Efeshan 6 - Chahta Holisso Holitopa 1886

¹ Ʋlla ʋhleha ma! Chitokaka ak o̱ hʋch i̱ki, micha hʋch ishki ita tuklo hʋsh im antiashke; ilʋppak osh ʋlhpesa hoka.

² Chi̱ki, micha chishki ita tuklo ka ish holitoblashke, ilʋppʋt anumpa ʋlhpisa nan im issa ya̱ apatoa ʋmmona.

³ Yohmi hosh chim achukmʋt hopaki ho̱ yakni paknaka ish ai ahantashke.

⁴ Mikma i̱ki hʋchia hʋt hʋchim ʋlla ya̱ hʋch ik nokowʋcho kashke: amba Chitokaka yak o̱ anukfohkí, micha nan ai ahni yak o̱ a fohkit hʋsh hofantihinchashke.

⁵ Yuka ʋhleha ma! yakni ilʋppak inli haknip isht hʋchi̱ nahullo ya i̱ nukwiyʋt wʋnihinchit, chu̱kʋsh apissali kʋt, Klaist ak inli ho̱ chohmichit hʋsh im antiashke.

⁶ Yohmi kʋt hatak yukpali yo̱ chohmit, nishkin pi̱sa bano toksʋli keyu; amba Klaist in tishu ho̱ chohmit hʋchi chu̱kʋsh fehna Chihowa nan ai ahni ya̱ hʋsh yʋmihinchashke:

⁷ Yohmi kʋt aiokpanchit yuka a toksʋli toksʋlit, Chitokaka yak o̱ i̱ yʋmihchí, hatak ak o̱ keyu;

⁸ Nana achukma nana ho̱ hatak kʋna kia yuka hokma, yuka keyu hokmá, nana hoh kia yʋmihchikma, yʋmmak atuk mak inli ho̱ Chitokaka ya̱ im a habena hi a̱ hʋsh ithaiyanashke.

⁹ Mikma i̱ nahullo hʋchia hʋt i̱ nokowʋt anumpuli iksho hosh, yʋmmak inli ho̱ hʋsh i̱ yʋmmihinchashke: hatak iti̱ shahshohlechit anukfilli keyu hosh, ʋba yakni hʋchim i̱ Shahli yʋt binili ka hʋsh ithaiyanashke.

¹⁰ Ishtaiyopi ka itibapishi li ʋhleha ma! Chitokaka a hlampkot im a hlampko chinto yo̱ hʋsh a hlampkashke.

¹¹ Nan isht ahullo okpulo isht a yoshubli a̱ im i̱ sanalit hʋsh hikia hinla kʋt, nan isht il atukkochi Chihowa yʋt atahli tok a̱ a moyuma ka hʋsh foyukashke.

¹² Nipi, micha issish o̱ im i̱ sanalit il itibi keyu, amba mi̱ko ʋhleha, nan ʋhltoka, hochitoka, yakni ai okhlili ka ilʋppa pehlichi ʋhleha, shilombish okpulo ʋba itʋnowa puta aiena kak oke.

¹³ Yʋmohmi ka nitak ik achukmo ka im ai i̱ sanalit hikia, micha hʋsh atahli hayʋt, hʋsh hikia hinla kʋt, nan isht il atukkochi Chihowa yʋt atahli tok a̱ moyuma ka hʋsh il ai eshashke.

¹⁴ Yʋmohmi ka anumpa ai a̱hli isht ʋskofaiyachit nana isht ai ʋlhpiesa ikkishi alata ho̱ foyukʋt,

¹⁵ Micha ʋbanumpa it i̱ nanaiyʋchi nan isht im ʋlhtaiyaha ma hʋch iyi isht hoyulo hosh hʋsh hikiashke.

¹⁶ Nan okpulo yʋmma im iti naki ishit hulo̱hushmi puta ka isht hʋsh mosholicha hinla kʋt, moma pahnaka ya̱ telihpa na yimmi ka mak o̱ hʋsh il ai eshashke.

¹⁷ Noshkobo isht ompoholmo ai okcha̱ya, micha Shilombish i̱ bʋshpo falaia, yʋmmʋt Chihowa im anumpa mak oka hʋsh ieshashke.

¹⁸ Shilombish anukfoyuka hosh anumpa ilbʋsha puta im anumpohonlit, asihi̱hla hosh achunanchit ahah! aha̱ni, micha ʋbanumpa yimmi puta ka isht hʋsh asihi̱hlashke:

¹⁹ Micha ʋno ma isht hʋs si anumpohonlashke: yohmi na itih kohchit anumpuli la hi a̱ ʋma na ʋbanumpa luma ya tok a̱ anohonli la chi̱ kʋt, nukwa̱ya ikshot sʋtih ha̱ wakʋmmi lashke.

²⁰ Yʋmma pulla ho̱ Ʋba Mi̱ko im anumpeshi talakchi sia hoke: si yʋmohmi kia nukwa̱ya ikshot anumpuli la he ʋlhpesa hokʋt, anumpuli la hi a̱ ʋba isht hʋs si anumpohonlashke.

²¹ Amba nana ʋm a kaniohmi, micha nana isht anta li aiena ka hʋsh akostinincha chi̱ ak inli kʋno, Tikikʋs itibapishi a̱ holitopa, micha Chitokaka nan im isht ʋtta ai a̱hli ak osh nana moma ka hʋchim anola chi̱ hoke.

²² Yʋmohma chi̱ kak o̱ yʋmma hʋchi̱ pila li tuk oke; yohmi na nana pim a kaniohmi ka hʋsh ithana chi̱ hatuk; mikma hʋchi chu̱kʋsh a̱ hopohlʋla chi̱ hoke.

²³ I̱ki Chihowa, micha Chitokaka Chisʋs Klaist a minti na yimmi ka isht ai it i̱ hullo, micha it i̱ nanaiya aiena kʋt itibapishi ʋhleha ha̱ hʋchi anukfoyukashke.

²⁴ Chitokaka Chisʋs Klaist i̱ hullo ai a̱hli moyuma ka nan isht i̱ kana yʋt anukfoyukashke. Amen.