Chute 1 - Chahta Holisso Holitopa 1886

Nan ai yimmika ya̱ a kʋllot achunanchit hiela he im ahni, 1; 4 nan ithʋnanchi ik ai a̱hlo puta kʋt ib a chukowa he, yahmi kia yʋmmʋt ai ilbʋsha hi okʋto im ʋhltaha; 20 Chihowa anukfoyuka yokʋto shilombish holitopa apelachi pulla, mikmʋt ʋbanumpohonli aiena pulla hosh ilap a̱ okchalinchi cha, anonti inla na yoshubli isht a yoshuba tuk puta ma hlakoficha hi oke.

¹ Chute, Chisʋs Klaist in tishu, micha Chemis itibapishi hokʋt, I̱ki Chihowa ya̱, i̱ holitopa ʋhleha, micha okcha̱ya he ʋlhtoka tok; micha Chisʋs Klaist ak atuk pulla kak o̱ ai a̱hlit i̱ yimmit ma̱ha̱ya yʋmmak o̱ pit i̱ holissochi kʋt,

² Isht i̱ nukha̱klo yʋt hʋchimmi hashke, micha isht iti̱ nanaiya, micha nan i̱ hullo aiena kʋt hʋchin lauashke.

³ A̱ holitopa ʋhleha ma! nana ka achunanchi fehna hosh moma isht ai okcha̱ya yak o̱ pit hʋchi̱ holissochi la chi̱kmʋt, hʋchi holissochi li kʋt nana ka hʋchi atohnochi la he ʋm ʋlhpiesa he tuk: yohmi kʋt ʋbanumpa ai a̱hli yʋt himonna ma ʋbanumpuli ʋhleha hoka im anoho̱wa tok ak o̱ i̱ yimmi aia̱hlit hʋsh ma̱ha̱ya chi̱ kʋt yichina fehna hosh hʋsh hoho̱yashke.

⁴ Yohmi ka hatak kaniohmi hokʋt ik i̱ nuktahlo fehna ho̱ iba chukowa, yʋmmak okʋt nitak pilla kash o̱ nan ik achukmo ilʋppa ai yʋmohma he ʋt im ʋlhpihi̱sa tok: yʋmmʋt Chihowa holitobli keyu hokʋt, pin Chihowa isht i̱ kana ya̱ haui imma isht ai ihi̱kbi, micha yʋmmak illa hosh Chitokaka Chihowa, micha pi Okchalinchi Chisʋs Klaist ash o̱ ik holitoblo hoke.

⁵ Yʋmohmi ka Chitokaka yokʋt kanimihchit Echip yakni a̱ a kohchit okla ha̱ hlakofichi ha yʋt na yimma he keyu ʋhleha hokʋno ʋbit taiyahli tok; ilʋppa himonna ma hʋsh ithana hatuk ak inli kia, hʋsh ithaiyana he mak o̱ hʋchim ai ahni lishke.

⁶ Micha enchil ʋhleha hokʋt a toba ʋmmona tok ash inli ai ahanta keyu hosh, amba ilap ai ahanta kash issa tok puta hokʋno, ai okhlilika chinto tʋli itatakʋli isht talakchit bilia hosh nitak chinto nan ai ʋlhpisa ka ona he im ai ahni hoke.

⁷ Yohmi ka Sotom, Komolah, micha tʋmaha hochito auet i̱ bili̱ka aiena kash osh yʋmmak ash o̱ chiyuhmit, haui ai yʋmohmi fehna, micha haknip inla ho̱ asitia aiena tok ʋt nana ka isht ilbʋsha he otaiyani mak osh isht i̱ nukkilli luak bilia yo̱ isht ilbʋsha hoke.

⁸ Yʋmmak o̱ chiyuhmi hosh holhpokunna liteha ʋhleha ilʋppak kia haknip a̱ litehlit, nan i̱ shahli ya̱ kʋllakshichi, micha hatak nan ʋlhtoka holitopa he ʋlhpiesa kia nan isht ik ahobalot anumpuli hoke.

⁹ Yohmi kia Mikael, enchil mi̱ko yʋt nan isht ahullo okpulo ya̱ it im anumpuli kʋt, Moses, haknip imma yo̱ isht it im anumpunli kia, isht a hofahya he anumpa hoka mihachi kʋt nukshopa mʋt, amba Chitokaka yak osh chim olʋbashke, achi tok.

¹⁰ Amba ilʋppʋto nana yakohmi puta ka akostininchi keyu kʋt, nan isht ik ahobalot isht anumpulishke; yohmi kʋt nampoa im anukfila iksho yak i̱ chiyuhmit, haknip nan isht ai anushkunna ithana yʋmmak puta ho̱ isht il ai okpʋnit tahlishke.

