Efeshan 4 - Chahta Holisso Holitopa 1886

¹ Yʋmohmi ka Chitokaka atuk mak o̱ yuka sia hʋt hʋsh a yʋmohma he hʋchi ʋlhtoka tuk ʋt, ai ʋlhpiesʋt hʋsh a̱yʋt,

² Chu̱kʋsh akanlosi, micha chu̱kʋsh yohbi, micha anukhobela sʋlahʋt, iti̱ hullot, it im i̱ nuktaiyalʋt;

³ Shilombish ai isht itibai achʋfʋt nan isht it i̱ nanaiya isht iti talakchi kak o̱ hʋsh ai ahna he, hʋchim asilhha lishke.

⁴ Yohmi ka haknip achʋfa, micha Shilombish achʋfa hosh aiasha, yʋmmak inli ho̱ chohmit hʋsh a yʋmohma he hʋchi ʋlhtoka tok ʋt, ai okcha̱ya pisa he hʋsh ai ahni kʋt achʋfa hoke.

⁵ Chitokaka yʋt achʋfa, na yimmi mʋt achʋfa, baptismo mʋt achʋfa,

⁶ Moma I̱ki achʋfa, yʋmmʋt nana moma i̱ shahli; nana moma a hlopulli, hʋsh moyuma ka hʋchi foyuka hoke.

⁷ Yohmi ak inli kia e moma ka nan isht i̱ kana pima kʋt, Klaist i̱ na hʋlbina kaniohmi ho̱ pi anukfohki kak oke.

⁸ Yʋmohmi kak o̱ ʋba ia mʋt, yuka la̱wa yukachit isht a̱yʋt, na hʋlbina puta ka hatak puta ka ima tok, achishke.

⁹ Yohmi ka ʋba ia tok, achi kʋt nanta hoh cho? amba yʋmmʋt tikba ma ʋba mintit aka yakni ʋla tok ak inli keyu̱?

¹⁰ Ʋba minti tok mihi yo̱ ak inli hosh ʋba shutik paknaka pilla ona kʋt, nana moma alotowa chi̱ kak atok.

¹¹ Micha kanimi kʋt apostel; micha kanimi kʋt hopaii; micha kanimi kʋt ʋbanumpa tosholi; micha kanimi kʋt iksa apesʋchi; micha kanimi kʋt nan ithʋnanchi aiena ya chi̱ ima tok:

¹² Yohmi kʋt ʋbanumpa yimmi ʋhleha ha̱ ai a̱hlicha he, ʋbanumpa isht ʋtta he, Klaist haknip ithʋnanchit hlampkohoncha hi ak atok oke.

¹³ Yʋmohomi na e moma kʋt ma̱ha̱yʋt nan ai yimmi ka, micha Chihowa Ushi ai ithʋna aiena ka ont il ai achʋfʋt, hatak im ahli e tobʋt, Klaist ʋt a kaniohmit ai alotowa fehna ka e chiyuhma hi oke:

¹⁴ Yʋmohmi hosh himak a pilla ma ʋlla pia keyu hosh, oka piakʋchi ka chohmit, anumpa il aiyukali mahli chohmi hatak ʋt nan isht i̱ kostini o̱ isht haksicha chi̱ kʋt, isht im aiihinchi ka ibafohkʋt ke fullokahancho kashke.

¹⁵ Amba i̱ hullo hosh anumpa a̱hli anumpulit, nan oklu̱ha ka isht im a hofantit ma̱ha̱yʋt, Klaist yʋmmʋt noshkoboka ya̱ e chiyuhmashke.

¹⁶ Yʋmmak o̱ haknip moma kʋt ai itifohka achukma, micha hakshish puta isht iti talakchi hosh moma kʋt nana a kaniohma he ʋlhpisa kʋt, a̱hlit yohmit it apelachi hosh haknip isht a chitot isht it i̱ hullot ma̱ha̱ya hoke.

¹⁷ Yohmi ka ilʋppa achi li mʋt, anonti himak a pilla ma Chentail inla im anukfila ik ahobo,

¹⁸ Im anukfila okhlili, micha chu̱kʋsh ʋt okpulo fehna hatuk osh, nana ik ithano anukfo̱ka kak osh, Chihowa im ai okcha̱ya i̱ filʋmmit yoshubʋt a̱ya;

¹⁹ Chu̱kʋsh sʋlahbot atʋpa, na haui atampa, na liteha puta asitiʋt isht ahanta ka hʋch ik ai itʋnowo ka he mak o̱, Chitokaka pulla hatuk mak o̱ atokolit hʋchim anoli lishke.

²⁰ Amba hʋchishno ʋt yʋmohma hi osh Klaist a̱ hʋsh ithʋna tuk keyu hoke:

²¹ Yohmi ka hʋsh i̱ haponaklo cha, Chisʋs im anumpa a̱hli yo̱ isht hʋchim ʋlbʋchi tuk okmʋt;

²² Tikba ma nana hʋsh a kaníohmi tok ʋt hatak sipokni, yʋmmʋt na haksichi chu̱kʋsh okpulo isht yoshuba aiena kʋno, naksika hʋsh bohlashke:

²³ Micha chu̱kʋsh isht hʋsh anukfilli ʋt himonʋt tobashke:

²⁴ Micha hatak himona, yʋmmʋt Chihowa holba tobʋt nan ai ʋlhpiesa, micha nan ai ashʋchi ik im iksho a̱hli mak o̱ isht hʋsh foyukashke.

²⁵ Yohmi hokʋt na holabi puta naksika bohlit anumpa a̱hli in chuka panta hatak a̱ hatak moma kʋt im anumpulashke; haknip il itib achʋfa hokʋt:

²⁶ Hʋchi nokowa kia, ik hʋchi yoshubo kashke; hʋsh nokowa mo̱ma na hʋshi ʋt ik okʋtulo kashke.

²⁷ Micha nan isht a hullo okpulo ya̱ hʋchik i̱ kanʋllo kashke.

²⁸ Kʋna kia hu̱kopa tuk ʋt, himmak ma ik hu̱kopo kashke; amba ik pilesa cha nana achukma kak o̱ ibbak isht toksahanli hosh, kʋna kia ilbʋshakma ima hi ʋt nan ahayuchashke.

²⁹ Anumpa liteha yʋt chitih ha̱ ik kohchot, amba nana kʋt achukma isht hlampka he, micha ha̱klo puta kʋt isht im achukma he ak ashke.

³⁰ Micha Chihowa imi Shilombish Holitopa, yʋmmak o̱ hʋsh ai okcha̱ya he nitak pit isht hʋchim ʋlhpisa kʋt, hʋchik nukha̱klocho kashke.

³¹ Chu̱kʋsh homi, micha it i̱ nokowa, micha nukhobela, micha itachowa, micha anumpa ik achukmo nanumachi, micha nan ik achukmo puta aiena kʋt naksika itonlashke.

³² Micha it i̱ kanʋt, chu̱kʋsh na hih isht iti ahnit, Chihowa hʋt Klaist ak atuk mak o̱ hʋchi̱ kashofi tuk a̱ chohmit, hʋsh it i̱ kashoho̱fashke.