Eksotʋs 12 - Chahta Holisso Holitopa 1886

¹ Mihma Chihowah yʋt Moses, micha Alon a̱ Echip yakni ya̱ ai im anumpulit,

² Hʋshi ilʋppak osh hʋshi talohʋt hʋchim ishtia ʋmmona ya chi̱ hoke: afʋmmi ishtia ka̱ hʋchi̱ hʋshi ʋmmona chi̱ hoke.

³ Islael okla moma ka̱ im anumpulit, Hʋshi ilʋppa nitak ont ishit pokolikma, hatak moma kʋt chukfushi ya̱ i̱ki ʋhleha in chuka achʋfa ʋlhpi̱sa hosh ishashke, chuka achʋfakma chukfushi achʋfashke.

⁴ Atuk o̱ chuka achʋfa yʋt ik lauwo fehna hatuk o̱, chukfushi ʋt atampakma, chuka abili̱ka et apanta ak o̱ itatuklot shilombish holhtina kak o̱ ʋlhpi̱sa hosh ishashke, hatak moma kʋt chukfushi ya̱ ʋpa ʋlhpesa ho̱ hʋsh hotenashke.

⁵ Hʋchin chukfushi ʋt ik ai ono iksho, nakni yosh afʋmmi ʋmmona hashke, chukfi ha̱ keyukmʋt, issi kosoma i̱ filʋmmichit hʋsh ishashke.

⁶ Micha hʋchim anta na, hʋshi mih mak inli kʋt nitak ont isht auah ushtashke; atukma Islael okla moma hosh opiakma ʋbashke.

⁷ Mihmʋt issish ishi cha, aboha yʋmma anu̱kaka ai ʋpa chi̱ kʋt, okhissa tahlakla̱ka lapali tuklo ka̱, micha okhissa paknaka lapali aiena ka̱ isht issashke.

⁸ Mikmʋt ninak yʋmma nipi ya̱ luak isht apushli cha, pʋska ik shatʋmmo aiena ʋpashke, micha haiyu̱kpulo homi aieninchit ʋpashke.

⁹ Okcha̱ki ka̱ hʋchikpo kashke, micha oka ishit honni keyu kʋmohmi; amba luak isht ʋlhpusha hashke; noshkobo, iyi aiena, micha chu̱kʋsh, salakha, micha shilukpa aiena hashke.

¹⁰ Micha kaniohmi kia hʋchin tonla na onnaha he keyu hoke: kaniohmit itonla na onnakma luak ishit hʋsh hukma hi oke, ish achashke.

¹¹ Micha yakohmi hosh hʋshpa hi oke, ʋskofʋchi ya̱ isht hʋsh il ʋskofaiyachi cha, hʋchi̱ shulush a̱ hʋsh hoyulo, micha hʋchin tʋbi ʋt hʋchibbak foyukashke; micha anukwa̱ya hosh hʋshpa hi oke, Chihowah im ʋbanʋblit ont ia yoke.

¹² Himak ninak a̱ Echip yakni ya̱ hlopulli lish ʋttahpi moma, hatak micha nanʋlhpoa aiena Echip yakni aiasha ka̱ issot kanchi la chi̱ hoke; micha Echip i̱ naholba puta i̱ sanalit na palʋmmi onochi la chi̱ hoke. Chihowah sia hoke.

¹³ Mikma issish ʋt aboha hʋsh ai asha ka̱ a lapoht ma̱ya kʋt hʋchi̱ nan isht ʋlhpisa chi̱ hoke; atuk o̱ issish a̱ pisa likmʋt, hʋchi ʋbanʋbli la chi̱ hoke, mikmʋt Echip yakni ya̱ issot kanchi likma, ililli okpulo ʋt hʋchi onʋtolʋt ishit hʋchi kancha he keyu hoke.

¹⁴ Mikma himak nitak a̱ hʋsh ithana bilia yosh hʋchin takala chi̱ hoke, mikmʋt hʋchim aiitishali puta hlopulli ka̱ holitoblit Chihowah impʋchi isht hʋsh aiasha hi oke; nan ʋlhpisa bilia yo̱ impʋchi isht hʋsh aiasha hi oke.

¹⁵ Nitak untuklo ho̱ pʋska ik shatʋmmo ya̱ hʋsh pa hi oke; nitak ʋmmona mak inli ho̱ shatʋmmi ya̱ hʋchim aboha puta ka̱ hʋsh kohchashke; kʋna hosh nitak ʋmmona ʋttʋt ia hosh nitak ont isht untuklo ont ʋhli takla ka̱ pʋska shatʋmmi ya̱ ʋpakmʋt, shilombish yʋmmʋt Islael a̱ akohchʋt fiopa tʋpa hi oke.

¹⁶ Micha nitak ʋmmonakma itʋnaha holitopa aiasha hi oke, atuk osh nitak ont isht untuklokma, itʋnaha hʋchi̱ holitopa kʋt aiasha hi oke, yʋmmak oka toksʋli kaniohmi kia ʋlhtaha he keyu, peh hatak ʋt nana ʋpa ʋlhpesa ho̱, yʋmmak illa hʋsh atahla hi oke.

