Choshua 9 - Chahta Holisso Holitopa 1886

¹ Atuk o̱ yakohmi tok, mi̱ko ʋhleha Chatan ola in tʋnnʋp, nʋnih foka, micha okfa foka, micha okhʋta chito ʋhli moma Lebanon i chapaka, Hitait okla, micha Amolait okla, Kenanait okla, Pelissait okla, Hifait okla, micha Chebusait okla aiena aiasha kʋt haklo mʋt;

² Choshua, micha Islael aiena ka itiba chi̱ hosh im anukfila achʋfa hosh iti hoyot itʋnaha tok.

³ Atuk o̱ Kibeon aiasha ʋt, Choshua ʋt Cheliko, micha Ai ita tuklo ka kaniohmichi tuk a̱ haklo mʋt,

⁴ I̱ kostinit okla im anukfila cha, okla inla im anumpa shali atuk ilahobit, bahta hlipa puta, micha oka pa̱ki kotoba sipokni hlilahlit ʋlhkʋta puta aiena ka issuba haksobish falaia ya̱ onochi tok.

⁵ Micha shulush sipokni ʋlhkʋta ishit hoyolo, micha nafohka sipokni isht foyuka tok: mikmʋt pʋska il atahli tuk moma kʋt shilʋt bokbokit taha tok.

⁶ Micha Choshua ya̱ im onʋt, Kilkal ʋlbina ha̱ ona cha, yʋmma, micha Islael hatak ʋhleha aiena ka, Yakni hopaki minti pia hoke: yʋmohmi hoka anumpa kʋllo ka hʋsh pit im apesashke, im achi tok.

⁷ Mihma Islael hatak ʋhleha hʋt Hifait ʋhleha hash, Pi ta̱kla hʋsh a̱sha yoba hatuk a̱, yohmi hokmʋno katiohmi kak osh anumpa e hʋch it im apesa cho? im achi tok.

⁸ Mihma Choshua ya̱, Chin tishu ʋhleha pia hoke, im achi tok. Mihma Choshua ʋt, Kʋta ho̱ hʋchia ho̱? micha katima yo̱ hʋsh minti cho? im achi tok.

⁹ Mihma, Yakni hopaki fehna ho̱ minti hosh Chitokaka chin Chihowa hohchifo pulla kak o̱, chin tishu ʋhleha hʋt ʋla hoke: Echip a̱ kaniohmihinchi tok puta kʋt annoa,

¹⁰ Micha Chatan mish‐tʋnnʋp Amolait okla i̱ mi̱ko tuklo, Heshbon i̱ mi̱ko Sihon, micha Bashan i̱ mi̱ko Ok Ashtalolh ʋtta aiena ka kaniohmichi tuk puta ka e haklo hatuk osh.

¹¹ Yʋmohmi ho̱ hatak pim asʋnonchi ʋhleha, micha pi̱ yakni ai asha ʋt pim anumpulit, Nowʋt hʋsh a̱ya chi̱ kʋt pinak oh ishi cha, iʋt ont afamʋt, Hʋchin tishu ʋhleha pia hoke, hʋsh im achashke, achi tok: yʋmohmi hoka himak a̱ anumpa kʋllo ka hʋsh pitim apesashke.

¹² Pʋska ilʋppa kohchʋt hʋchi afama chi̱ hosh e minti nitak ak osh lʋshpa moma ho̱ pin chuka ya̱ ai ishit e kohcha tok oke; yohmi tok kia yakeh! himak ano shilʋt bokbokit tahʋshke.

¹³ Oka pa̱ki i̱ kotoba puta ilʋppa il alotuli mʋno himona tok; atuk osh yakeh! hlilahlishke: micha pi̱ nafohka ilʋppa puta, micha pi̱ shulush puta aiena kʋt, hopaki fehna e nowa hatuk o̱ hlipʋt tahʋshke, okla im achi tok.