¹¹ Yʋmmʋt i̱ palʋmmi mak oke; Ken nana a kaniohmi tok ak o̱ chiyuhmit itʋnowa hokʋt, micha nan isht ʋlhtoba yak o̱ bʋnna hosh Belam ʋt nan ashahanchi tok ak o̱ chiyuhmit, ai yimitʋt kʋniʋt yihlihimpa hatuk osh Koli ʋt i̱ sanalit anumpohonlit isht illi ha tok a̱ chiyuhmit isht ai okpulo tok.

¹² Ilʋppak okʋt iti̱ hullo impa hʋch ibai impakmʋt, na liteha ʋhleha yosh nukshopa kia ik im iksho hosh il impahanchi kʋt; hoshonti oka iksho yo̱ mahli puta kʋt kanima isht a̱ya; iti ʋni bʋshit, ʋni iksho puta, hitukla illi, akshish momʋt lobahli mak oke:

¹³ Okhʋta chito oka piakʋchit it ai ihi̱ssot, ilap isht ahofahya ya̱ pokpokit kohonchi; fochik yoshuba puta hoka ai okhlilika chinto yak osh yʋmmak okʋno immit bilia he im ʋlhpisa hoke.

¹⁴ Mihma Enok, Alʋm isht ai unchululi ont isht untuklo kak kia, anumpa ilʋppa tikbanli anohonli kʋt, Yakeh! Chitokaka yokʋt i̱ holitopa ʋhleha tahlepa sipokni pokoli ka ai itʋpehʋt ʋla kʋt.

¹⁵ Moyuma ka nan im apesʋt, Chihowa im antia he keyu yʋt Chihowa ik holitoblo hosh nan ai ʋlhpesa keyu puta yʋmohmit ai asha chatuk, micha nan ashʋchi Chihowa ik im antio ʋhleha hʋt ilap i̱ sanalit anumpa kʋllo anumpohonli chatuk aiena moyuma ka na palʋmmi ka onocha hi oke.

¹⁶ Ilʋppak okʋt ik ahninchot lumasit isht anumpuli ʋhleha hosh ilap chu̱kʋsh okpulo nan ahni kak o̱ iakaiya yoke; micha isht ilauata fehna anumpa puta ka itih ha̱ isht anumpohonli kʋt, ilap nan isht im achukma he, ahni kak osh, hatak nashuka puta ka ahninchi yoke.

¹⁷ Amba a̱ holitopa ʋhleha ma! hʋchishno yʋto pin Chitokaka Chisʋs Klaist im anumpeshi ʋhleha hʋt tikba kash anumpa isht hʋchim anumpohonli tok puta kak o̱ hʋsh ithaiyanashke:

¹⁸ Yohmi kʋt ont ai ishtaiyopit ma̱ha̱yakma, nan isht ik ahobalo ʋhleha hʋt Chihowa ik holitoblo hosh ilap chu̱ kʋsh okpulo nan ahni kak o̱ iakaiya hosh ai asha hi oka, hʋchim anohonli tok a̱ hʋsh ithaiyanashke.

¹⁹ Ilʋppak osh ʋbanumpuli iksa ai a̱hli ka il ai i̱ filʋmmichi kʋt, haknip nan ahni yo̱ iakaiya hosh, Shilombish Holitopa yʋt ik im iksho hoke.

²⁰ Amba a̱ holitopa hʋchishno yʋto, Shilombish Holitopa yʋt hʋchi anukfoyuka hosh anumpa ilbʋsha anumpohonlit, na hʋchi yimmi holitopa fehna kʋt hʋsh il ai a̱hlichashke;

²¹ Chihowa ya̱ hʋsh i̱ hullo kʋt hʋsh il achunanchi hosh, Chitokaka Chisʋs Klaist okʋt hʋchi nukha̱klo na aiokcha̱yʋt bilia ya̱ hʋsh ona chi̱ kʋt hʋsh hoho̱yashke.

²² Mikmʋt yakohmi hoka im ahnit, kaniohmi kʋno hʋshi̱ nukha̱klashke.

²³ Micha inla kʋno nukshoblit halʋllit, luak a̱ a kohchit hʋsh hlakofichi kʋt, na fohka haknip isht aliteha yak heno hʋsh i̱ yuwalashke.

²⁴ Yohmi ka yʋmmak osh hʋchi̱ halanli ho̱ ik hʋch ibetʋblo ka he, micha ilap ai o̱ binili holitompa itikba ya̱ anumpa ik achukmo hʋchi onʋtonla iksho nan isht il aiyukpa chinto ho̱ isht hʋchi ona hinla,

²⁵ Pi Okchalinchi Chihowa hopoyuksa kak bieka yʋmmak o̱ isht a holitopa, isht a chinto, micha isht a mi̱ko, micha nan isht ai a̱hli aiena kʋt himonasi, micha himak a pilla ka immit biliashke. Amen.