¹⁷ Micha pʋska ik shatʋmmo impʋchi ya̱ isht hʋsh aiashashke; mih nitak fehna ak o̱ hʋchim apelichi puta ka̱ Echip yakni ya̱ apehlichit, hʋchi kohchi li tuk oka. Yʋmohmi hoka nitak ilʋppa hʋchim aiitishali puta kʋt nanʋlhpisa bilia yo̱ hʋsh holitobla hi oke.

¹⁸ Hʋshi ʋmmona, hʋshi ʋt nitak ont isht auahushtakma opiakma, pʋska ik shatʋmmo ʋpʋt isht hʋsh ia tuk osh, hʋshi ʋt nitak ont ishit pokoli tuklo akucha achʋfa opia ka̱, ont hʋsh ʋhlicha hi oke.

¹⁹ Nitak untuklo ho̱ shatʋmmi ʋt hʋchim aboha puta ka̱ iksho ka hi oke; Kʋna hosh okla inla yokmá, keyukmʋt yakni ya̱ ai itola tok okmá, nana hosh pʋska shatʋmmi ya̱ ʋpakmʋt, shilombish yʋmmʋt Islael okla moma ya̱ akohchʋt fiopa tʋpa hi oke.

²⁰ Nana kia shatʋmmi ya̱ hʋsh pa he keyu hoke; hʋsh aiasha moma ka̱ pʋska ik shatʋmmo yo̱ hʋsh pa hi oke, achi tok.

²¹ Yʋmohmi ma Moses ʋt Islael im asʋnonchi moma ka̱ hoyo cha, hʋchin chuka achʋfa ʋlhpisa hosh chukfushi achʋfa ya̱ ont ishit hʋsh kohchi cha ʋbanʋblit ont ia ya̱ hʋsh bashke.

²² Micha hissop pukussa ho̱ hʋsh eshi cha, issish ampushi a̱lhto ka̱ hʋsh okʋchi cha, issish ampushi ʋlhto kash okhissa paknaka lapat, micha tahlala̱ka lapali tuklo ka̱ isht hʋsh issashke: mikma hʋsh achʋfa kia chim aboha okhissa ya̱ hʋchik kohcho ho̱ onna chi̱ hoke.

²³ Chihowah yʋt Echip okla ha̱ issot kancha chi̱ hosh hlopullit a̱ya chi̱ hoke: atuk osh issish ʋt okhissa paknaka lapali, micha tahlakla̱ka lapali tuklo ka̱ issish a̱sha na, pisakmʋt okhissa ya̱ ʋbanʋbli cha, nanʋbi ya̱ hʋchim aboha puta ka̱ iba chukowʋt issot ik kanchi, im ahna chi̱ keyu hoke.

²⁴ Mikma nana ilʋppak osh chishno, micha hʋchiso ʋhleha aiena ka̱ i̱ nan ʋlhpisa bilia yo̱ hʋsh holitobla hi oke.

²⁵ Atukma yakohma hi oke, Chihowah yʋt achit hʋchim issa tok mak osh hʋchima na, yakni ya̱ hʋsh onakmʋt, nan nan isht asha ilʋppa isht hʋsh a̱hsa hi oke.

²⁶ Atukma yakohma hi oke, hʋchim ʋlla ʋhleha hʋt, Nan isht asha ilʋppʋt, nanta ho̱ miha ho̱? hʋchim achikma.

²⁷ Chihowah im ʋbanʋblit ont ia nan ʋbit isht aiokpʋchi yoke; yʋmmʋt Echip okla ha̱ issot kanchi mʋt, Islael im ʋlla ʋhleha im aboha puta ka̱ ʋbanʋblit ont ia cha, pin chuka achʋfa puta Echip talaia ka̱ pi hlakofichi tok oke, hʋsh acha hi oke, im achi tok. Mihma okla hʋt noshkoboka isht akachunoli cha, aiokpʋchi tok.

²⁸ Micha Islael im ʋlla ʋhleha hʋt ia mʋt, Chihowah yʋt Moses, micha Alon a̱ im apesa tuk mak o̱ yʋmohmi tok, yohmi tok.

²⁹ Atuk o̱ yakohmi tok, ninak iklʋnna ma, Chihowah yʋt Echip yakni ya̱ ʋttahpi moma ka̱ issot kanchi tok, Falaoh im ʋttahpi yosh im aiombinili holitopa binili tuk a̱ ʋttʋt ia hosh yuka hosh aboha kʋllo ya̱ itonla ka̱ ont ʋhli, micha nanʋlhpoa ʋttahpi puta moma tok.

³⁰ Mihma ninak a̱ Falaoh, micha in tishu ʋhleha moma, micha Echip okla moma kʋt tani tok; mihma Echip a̱ a yaiya chito fehna tok; aboha ya̱ ik ai illo kʋt iksho hatuk oka.

³¹ Mihma ninak a̱ Moses, micha Alon a̱ hoyo cha, Ho wakaya, micha ʋm okla ai iti takla ya̱ hʋchishno, micha Islael im ʋlla ʋhleha aienʋt kohchʋt hʋsh iashke, micha hʋsh ia cha, hʋsh achi tuk okʋt, Chihowah ya̱ hʋsh im antiashke.

