Efeshan 1 - Chahta Holisso Holitopa 1886

Pal ʋt Efeshan okla pit ai okpʋchi, 1; 4 ʋbanumpuli ʋhleha hʋt yakni ʋt ik tobo ki̱sha mak o̱ ʋlhtahʋt Chihowa im ʋlla ʋhleha toba tok, 11 Klaist pulla ho̱ nan ai yukpa ai immi ha he im ʋlhpisa 13 Shilombish Holitopa yo̱ isht ai a̱hlit kʋllo; 17 mihmʋt Chitokaka Chisʋs Klaist im a holitopa ʋba ya̱ pisa hi mak o̱ ʋba anumpohonli.

¹ Pal, Chihowa nan ai ahni ha tuk pulla mak o̱ Chisʋs Klaist im apostel ʋt ʋbanumpuli a̱hli Efesʋs ai asha, micha Klaist Chisʋs i̱ yimmi aiena ka pit aiokpʋchishke.

² Pi̱ki Chihowa, micha Chitokaka Chisʋs Klaist ita tuklo nan isht i̱ kana, micha isht it i̱ nanaiya ita tuklo kʋt hʋchi anukfoyukashke.

³ Chihowa pin Chitokaka Chisʋs Klaist I̱ki, yʋmmak osh Chisʋs ak atuk mak o̱ ʋba nana ishit pi yukpahanli yʋt holitopashke:

⁴ Yohmi hosh yakni in tolahpi ʋt iksho pilla ma, Klaist a̱ a pi atokoli kʋt, i̱ hullot nan ai ashʋchi iksho, micha liteha iksho hosh yʋmma itikba il a̱ya he ak atok oke.

⁵ Yʋmohmi kak osh ʋlhpesa ahni pulla tuk mak osh, Chisʋs Klaist atuk mak o̱ ilap im ʋlla e toba he ak o̱, tik banli pi atokoli tok,

⁶ Yohmi kʋt isht i̱ kana chinto yʋt isht anno̱howa he, yʋmmak pulla ho̱ Holitopa achʋfa yʋmma a pi ahninchi tok.

⁷ Yʋmmak ash pulla im issish o̱ isht a pi ʋlhtoba mʋt, isht i̱ kana yʋt chinto pulla hatuk mak o̱ nan pim ai ashʋchi yʋt pi̱ kashofa hoke:

⁸ Yohmi kʋt hopoyuksa biekʋt im anukfila chinto hosh, isht i̱ kana yʋmma chitolechit pihi̱ma tok oke;

⁹ Yʋmihcha he il ai ahni tok ʋt ʋlhpiesa ahni pulla hosh, im anukfila luma hatok a̱ pim otʋninchi kʋt;

¹⁰ Yʋmmʋt nitak ʋt ont ai ʋlhpiesakma, nana puta ʋba ai asha, micha yakni pakna ai asha aiena ka itahobit achʋfalechit, Klaist yʋmma fehna ka i̱ nutakacha he ak atok:

¹¹ Yʋmmak inli pulla ho̱ il ai isha he ʋlhpesa e toba hi osh, ilap nan ahni bieka hosh nana moma ka yʋmihchi chatuk im anufila ho̱, tikbanli pi ʋlhtoka tok:

¹² Yohmi kʋt na ti̱kba Klaist a̱ il anukchieto tuk pishno ak o̱ im a holitopa yʋt a pi annoho̱wa chi̱ hatok.

¹³ Hʋchishno ak kia anumpa a̱hli ʋbanumpa isht hʋsh ai okcha̱ya hʋsh haklo hayʋt, yʋmmak ash hʋsh anukchieto tuk ak inli; hʋchi yimmi ha yosh, yʋmmak ash nana im ihi̱sa tok Shilombish Holitopa yʋmma isht hʋchim ai a̱hli tok,

¹⁴ Yʋmmak okʋt nana il ai isha he ʋlhpesa ka il isha he atokowa isht ʋlhpisa hosh ma̱ha̱ya tuk o̱ falaminchit chumpʋt a pim atahli tok a̱ il ishi na, yʋmma im a holitopa yʋt isht annoho̱wak mak a he oke.

¹⁵ Yʋmohmi ka ʋno yak kia Chitokaka Chisʋs a̱ hʋsh i̱ yimmi, micha ʋbanumpa yimmi a̱hli moma ka hʋsh i̱ hullo ka, haklo li hayʋt,

¹⁶ Yak oke ishit hʋchi ahni li kʋt, issa li keyu mʋt, micha anumpa ilbʋsha anumpuli likmʋt, isht hʋchi anohonli li hoke;

¹⁷ Yohmi ka pin Chitokaka Chisʋs Klaist in Chihowa, na holitopa puta I̱ki ʋt Shilombish isht a hopoyuksa, micha isht otʋninchi hʋch ima na yʋmma ithaiyanʋt hʋsh maha̱ya he;

¹⁸ Nan isht hʋsh anukfilli i̱ holhponayo yʋt in tohwikeli na, ai okcha̱ya hʋsh pihi̱sa hi o̱ hʋchi atokoli kʋt kaniohmi, micha ʋbanumpa yimmi a̱hli ya̱ isht a holitopa chinto il ai isha hi ʋt kaniohmi,

¹⁹ Micha ilap nan isht im ai a̱hli chinto a yʋmihchi kʋt, na yimmi ʋhleha pia ha̱ ilap nan isht im ai a̱hli chinto fehna ka isht pi̱ yʋmihi̱chi kʋt kaniohmi aiena ka, hʋsh a kostinincha he ak atuk oke.

²⁰ Yʋmmak ash o̱ yʋmihchi hosh, Klaist illi tuk a̱ falaminchit tanichit, ʋba a holitopa ilap ak inli ibbak isht impakimma yo̱ binilichit,

²¹ Hochitoka puta, nan ʋlhtoka puta, nan im ai a̱hli, nan i̱ shahli puta, micha na hohchifo moma yʋmmʋt yakni ilʋppa a hohchihi̱fo kak bano keyu, amba yakni yʋmmʋt ʋla chi̱ aiena ka i̱ shaiyahli yak oke:

²² Yohmi kʋt nana moma ka yʋmma iyi nutakʋchi, mihmʋt chʋch im ai achukma chi̱ ka nana moma i̱ noshkobo ha chi̱ ka atokoli tok,

²³ Yʋmmak ashot ilap haknip oke, ilʋppak osh kanima moma alotoli a̱ isht alota mak oke.