Eksotʋs 10 - Chahta Holisso Holitopa 1886

¹ Mihma Chihowah yʋt Moses a̱, Falaoh ya̱ ish iba chukowashke; nan isht ʋm atokowa ilʋppak o̱ itikba ai otʋnichi la chi̱ hosh, chu̱kʋsh a̱ micha in tishu ʋhleha chu̱kʋsh a̱ kʋllochi li tuk oka.

² Micha Echip a̱ nana ayʋmihchi li tok, micha nan isht ʋm atokowa ya̱ im itin takla ayʋmihchi li tuk a̱, chiso ha̱ im anolit, ish haklocha he, mikma chiso hʋt ushi ya̱ haklocha he ak oke; yʋmohmi ka̱ ʋno ak osh Chihowah sia ka̱ isht hʋsh ithana he ak oke.

³ Mihma Moses, micha Alon ʋt Falaoh ya̱ im ona cha, Heblu in Chitokaka Chihowah yʋt yak achishke, Katiohmi foka ho̱ sa tikba ya̱ chi chu̱kʋsh ish akanlusecha he keyu cho? Ʋm okla hʋt ik ia cha, ʋm antiashke.

⁴ Keyukma, ʋm okla ha̱ ik ia ish ahna he keyukma, yakeh, onnakma hawa ya̱ chim aiʋhli ya̱ isht ʋla la chi̱ hoke.

⁵ Mikma yakni paknaka ya̱ ompoholmokma, kʋna hosh yakni ya̱ pisa he keyu ka chi̱ hoke: mikmʋt hlako̱fi tuk osh a̱sha moma hata̱fo ʋt chim ashanchi tuk a̱ ʋpa chi̱ hoke, micha iti puta osapa chim ai offo ya̱ ʋpa chi̱ hoke.

⁶ Micha chim aboha puta, micha chin tishu ʋhleha moma im aboha puta, micha Echip okla moma im aboha puta ka̱ alota chi̱ hoke, yʋmma chohmi ka̱ chi̱ki ʋhleha, micha chi̱ki i̱ki ʋhleha hʋt yakni paknaka ya̱ a̱sha tok nitak a̱ ʋttʋt minti hosh, himak nitak ant ʋhli ka̱ pisa chatuk keyu ka chi̱ hoke, achishke, achi tok: mihmʋt fullotʋt Falaoh ya̱ filʋmmit kohcha tok.

⁷ Mihma Falaoh in tishu ʋhleha hʋt, Katiohmi foka ho̱ hatak ilʋppʋt ishit pim ahleka chi̱ cho? ik ia cha, in Chitokaka Chihowah ya̱ ik aiokpʋchi, Echip ʋt okpulot taha kah, chik ithano ki̱sha cho? im achi tok.

⁸ Mihma Moses, micha Alon a̱ anonti Falaoh itikba isht ona tok, mihma, Oh ia cha, hʋchin Chitokaka Chihowah ya̱ oh im antia. Yohmi kia kʋta hosh ia chi̱ ho̱? im achi tok.

⁹ Mihma Moses ʋt, Pi̱ himithoa, micha pi̱ sipokni, piso ʋhleha, micha piso tek ʋhleha pi̱ nanʋlhpoa chipinta, micha pi̱ nanʋlhpoa hochito a puta pehliechit il ia chi̱ hoke: Chihowah ya̱ impʋchi isht il im a̱sha chi̱ hoke, achi tok.

¹⁰ Mihma Falaoh hʋt, Ik ia hʋchim ahni li ka̱ chohmit Chihowah yʋt hʋchishno, micha hʋchin chipunta puta ka̱ hʋchiba foyukashke: yohmi hʋsh ahnashke, nan ik achukmo kʋt hʋchi tikba itoyula hoka.

¹¹ Yohma he keyu, himak a̱ hatak hʋchia hokʋt, Chihowah ya̱ hʋsh im antiashke, yʋmmak o̱ hʋchi bʋnna tuk okʋt, im achi tok; mihma Falaoh itikba hieli tuk a̱ tihlelit kohcha wehli tok.

¹² Mihma Chihowah yʋt Moses a̱, Hawa yʋt ʋla chi̱ ka̱ chibbak a̱ Echip yakni paknaka ya̱ ish o̱ wielashke; yʋmohmi na, ʋlʋt yakni ya̱ onʋtoyula cha, hata̱fo ʋt ashanchi tuk moma haiyu̱kpulo puta yakni aiasha ka̱ ʋpʋt tahlashke, im achi tok.

¹³ Mihma Moses ʋt Echip yakni paknaka ya̱ in tʋbi ya̱ o̱ wieli ma, Chihowah yʋt nitak yʋmma moma ka̱, micha ninak yʋmma moma ka̱ hʋshi akochaka mahli ha̱ isht ʋlʋt yakni ya̱ onochi tok: atuk o̱ onnahinli ma, hʋshi akochaka, mahli hʋt hawa ya̱ isht ʋla tok.

