Efeshan 5 - Chahta Holisso Holitopa 1886

¹ Yʋmohmi hoka ʋlla holitopa yo̱ chiyuhmit Chihowa ya̱ hʋsh iakaiyashke.

² Micha Klaist ʋt pi̱ hullo cha, pishno ak atuk mak o̱ nan ashʋchi isht ʋlhtoba, Chihowa nan i̱ balama, isht il im issa tok a̱ chiyuhmit, ai it i̱ hullot hʋsh ai itʋnowashke.

³ Amba haui toba, micha nana liteha puta, nan anushkunna atampa ʋbanumpa yimmi ʋt yohma he ʋlhpesa keyu ka, himonna kia yohmi tok achit ik hʋchi annowo kashke.

⁴ Micha anumpa isht a hofahya, anumpa makali anumpuli, na yopula, a yʋmohma he ai ʋlhpiesa keyu ka hʋch ik anumpulo hosh, amba Chihowa ya̱ yak oke im ai ahni kak osh hʋchim i̱ shahlashke.

⁵ Hatak haui nana kia, hatak ik kashofo, hatak nan anushkunna atampa, yʋmmʋt na holbʋt toba aiokpʋchi, ilʋppʋt Klaist, micha Chihowa im apehlichika nan ai isha he ʋlhpiesa keyu ka hʋsh ithana hoke.

⁶ Hatak nana kia anumpa ik achukmo isht ik hʋchi haksecho kashke: ilʋppa puyuta pulla kak o̱ Chihowa nan isht i̱ nukkilli yʋt ʋbanumpa ik im antio hatak puta ka onʋtuyula hoke.

⁷ Yʋmohmi hoka yʋmmak okʋno hʋchishno ʋt na hʋch ik iba ta̱klo yashke.

⁸ Tikba ma hʋchi okhlili tok kia, himak ano Chitokaka hʋsh a tohwikeli hokʋt, tohwikeli ʋlla yo̱ chohmit hʋsh itʋnowashke.

⁹ Shilombish isht ai ʋni hokʋto nana achukma bieka, micha nan aiʋlhpiesa yʋmohmi, micha anumpa a̱hli yak oke.

¹⁰ Yohmi cha nana ho̱ Chitokaka yʋt aiokpanchikma, hʋsh akostinincha hi oke.

¹¹ Micha okhlili ka a toksʋli nan ik ʋno hʋch ik iba ta̱klo hosh, amba ik im ahninchot hʋsh im alʋmmashke.

¹² Aluma̱ka ho̱ nana kʋt ai yʋmohmi tuk a̱ isht anumpuli illa kak kia, isht hofaya he ʋlhpesa hoke.

¹³ Yohmi ka atokowa otʋni kʋt nan tohwikeli ak o̱ isht otʋni hoke: nana hosh nana ka otʋninchikmʋt, yʋmmak osh tohwikeli hoke.

¹⁴ Yʋmohmi kak o̱, Nusi tuk chia kʋt, chi okchashke, micha illi tuk chia kʋt falamʋt ish tanashke, mikma Klaist ʋt tohwikeli chima chi̱ hoke, achi hoke.

¹⁵ Yohmi ka im anukfila iksho chohmi keyut, amba hopoyuksa chohmit ahah! ahnit hʋsh itʋnowashke.

¹⁶ Nitak ʋt ik hʋchi̱ kʋnio hosh nan isht hʋsh il im ahantashke; nitak hʋsh ai ahanta kʋt ik achukmo hoka.

¹⁷ Yʋmohmi hoka ik hopoyukso yo̱ hʋchia keyu hosh, amba Chitokaka im anukfila hʋt kaniohmi ka hʋsh akostininchashke.

¹⁸ Micha oka homi isht ik hʋchi hakso, yʋmmʋt im ila̱yak isht yopomo yoke; amba Shilombish ak o̱ isht hʋchi alotowashke.

¹⁹ Ʋba isht taloa, micha Shilombish imma isht taloa aiena ka isht il ai anumpohonlit, chu̱kʋsh isht in champulit Chitokaka ya̱ hʋsh in taloho̱washke.

²⁰ Nana puta ka pin Chitokaka Chisʋs Klaist isht hochihi̱fot Chihowa, yʋmmʋt I̱ki mak oka, yak oke ai ahnit, il aiokpahanchashke.

²¹ Chihowa i̱ nukshohompa hosh hʋsh it im antiashke.

²² Tekchi ʋhleha ma! Chitokaka chohmichit hʋchi̱ hatak a̱ hʋsh im antiashke.

²³ Klaist ʋt chʋch a̱ i̱ noshkobo ya̱ yʋmmak inli ho̱ chohmit hatak ʋt ilap tekchi a̱ i̱ noshkoboka yoka: micha yʋmmʋt haknip ai okcha̱ya mak oke.

²⁴ Yʋmohmi ka chʋch ʋt Klaist a̱ im antia ka yʋmmak inli ho̱ chohmit, tekchi ʋhleha hʋt nana puta ka ilap i̱ hatak a̱ isht im antiashke.

²⁵ I̱ hatak ʋhleha ma! hʋchi tekchi a̱ hʋsh i̱ hullo kʋt, Klaist ʋt chʋch a̱ i̱ hullo hosh, il im issa tok ak inli ka, hʋsh chiyuhmichashke:

²⁶ Yʋmohmi kʋt oka isht achifʋt ʋbanumpa isht kashofʋt na hullochi cha,

²⁷ Chʋch holitopa, na liteha lapali iksho, shinowa, yʋm ma chohmi nana kia iksho ho̱ ilap itikba hilecha chi̱ hatok; a̱hli a holitopa, imomokpulo keyu ho̱ ilap itikba hilech, chi̱ hatok.

²⁸ Yʋmmak inli ho̱ chiyuhmit, hatak puta kʋt ilap haknip chiyuhmichit, tekchi ʋhleha ha̱ i̱ hulla he ʋlhpesa hoke. Kʋna hosh tekchi a̱ i̱ huhu̱llo kʋt, ilap a i̱ hullo hoke.

²⁹ Kʋna kia ilap haknip a̱ i̱ nukkilli chatuk keyu hoka; amba Chitokaka yʋt chʋch a̱ i̱ yʋmihchi ak inli ho̱ chohmit, apoʋchit hiahnit ilaueli hoke.

³⁰ Pishno ʋt yʋmma haknip, nipi micha foni aiena ka ai achʋfa pia hoka.

³¹ Ilʋppa pulla kak o̱ hatak ʋt i̱ki, micha ishki ita tuklo ka issa cha, tekchi ak o asitia he, mikmʋt tuklo ilʋppʋt nipi achʋfa hi oke.

³² Ilʋppʋt na fehna chinto hoke: yohmi kia Klaist, micha chʋch ita tuklo yʋmmak o̱ isht miha lishke.

³³ Yohmi ak inli kia hʋchishno hʋsh puta aiyukali kʋt ilap inli chiyuhmit hʋchi tekchi a̱ hʋsh i̱ hullashke; mikma tekchi ʋt yohmi ahnit, i̱ hatak a̱ holitoblashke.