Efeshan 2 - Chahta Holisso Holitopa 1886

¹ Yohmi kʋt na yoshuba, micha nan ai ashʋchi isht hʋchi illi yatuk a̱, hʋchi okchalinchi tok oke.

² Ilʋppa chiyuhmi ka cha̱shpo ma hʋsh ai itʋnowa kʋt, yakni ilʋppa ai yʋmohmi cha tuk a̱ yʋmohmit shutik takla i̱ mi̱ko, shilombish ʋbanumpa ik im antio puta anukfoyukʋt isht a̱ya kak o̱, iakaiya hosh hʋsh itʋnowa tok oke:

³ Yohmi kak o̱ pishno ak kia cha̱shpo ma iba ta̱kla pi haknip im anukfila ik achukmo iakaiyʋt, haknip nan ai ahni, micha chu̱kʋsh nan ai ahni aiena ho̱ e yʋmohmi tuk oke; yohmi kʋt chu̱kʋsh okpulo ʋmmona il ishi tok moma kʋt im ai anukkilli pi onʋtonla kʋt, inla yak inli chohmi hoke.

⁴ Yohmi tok kia Chihowa nan i̱ nukha̱klo chinto im ai ʋlhta̱yak pulla hosh, nan isht i̱ hullo chito ho̱ isht pi̱ hullo hatuk osh,

⁵ Nan ai ashʋchi isht pilli moma kia, Klaist iba taklanchit hʋpi okchalinchi tok oke; isht i̱ kana pulla ho̱ hʋchi okcha̱ya hoke;

⁶ Micha Chisʋs Klaist ibafohkit wakayʋchit, ʋba a holitopa puta pi binilichi tok oke;

⁷ Yohmi hosh himak a pilla ma Klaist Chisʋs pulla ho̱ pi̱ nukha̱klo tuk ʋt, isht i̱ kana chinto fehna ka isht otʋnincha chi̱ hatok.

⁸ Na yimmi kak osh isht i̱ kana pulla ho̱ hʋchi okcha̱ya hoke; yohmi kʋt ilʋppʋt hʋchishno na hʋsh ahni kak keyu, Chihowa na hʋch ima kak oke.

⁹ Nan toksʋli kak keyu, yʋmmak keyukma kʋna kia isht ilauata yoba ná.

¹⁰ Yʋmma im a toba hʋpia kʋt, nan toksʋli achukma isht il ahanta hi osh Klaist Chisʋs ak o̱ il a toba tok; yʋmma il ai itʋnowa hi o̱ Chihowa hʋt tikbanli apesa tok.

¹¹ Yʋmohmi ka nitak cha̱shpo ma haknip i̱ nuta yosh Chentail hʋchia ma, nipi hakshup tʋpa ibbak isht toba hohchifo yʋmmak okʋt hakshup ik tapo hʋchi hochifo hoke.

¹² Yohmi kʋt yʋmma foka mʋno Klaist ibafoyuka keyut, Islael okla ai achʋfa hʋsh ahalaia keyu, micha nan im issa tok isht it im ʋlhpisa hʋch ik ahalaio, aiokcha̱ya pisa he ahni ik im iksho, Chihowa ik ithano yosh yakní a̱ hʋsh ai asha tok.

¹³ Yohmi tok kia himak ano Chisʋs Klaist pulla hatuk mak o̱ hʋchishno ʋt ti̱kba mʋno hʋsh mishemanchi tuk ʋt, Chisʋs im issish o̱ isht hʋsh a bili̱ka kʋt hʋsh ithaiyanashke.

¹⁴ Yʋmmak osh pit i̱ nanaiyʋchi yosh, e tuklo ka achʋfa pikbi cha, holihta nan isht pit i̱ filʋmmichi yatuk a̱ ishit kanchi tok oke;

¹⁵ Yohmi kʋt nan isht it i̱ nukkilli nan isht ʋlhpisa yʋt im ʋlhpisa tok, haknip isht ilbʋsha cha, ishit kanchi tok: yohmi hosh tuklo ka hatak himona achʋfa il ai ikbi cha, it i̱ nanaiyʋcha chi̱ hatok:

¹⁶ Yohmi kʋt ititaiyukhʋna pulla ho̱ tuklo ka haknip achʋfa isht ikbit, yʋmmak o̱ it i̱ nukkilli tuk a̱ ai illichi cha, Chihowa ya̱ it i̱ kanʋcha chi̱ hatok:

¹⁷ Atuk osh mishemanchit hʋsh ai asha, micha bili̱ka ai asha aiena tuk a̱, anumpa isht it i̱ nanaiyʋchi isht anumpulit hʋchim a̱ya tok oke.

¹⁸ Yʋmmak atuk pulla ho̱ Shilombish achʋfa hosh pi anukfohkichi ho̱, il ita tuklo kʋt Ʋba I̱ki il im oho̱na hokʋt.

¹⁹ Yakeh! yohmi ka himak a pilla ma ik ahalaio okla inla yo̱ hʋchia keyu, amba ʋbanumpuli ibai okla, micha Chihowa in chuka chʋfa hʋchia hoke.

²⁰ Yohmi cha apostel, micha hopaii puta kʋt in tolahpi yokma, Chisʋs Klaist ak inli hosh noshkoboka chukbika tʋli yo̱, onʋtula hosh hʋsh it abana hoke.

²¹ Yʋmmak o̱ ai it abana iti fohka achukma kʋt, Chitokaka ibafoyukʋt tempel holitopa tobʋt isht ma̱ha̱ya hoke.

²² Yʋmmak o̱ hʋchishno ak kia hʋsh ai it abana cha, Chihowa im aboha imi Shilombish a foyuka hʋsh toba hoke.