¹⁴ Mihma hawa yʋt Echip yakni moma ka̱ ona mʋt, Echip im aiʋhli moma ka̱ aka foha ha tok: ik achukmo fehna ha tok; cha̱shpo ka̱ hawa yʋt yohmi chatuk keyu, micha himakma yohma he keyu ha tok.

¹⁵ Yakni paknaka moma ka̱ alotowa tok oke. Yohmi hosh yakni ya̱ okhilichi micha yakni ya̱ haiyu̱kpulo puta micha iti ʋni puta hata̱fo ʋt ashahanchi tuk a̱ ʋpʋt tahli tok; micha Echip yakni hlopulli moma ka̱ iti puta ka̱, micha haiyu̱kpulo osapa aiasha puta ka̱ nana okcha̱ki nana kia iksho tok.

¹⁶ Yohmi ma Falaoh hʋt tu̱shpʋt Moses, micha Alon a̱ hoyo tok; micha, Hʋchin Chitokaka Chihowah, micha hʋchishno ya̱ hʋchi̱ sa yoshobʋshke.

¹⁷ Yʋmohmi hoka himak a himonasi ya̱ ilʋppa nan ashʋchi li ya̱ hʋs sa̱ kashofashke, hʋchim asilhha lishke, micha hʋchin Chitokaka Chihowah ya̱ hʋsh im assilhhashke; yʋmohmi na nan illi ilʋppa illa ho̱ isht a̱ kanʋllichashke, achi tok.

¹⁸ Mihma Falaoh ya̱ i̱ filʋmmit ia cha, Chihowah ya̱ im asilhha tok.

¹⁹ Mihma Chihowah yʋt hʋshi okatula mahli kʋllo fehna ho̱ fullolichi na, hawa ya̱ ishtiʋt okhʋta humma ya̱ oka tamoli tok; Echip ai ʋhli fullota moma ka̱ hawa achʋfa kia iksho tok.

²⁰ Yohmi kia Chihowah yʋt Falaoh chu̱kʋsh a̱ kʋllochi na, Islael im ʋlla ʋhleha ha̱ ik iá, ik ahno tok.

²¹ Mihma Chihowah yʋt Moses a̱ Chibbak a̱ ʋba pit ish wielashke; yohmi na okhlili hʋt okhlili ha̱ yakohmi, ahna he ʋlhpesa hosh Echip yakni paknaka ya̱ onʋtoyulashke, im achi tok.

²² Mihma Moses ʋt ibbak a̱ ʋba pit wieli tok; mihma nitak tuchina ho̱ okhlili sukko hosh Echip yakni moma ka̱ onʋtoyula tok.

²³ Nitak tuchina ka̱ iti pesa keyu, micha aiasha tuk ʋt ik kanʋllo tok. Yohmi kia Islael im ʋlla ʋhleha moma im aboha ya̱ atohwekili ha tok.

²⁴ Mihma Falaoh hʋt Moses a̱ hoyo cha, Oh ia cha, Chihowah oh aiokpʋchi peh hʋchi̱ nanʋlhpoa chipinta, micha hʋchi̱ nanʋlhpoa hochito ak illa hosh aiashashke, hʋchim ʋlla ʋhleha hʋt hʋchi apihʋt iashke, achi tok.

²⁵ Mihma Moses ʋt, Nanʋbit isht aiokpʋchi, micha na hukmit isht aiokpʋchi aiena ka̱ ish pimashke, Yʋmohmi ho̱ pin Chitokaka Chihowah ya̱ nan ʋbit isht il aiokpʋchashke.

²⁶ Pi̱ nanʋlhpoa ʋt pi apehʋt ia chi̱ hoke: iyakchush achʋfa kia olbʋt anta chi̱ keyu hoke: yʋmma aieshi cha, Chihowah pin Chitokaka ya̱ isht il aiokpʋcha chi̱ hoka; micha yʋmma kil ono ki̱sha kʋt nana ho̱ Chihowah isht il im antia chi̱ kʋt kil ithano hokʋt, achi tok.

²⁷ Yohmi kia Chihowah yʋt Falaoh chu̱kʋsh a̱ kʋllochi na, ik ia, ik ahno tok.

²⁸ Mihma Falaoh hʋt, A̱ filʋmmit iá, ahah ish il ahnashke; himakma sa nashuka ya̱ ish pisa na; nitak nana ho̱ sa nashuka ya̱ ish pisakmʋt chilla chi̱ hoke, im achi tok.

²⁹ Mihma Moses ʋt, Ʋlhpesa ho̱ ish mihʋshke, himakma anonti chi nashuka ya̱ pisa la chi̱ keyu hoke, achi tok.