¹⁴ Mihma hatak ʋhleha hash osh i̱ pinak a̱ ai ishi cha, Chihowa itih ha̱ anumpa ik ai asilhho tok.

¹⁵ Mihma Choshua ʋt it i̱ nanaiya cha, okcha̱ya chi̱ ka, anumpa kʋllo itim apesa tok: mihma okla ha̱ i̱ holitompa ʋhleha hʋt anumpa kʋllo isht il im onochi tok.

¹⁶ Atuk o̱ yakohmi tok, anumpa itim apesa haya̱ nitak tuchina kʋt ont taha ma, in chuka abili̱ka yosh takla asha hatuk o̱, okla haklo tok.

¹⁷ Mihma Islael im ʋlla ʋhleha hʋt toshowʋt ia mʋt, nitak ont isht atuchina ho̱, in tʋmaha holihta puta ka ona tok. In tʋmaha holihta puta kʋt Kibeon, micha Chefilah, micha Beelolh, micha Kichalh‐chealim aiena kak atok.

¹⁸ Mihma okla i̱ holitompa ʋhleha hʋt Islael in Chitokaka Chihowa isht hochifot anumpa kʋllo isht il im onochi tuk pulla hatuk mak o, Islael im ʋlla ʋhleha hʋt issot ik kancho ki tok. Mihma okla moma kʋt holitompa ʋhleha hash i̱ sanalit anumpuli tok.

¹⁹ Yohmi kia holitompa ʋhleha hash osh okla moma ka, Islael in Chitokaka Chihowa isht hochifot anumpa kʋllo isht il im onochi tuk oke: yohmi kʋt himak a̱ e potola he keyu hoke.

²⁰ Ilʋppak o̱ e yʋmihchashke, ik okcha̱yá, il im ahnashke, anumpa kʋllo isht il im onochi tuk okʋt: keyukma nana palʋmmi kʋt pi onʋtola hinla hoke.

²¹ Micha holitompa ʋhleha hash osh, Ik okcha̱yá, holitompa ʋhleha hʋt i̱ miha tuk oka: amba okla moma ka iti in chanli, micha oka im ochi aiena kʋt tobashke, im achi tok.

²² Mihma Choshua ʋt i̱ howa cha, im anumpulit, Nanta katiohmi ho̱ pi takla hʋsh asha yokak osh, pi haksichit, Yakni hopaki ho̱ e minti, hʋsh achi tuk oh cho?

²³ Yʋmohmi hoka himak a̱ hʋchi kalakshi mak oke; micha achʋfa kia yuka hosh an Chihowa in chuka iti in chanli, micha oka im ochi aiena kʋt hʋsh kohcha he keyu hoke, achi tok.

²⁴ Mihma afalamichit Choshua ya̱, Chitokaka chin Chihowa ʋt in tishu Moses a̱ im apesʋt, yakni moma ka hʋch ima cha, okla chi tikba aiasha moma ka ʋbit tahla he miha tok a̱ chin tishu ʋhleha hʋt haha̱klo pulla ak atok: yohmi kak o̱ hʋchishno pulla kak o̱ pim ilhfiopak isht pi nukshopa fehna hatuk osh, ilʋppa e yʋmihchi tuk oke.

²⁵ Yʋmohmi ka himak a̱ yakeh! chibbak a̱ e foyukʋshke: ish pi kaniohmichi kak osh chim achukma, micha chim ʋlhpesa hinlakmʋt, ish yʋmihchashke, okla im achi tok.

²⁶ Micha yʋmmak o̱ yʋmihchi cha, Islael im ʋlla ʋhleha ibbak a̱ a hlakofichi na okla ik bo ki tok.

²⁷ Mihma Choshua ʋt nitak yʋmma okla ha̱, micha Chihowa im alta ya̱, kanima ho̱ ai ahnit im atokolikma, iti im a chanli, micha oka im ochi aiena ka ikbi tok o̱, himak nitak a̱ imoma hoke.