Eksotʋs 13 - Chahta Holisso Holitopa 1886

¹ Mihma Chihowah yʋt Moses a̱ im anumpulit,

² Islael im ʋlla ʋhleha nana hosh hatak okmá, nanʋlhpoa yokmá, nana im oshʋtto ya̱ tiwi ka̱ is sa̱ hullochashke, ʋmmi hoke, achi tok.

³ Mihma Moses ʋt okla ha̱, Himak nitak ak o̱, Echip, micha aboha ayuka hʋsh kucha tok ʋt hʋsh ithaiyanashke; ibbak hlompko hosh Chihowah yʋt ilʋppa a hʋchi kuchi tuk oke, pʋska shatʋmmi ya̱ ʋpa he keyu hoke.

⁴ Himak nitak hʋshi Abib ak o̱ hʋsh kuchʋshke, im achi tok.

⁵ Atukma yakohma hi oke, Kenanait, micha Hittait, micha Amolait, micha Hifait, micha Chebusait i̱ yakni, pishukchi, micha foe‐bila a yanahanli yakni a̱ hʋchima chi̱ hosh, hʋchi̱ki ʋhleha ha̱ anumpa kʋllo il im onohonchi tok a̱, Chihowah yʋt hʋch ishtonakma, nan isht asha ilʋppa hʋshi ilʋppak o̱ isht hʋsh aiasha hi oke.

⁶ Nitak untuklo ho̱ pʋska ik shatʋmmo hʋsh pa hi oke; atukma nitak untuklo kʋt Chihowah impʋchi ya hi oke.

⁷ Pʋska ik shatʋmmo nitak untuklo ho̱ ʋpa hi oka, mikma pʋska shatʋmmi yʋt hʋchin toyula na, pisa he keyu hoke, micha hʋsh abinat moma ka̱ shatʋmmi ʋt hʋchin toyula na, pisa he keyu hoke.

⁸ Atukma nitak yʋmma chiso ha̱ im anolit, Ilʋppa yakohmi kʋt Echip a̱ kohcha li ma, Chihowah yʋt nana sa kaniohmichi tok ak oke, ish achashke.

⁹ Mikma nan ishtatokowa yosh chibbak a̱ lapala chi̱, micha ishit hʋsh ithana bilia yosh hʋchi nishkin ititakla ya̱ takala chi̱ hoke; yʋmohmi ho̱ Chihowah i̱ nanʋlhpisa hʋt hʋch itih ha̱ foyuka chi̱ hoke; Chihowah yʋt ibbak hlampko hosh pehlichit Echip a̱ hʋchi kuchi tuk oke.

¹⁰ Yʋmohmi hoka nanʋlhpisa ilʋppa ont aiʋlhpesakma, afʋmmi hosh afʋmmikma isht hʋsh aiasha hi oke.

¹¹ Atukma yakohma hi oke, Chihowah yʋt, chishno, micha chi̱ki ʋhleha ha̱ anumpa kʋllo ya̱ im il onochi tok mak osh, Kenanait i̱ yakni chishtona cha, chimakma,

¹² Ʋttahpi puta im oshʋtto tiwi moma ka̱ Chihowah ish i̱ hullocha hi oke, mikma nanʋlhpoa chim asha puta ka̱ ʋttahpi moma nakni puta kʋt Chihowah immi ha hi oke.

¹³ Issuba nashoba ʋttahpi puta ka̱ chukfushi yo̱ falʋmminchit isht ish chumpa hi oke, micha falʋmminchit ish chumpa he keyukmʋt, ikunla ya̱ ish kotʋffa hi oke: micha chim ʋlla itin takla ya̱ hatak osh ʋttahpi moma ka̱ falʋmmichit ish chumpa hi oke.

¹⁴ Atukma yakohma hi oke, Nitak himak minti ka̱ chiso hʋt chim ponaklot, Ilʋppʋt nanta hoh cho? achikma, Chihowah yʋt ibbak hlampko hosh pehlichit Echip yakni, micha aboha ayuka ha̱ pi kohchi tok oke.

¹⁵ Micha yakohmi tok. Falaoh ʋt ik ia, kʋllo hosh pi ahna he keyu ma, Chihowah yʋt Echip yakni ʋttahpi moma ka̱, hatak ʋttahpi, micha nanʋlhpoa ʋttahpi aiena ka̱ issot kanchi tok; yʋmohmi tok ak o̱ nakni yosh im oshʋtto tiwi moma ka̱ ʋbit Chihowah isht aiokpʋcheli hoke; amba ʋm ʋlla ʋttahpi moma ka̱ falʋmminchit chumpa li hoke, ish im achashke.

¹⁶ Atuk o̱ nanisht atokowa yosh chibbak a̱ lapala he, micha itikba takali yosh chi nishkin iti takla ya̱ takala hi oke; ibbak hlampko hosh Chihowah yʋt pehlichit Echip a̱ pi kohchi tok oke.

¹⁷ Atuk o̱ yakohmi tok, Falaoh ʋt okla ha̱ ik ia im ahni ma, Chitokaka yʋt pehlichit hina Filistin i̱ yakni hlopullichit isht ik aiyo tok; yʋmmak osh ik hopako ak inli kia; okla hʋt tʋnʋp a̱ pisakmʋt nukha̱klo cha, falamʋt Echip a̱ ona yoba ná, Chitokaka yʋt achi hatuk okʋt.

¹⁸ Amba Chitokaka yʋt okla fulloli̱hinchit okhʋta humma yakni haiaka ak o̱ hlopullichit isht a̱ya tok; mihma Islael im ʋlla ʋhleha hʋt nahalupa im ʋlhtaha hosh Echip yakni a̱ kohchʋt ia tok.

¹⁹ Mihma Moses ʋt Chosef foni ya̱ i̱sht ia tok; Islael im ʋlla ʋhleha ha̱ atokolit anumpa kʋllo im il onochechit, Chitokaka yʋt hʋchim a̱ya pulla hi oke; mikma sa foni ya̱ ilʋppa ai ishit hʋsh ia hi oke, achi tok oka.

²⁰ Mihmʋt Sukkolh a̱ asht ia mʋt Ehlam a̱ yakni haiaka ʋhli ya̱ a binachi tok.

²¹ Mihma Chihowah yʋt itikba iʋt in tikba heka kʋt nitak ma, toni̱k hoshonti hosh hikia beka tok; atuk osh ninak ma in tohwikela chi̱ kʋt, toni̱k luak osh hikia beka tok; nitak, micha ninak ma, a̱ya chi̱ hatok.

²² Nitak ma hoshonti toni̱k atuk osh ninak ma toni̱k luak ʋt okla itikba hikia tuk a̱ kanʋllichit ik im esho tok.