Efeshan 3 - Chahta Holisso Holitopa 1886

¹ Ilʋppa pulla kak o̱ Pal sia hʋt Chentail hʋchia hatuk mak o̱ Chisʋs Klaist i̱ yuka sia hoke.

² Chihowa nan isht i̱ kana ʋlhpisa ishit hʋchim anumpuli la chi̱ ho̱ ʋma tok a̱, hʋsh haklo mʋhli tok a̱;

³ Yʋmmʋt Chihowa im anukfila luma hatok a̱ kaniohmichit ʋm otʋninchi tok a̱, anumpa ik lauwo ka tikba ka hʋchi̱ holissochi li tok oke.

⁴ Yʋmmak o̱ hʋsh itim anumpulikmʋt, Klaist im anukfila luma hatok a̱ ithana li ka, hʋsh akostinincha hinla hoke;

⁵ Yʋmmʋt nitak tikba ma hatak ushi ʋhleha ha̱ im annoa tok a̱ ohmi keyu ho̱, himak ano Shilombish ʋt apostel holitopa ʋhleha, micha hopaii puta aiena ka im otʋninchi hoke;

⁶ Yʋmohmi na Chentail ʋt ʋbanumpa pulla ho̱ iba taklʋt nan ai isha he ʋlhpesa toba, micha haknip ai achʋfa toba cha, Klaist pulla ho̱ nan im ihi̱sa tok a̱ ibai isha he atok:

⁷ Chihowa yʋt ilap nan isht im ai a̱hli ʋm ai yʋmihinchi pulla hosh, ilap nan isht i̱ kana ʋma pulla ho̱, ʋbanumpa isht ʋtta toba li tok oke.

⁸ Ʋno ʋt ʋbanumpa yimmi moma ik lauwo ka ik a lauwo sia hoh kia, isht i̱ kana ilʋppa ʋma na Klaist nan isht yukpali kʋna hosh ithʋnʋt hlopullicha he keyu a̱, Chentail a̱ isht im anumpuli la hi atok.

⁹ Micha im anukfila luma hatok a̱ itibai achʋfa kʋt kaniohmi ka hatak moma ka pisachi la hi atok; yʋmma yakni tobahpi a minti ka Chihowa hʋt Chisʋs Klaist nana moma ka isht ikbi tok ʋt, luhmit ieshi tok;

¹⁰ Yʋmohma hi o̱ himak ano hochitoka ilaiyuka, nan ʋlhtoka ilaiyuka, ʋba a holitopa ai asha kʋt, chʋch pulla atuk mak o̱ Chihowa a hopoyuksa chinto kʋt im otaiyana hi atok.

¹¹ Yohmi kʋt Chisʋs Klaist pin Chitokaka isht yʋmihcha he im anukfila bilia tok mak osh yʋmihchishke.

¹² Mihi yo̱ i̱ yimmi kak osh pi nukwa̱ya keyut, pi hakla chi̱ ahnit, pi anukfoyukʋt il im oho̱na hoke.

¹³ Yohmi ka hʋchishno ak atuk mak o̱ nan isht sʋlbʋsha ka, yʋmmʋt nan isht a hʋchi holitopa hokʋt hʋchi chu̱kʋsh isht ik hʋchim ello kashke.

^14-15 Ilʋppa pulla kak o̱ pin Chitokaka Chisʋs Klaist, yʋmmak o̱ chuka chʋfa ʋba yakni a̱ ai asha, micha yakni ai asha a moyuma kʋt ai a hohchifo I̱ki a̱ i̱ hʋchukbehlipa li kʋt,

¹⁶ Isht im a holitopa chinto fehna ka hʋch ima na, imi Shilombish ʋt chu̱kʋsh isht hlampko isht hʋchi hlampkohonchi;

¹⁷ Micha na hʋchi yimmi ho̱ Klaist ʋt hʋchi chu̱kʋsh a̱ anukfoyuka he yohmi lishke; yohmi ho̱ nan isht i̱ hullo a̱ akshish a tobʋt a hʋchi kʋllo hosh,

¹⁸ Ʋbanumpuli a̱hli puta iba ta̱klʋt a pʋtha, micha afalaia ka, micha hofobi, micha chaha aiena ka hʋsh akostinincha hinla hoke.

¹⁹ Micha Klaist ʋt nan isht pi̱ hullo ka ai ithʋna he atampa ka hʋsh ithʋna hosh, Chihowa isht alotowa moma kʋt isht hʋchi alotowa he ak atok.

²⁰ Yʋmmak osh ilap im isht hlampko isht pi hlampkohonchi kʋt, nana ho̱ il asilhha, keyukmʋt nan il anukfilli moma atampa fehna ka pim atahla hinla,

²¹ Mihi yosh Klaist atuk pulla mak o̱ chʋch isht a holitopa na nitak ataha iksho, yakni ataha iksko kashke. Amen.