shu̱fi na, shalʋllit weki tok; yohmi ma Echip okla hʋt Islael ʋhleha i̱ filʋmmit eho tihlaiyashke, Chihowah yʋt Echip okla ha̱ i̱ sanalit im itibi hoka, achi tok.

²⁶ Mihma Chihowah yʋt Moses a̱, Chibbak a̱ okhʋta paknaka ish o̱ welashke; yohmi na oka yʋt anonti ʋla cha, Echip okla ha̱, micha tʋnʋp im itichanʋlli, micha im issuba ombinili puta ompohomashke, im achi tok.

²⁷ Mihma Moses ʋt ibbak a̱ okhʋta paknaka o̱ weli tok: atuk o̱ onnahinli ma, okhʋta hʋt kʋllo hosh falamʋt tikba yatuk a̱ chohmi tok: mihma Echip okla hʋt yihlepʋt ai isso tok: mihma Chihowah yʋt Echip okla okhʋta iklʋnna ho̱ oka tʋmoli tok.

²⁸ Mihma oka ʋt falama cha, tʋnʋp itichanʋlli, micha issuba ombinili puta, micha Falaoh in tʋshka ʋhleha moma Islael a̱ iakaiyʋt okhʋta ha̱ et chukowa tok, moma ka̱ ompohomo tok: achʋfa illa kia ik hlakoffo tok.

²⁹ Amba Islael im ʋlla ʋhleha hokʋto okhʋta iklʋnna yʋt yakni shila yo̱ a nowa tok: mihma oka yʋt holihta yosh im ishtimpakimma, micha im ʋlhfʋbekimma yo̱ i̱ hikia tok.

³⁰ Yakohmi hosh nitak yʋmma Chihowah yʋt Islael a̱ Echip okla ibbak a̱ kohchit okchalinchi tok: atuk o̱ Echip okla illi ʋt okhʋta ʋhli aiasha na, Islael ʋt pisa tok.

³¹ Micha Islael ʋt Chihowah yʋt nachinto fehna ho̱ yʋmihchit Echip okla ha̱ onochi ka̱ pisa tok; mihmʋt okla hʋt Chihowah ya̱ i̱ nukshopa cha, Chihowah, micha Moses aiena ka̱ i̱ yimmi tok.