Eksotʋs 11 - Chahta Holisso Holitopa 1886

¹ Mihma Chihowah yʋt Moses a̱, Himakma nan ik achukmo achʋfa ho̱ Falaoh micha Echip a̱ onochi la chi̱ hoke, Yohmi ha yokmʋno ilʋppa ashwʋt ik ia, hʋchim ahna chi̱ hoke; ik ia, hʋchim ahnikmʋt a̱hli hosh kocha pit hʋchi tobla chi̱ bano hoke.

² Himak a̱ okla im anumpulit, ish haklochashke, mikma hatak puta kʋt in chuka a bili̱ka, mikma ohoyo puta kʋt in chuka abili̱ka ya̱ tʋli hʋta isht ilakshema, micha tʋli holisso lakna isht ilakshema i̱ potashke, im achi tok.

³ Mihma Chihowah yʋt Echip okla ha̱ okla hash i̱ kanʋchi tok. Micha hatak Moses ʋt Echip yakni ya̱ Falaoh in tʋshka ʋhleha itikba, micha okla hash itikba aiena ka̱ holitopa fehna tok.

⁴ Mihma Moses ʋt, Chihowah yʋt yak achishke, Ninak iklʋnna fokakma, kohchʋt Echip im iti takla ona la chi̱ hoke.

⁵ Mikma ʋttahpi moma Echip yakni aiasha kʋt, Falaoh im ʋttahpi yosh, im aiombinili holitompa om binili ka̱ ʋttʋt ia hosh, ohoyo tishu im ʋttahpi yosh afotoha a̱shaka hikia ka̱ ont ʋhli kʋt illa chi̱ hoke; micha nanʋlhpoa ʋttahpi moma chi̱ hoke.

⁶ Mikma Echip yakni hlopulli moma ka̱ yaiya chinto fehna, yʋmma chohmi kʋt iksho, micha himakma yʋmma chohmi kʋt iksho ka chi̱ hoke.

⁷ Amba Islael im ʋlla ʋhleha hokʋno, hatak okmá, keyukmʋt nan ʋlhpoa yokmá, nana ofi ʋt i̱ sanalit isunlʋsh a̱ ilhkolicha he keyu ka chi̱ hoke: yʋmohmi ho̱ Chihowah yʋt Echip okla, micha Islael a̱ itim inlʋchi ka̱, hʋsh ithaiyana chi̱ hoke.

⁸ Mikma chin tishu ʋhleha ilʋppa moma kʋt ʋm ʋlʋt, ʋm akachunolit, kohchʋt iá, micha okla hʋchiakaiya moma ká, acha chi̱ hoke; mikma yohmi ha yak o̱ kohchʋt ia la chi̱ hoke, achi tok, Mihmʋt nokowa fehna hosh Falaoh ha̱ itikba hikiʋt kohchʋt ia tok.

⁹ Mihma Chihowah yʋt Moses a̱, Falaoh hʋt hʋchi̱ haponakla chi̱ keyu hoke; Yohmi na, a̱ na fehna puta ka̱ lauachi la chi̱ kak oke, im achi tok.

¹⁰ Mihma Moses, micha Alon ʋt na fehna ilʋppa moma ka̱ Falaoh itikba ya̱ a yʋmihchi tok; mihma Chihowah yʋt Falaoh chu̱kʋsh a̱ kʋllochi na, i̱ yakni ya̱ a kohchʋt Islael im ʋlla ʋhleha ha̱ ik ia, ik ahno tok.