³² Micha hʋchi̱ nanʋlhpoa chipinta, micha hʋchi̱ nanʋlhpoa hochito aiena hʋsh achi tuk okʋt, hʋsh eshi cha, oh iá, micha ʋno ak kia anumpa yukpali hʋs si onochi akinlashke, achi tok.

³³ Mihma Echip okla hʋt anukwa̱yʋt yakni kohcha chi̱ ka̱ okla ha̱ im acheba fehna tok; momʋt illit pi taha chi̱shke, achi hatuk okʋt.

³⁴ Mihma okla hʋt tansh yamʋska ik shatʋmmo ki̱sha ho̱, micha a yamʋska aiena ka̱ i̱ na fohka abonunta ho̱ eshit iabanali tok:

³⁵ Micha Islael im ʋlla ʋhleha hʋt Moses im anumpa hatuk mak o̱ yʋmihchi tok: micha Echip okla ha̱ tʋli hʋta isht ilakshema, micha tʋli holisso lakna isht ilakshema, micha nafohka aiena ka̱ im a pota tok.

³⁶ Mihma Chihowah yʋt okla ha̱ Echip okla itikba ya̱ holhpanayo hanta ya̱ ima tok; yohmi ho̱ nana ho̱ bʋnnakma im pota tok: mihma Echip okla ha̱ wehpuli tok.

³⁷ Mihma Islael im ʋlla ʋhleha hʋt Lameses ashʋt ia mʋt, Sukkolh a̱ ona tok, hatak akanowa yʋt, ʋlla yʋt aholhtina keyu ka̱ tahlepa sipokni tahlepa hannali foka tok.

³⁸ Mihma okla lawa itʋno̱ho̱wa ak inli hosh apehʋt ia tok: mihma nanʋlhpoa chipinta, micha nanʋlhpoa hocheto, nanʋlhpoa laua fehna, hatok.

³⁹ Mihma tansh yamʋska Echip ai ishit kohcha ka̱ ik shatʋmmo hatuk oka, pʋska luboa ik shatʋmmo nunachi tok; Echip a̱ kocha pit tihleli, mihma a̱sha he keyu hatuk okʋt, micha ilhpak kia ik ila tahlo tuk atok.

⁴⁰ Yohmi ka̱ Islael im ʋlla ʋhleha hʋt Echip aiasha kʋt afʋmmi tahlepa ushta cha pokoli tuchina hatok.

⁴¹ Atuk o̱ yakohmi tok, afʋmmi tahlepa ushta cha pokoli tuchina kʋt ont taha ma, nitak yʋmmak fehna ka̱ yakohmi tok, Chihowah im okla moma kʋt Echip yakni ya̱ kohchʋt ia tok.

⁴² Pehlichit Echip yakni ya̱ kohcha tok, Chihowah ya̱ i̱ holitobli fehna he ninak oke; Chihowah i̱ ninak ilʋppak o̱ Islael im ʋlla ʋhleha moma im aiitishali puta kʋt holitobla he mak oke.

⁴³ Mihma Chihowah yʋt Moses, micha Alon a̱, Ilʋppa ʋbanʋblit ontia nanʋlhpisa mak oke, okla inla yʋt ʋpa he keyu hoke.

⁴⁴ Amba hatak moma in tishu tʋli holisso isht chumpa tuk o̱, hakshup ish tʋbli tukma mih yosh ʋpa hi oke.

⁴⁵ Okla inla, micha tishu ilhtohno hokʋto ʋpa he keyu hoke.

⁴⁶ Chuka achʋfa ho̱ ai ʋpa hi oke, nipi ya̱ kaniohmi kia aboha ya̱ ishit ish kohcha he keyu, micha foni achʋfa kia hʋsh kobʋffa he keyu hoke.

⁴⁷ Islael okla moma kʋt holitobla hi oke.

⁴⁸ Atukma okla inla hatak osh hʋchi okla ahanta tuk osh, Chihowah im ʋbanʋblit ontia ya̱ holitobli bʋnnakmʋt, nakni moma kʋt hakshup tʋpashke. Yohmikmʋt bili̱ka ʋla cha, holitoblashke, micha yakni ya̱ ai ʋtta tok a̱ chohmashke; hatak hakshup tʋpa keyu kʋt ʋpa he keyu hoka.

⁴⁹ Nanʋlhpisa achʋfa hosh i̱ yakni aiʋtta tok, micha okla inla yosh hʋchi takla ahanta aiena ka̱ im itoyula hi oke, im achi tok.

⁵⁰ Ilʋppak o̱ Islael im ʋlla ʋhleha moma kʋt yʋmohmi tok. Chihowah yʋt Moses, micha Alon a̱ im apesa tuk mak o̱ yʋmihchi tok.

⁵¹ Atuk o̱ mih nitak akinli ka̱ yakohmi tok, Chihowah yʋt Islael im ʋlla ʋhleha apehlichi ʋlhpisa ho̱ pehlichit, Echip yakni ya̱ kohchi tok.