Eksotʋs 1 - Chahta Holisso Holitopa 1886

¹ Yohmi ka̱ hohchifo ilʋppa puta kak osh Islael im ʋlla ʋhleha hosh Echip a̱ ʋla tok. Hatak puta kʋt in chuka achʋfa aiena kʋt Chekob a̱ api̱hʋt ʋla tok,

² Luben, Simeon, Lefai, micha Chutah,

³ Issaka, Sebulun, micha Benchamin,

⁴ Tan, micha Naftali, Kat, micha Asha ak a tok.

⁵ Chekob haknip a̱ a toba tok shilombish moma kʋt shilombish pokoli untuklo tok: Chosef ʋt Echip a̱ anta hatok oka.

⁶ Atuk o̱ Chosef ʋt micha itibapishi ʋhleha moma kʋt, micha aiitishali yʋmma moma kʋt illi tok.

⁷ Mihma Islael im ʋlla ʋhleha hʋt waya achukma mʋt, isht i̱ shahlit, lauʋt isht ma̱ha̱yʋt, apakna cha, kʋllot atampʋt ma̱ha̱ya tok; micha yakni ya̱ alota tok.

⁸ Yohmi tuk o̱ mi̱ko himona ʋt Chosef a̱ ik ithano hosh Echip a̱ mi̱kot hikia tok.

⁹ Micha im okla ha̱, Yakeh, Islael im ʋlla ʋhleha okla hʋt laua, micha kʋllo kʋt pi̱ shahli hoke.

¹⁰ Inta, iloh i̱ kostinashke, keyukma lauat taiyaha tukmʋt, yakohma hi oke, tʋnʋp nana kia a̱shakma, pin tʋnʋp ʋhleha ha̱ ibʋlhto cha pitibikmʋt, yakni ya̱ kocha hi oke, im achi tok.

¹¹ Yʋmohmi hatuk osh toksʋli kʋllo onochit isht ilbʋshala chi̱ ka̱, toksʋli apesʋchi ʋhleha ha̱ im apesa tok. Mihma ʋlhpoyak aiasha tʋmaha holihta Pihlom, micha Lameses a̱ Falaoh a̱ im ikbi tok.

¹² Yohmi kia ilbʋshali kʋt i̱ shahlechik mak o̱, apakna kʋt, isht i̱ shahlit ia tok. Mikma Islael im ʋlla ʋhleha hatuk mak o̱ okla komunta tok.

¹³ Micha Echip okla hʋt Islael im ʋlla ʋhleha ha̱ toksʋlechi kʋt i̱ kʋllochi tok.

¹⁴ Micha yuka kʋllo, lukfi yamʋska, micha lukfi nuna, micha osapa natoksʋli ilaiyukali moma toksʋlechit i̱ nitak a̱ hominchi tok; natoksʋli moma toksʋlechi kʋt i̱ kʋllochi ha tok.

¹⁵ Mihma Echip i̱ mi̱ko ʋt ʋlla eshikma apestikeli Heblu ohoyo ʋhleha ha̱ im anumpulit, (yʋmma achʋfa hohchifo kʋt Shiplah, mikma achʋfa hohchifo kʋt Puah ya tok.)

¹⁶ Ʋlla eshi apesʋchi isht‐ai‐ʋtta ya̱ Heblu ohoyo ha̱ hʋsh i̱ yʋmihchi tuk osh, ʋlla eshi na, hʋsh pisakmʋt, ʋlla nakni yokma hʋshbashke, amba ʋlla tek okmʋt okcha̱yashke, achi tok.

¹⁷ Yohmi tuk kia ohoyo ʋlla eshi apesʋchi ʋhleha hʋt Chitokaka ya̱ i̱ nukshopa cha, Echip i̱ mi̱ko ʋt im apesa tuk a̱ ik yʋmihcho hosh, amba ʋlla nakni ya̱ okchalinchi tok.

¹⁸ Mihma Echip i̱ mi̱ko ʋt ohoyo ʋlla eshi apesʋchi ʋhleha hash hoyo cha, Nanta katiohmi ho̱ ilʋppa hʋsh yʋmihchi cha, ʋlla nakni yo̱ hʋsh okchalinchi cho? im achi tok.

¹⁹ Mihma ʋlla eshi ka̱ apesʋchi ohoyo hash osh Falaoh ha̱, Heblu ohoyo ʋhleha hʋt Echip ohoyo ʋhleha ha̱ chohmi keyu hoka; tu̱shpa hatuk osh ʋlla eshi ka̱ apesʋchi ohoyo ʋhleha hʋt ik im ono ki̱sha ho̱, ʋlla eshi hoke, im achi tok.

²⁰ Yʋmohmi hoka Chitokaka yʋt ʋlla eshi ka̱ apesʋchi ohoyo ʋhleha hash achukma kak o̱ i̱ yʋmihchi tok: mihma okla hʋt apaknʋt kʋllo fehnʋt ishit ma̱ha̱ya tok.

²¹ Atuk o̱ yakohmi tok, ʋlla eshi ka̱ apesʋchi ohoyo ʋhleha hash osh Chitokaka ya̱ i̱ nukshopa hatuk o̱, chuka achʋfa puta im ikbi tok.

²² Mihma Falaoh hʋt im okla moma ka̱ atokolit, Ʋlla nakni ʋtta puta ka̱ okhina ya̱ pit hʋsh okʋchashke; micha ʋlla tek ano hʋsh okchalinchashke, im achi tok.