Choshua 8 - Chahta Holisso Holitopa 1886

¹ Yʋmohmi ma Chihowa ʋt, Choshua ya̱, Ik chi nukshopashke, micha chi chu̱kʋsh ik iello kashke; hatak tʋnʋp a̱ya ʋhleha ha̱ moma il ai eshit, wakayʋt, Ai ya̱ ish iashke: yakeh! i̱ mi̱ko, mikmʋt im okla ʋhleha, micha in tʋmaha holihta, mikmʋt i̱ yakni aiena ka chibbak a̱ fohki li hoke.

² Yohmi ka̱, Ai, mikmʋt i̱ mi̱ko Cheliko, mikmʋt i̱ mi̱ko aiena ka ish kaniohmichi tuk ʋt, yʋmmak inli ho̱ ish chohmicha chi̱ hoke: amba na wehpoa, micha wak aiena ak illa ak o̱ hʋchimmi ikbit hʋsh ishashke: tʋshka chipota ʋt im aiehcha chi̱ ka tʋmaha holihta im a̱shaka ya̱ ish ashachashke, im achi tok.

³ Yohmi ho̱ Choshua, micha hatak tʋnʋp a̱ya ʋhleha moma kʋt Ai ya̱ in tanampit ia tok: mihma Choshua ʋt hatak tʋnʋp a̱ya hlampko hochukma chilitʋt nukwia iksho tahlepa sipokni pokoli tuchina ho̱ atokolit ninak o̱ tihleli tok.

⁴ Yohmi mʋt nan i̱ mihʋt, Yakeh! tʋmaha holihta ya̱ im aiehchit, tʋmaha holihta im a̱shaka i̱ hopaki keyu ho̱, moyumʋt hʋchim ʋlhtahʋt hʋsh aiashashke.

⁵ Yohmikma ʋno, micha okla si apehʋt a̱ya tuk il aiena kʋt tʋmaha holihta ya̱ atikonofʋt e maha̱ya chi̱ hoke; atukma yakohma chi̱ hoke, ʋmmona tuk a̱ chohmit, okla pi afamʋt mintikma, il i̱ yihlepa chi̱ hoke.

⁶ (Kohchʋt piaka̱ya chi̱ hoka) i̱ yihlepʋt ma̱ha̱yʋt tʋmaha holihta ya̱ e kohchicha chi̱ hoke; Ʋmmona ak inli tuk a̱ chohmit, pi̱ yihlepʋshke, acha chi̱ hoka: yohmi hatuk o̱ il i̱ yihlepa chi̱ hoke.

⁷ Yohmikma tʋmaha holihta ya̱ im aiehchit hʋsh aiasha tuk ʋt, wakayʋt tʋmaha holihta ya̱ hʋsh ishashke; Chitokaka hʋchin Chihowa yʋt hʋch ibbak a̱ fohka chi̱ hoka.

⁸ Atukma yakohma chi̱ hoke, tʋmaha holihta ya̱ hʋsh ishikmʋt, Chihowa hʋt apihi̱sa tuk mak o̱ yʋmihchit luak isht hʋsh hukma chi̱ hoke: yakeh! hʋchim apesa lishke, achi tok.

⁹ Yʋmohmi hatuk osh Choshua ʋt yʋmmak ash pit tihleli tok; yohmi na aiehcha chi̱ hosh okla hʋt Ai i̱ hʋshi ai okatula imma Behlel, Ai itintakla ak o̱ aiasha tok: amba Choshua ʋto ninak yʋmma okla hak o̱ iba binachi tok.

¹⁰ Atuk osh Choshua ʋt onnahinli fehna tani cha, okla ha̱ hotihna tok; yohmi cha ilap ʋt Islael im asʋnonchi ʋhleha ita pi̱hʋt okla ha̱ itikba hielit Ai ya̱ ia tok.

¹¹ Mihma okla moyuma, hatak tʋnʋp a̱ya yʋmma apehʋt a̱ya atuk ʋt, momʋt ilhkolit, tikelit ma̱ha̱yʋt, tʋmaha holihta itikba ai ona mʋt, Ai i̱ falʋmmi imma yo̱ okla binachi tok: yohmi ka Ai itintakla ya̱ okfa hosh bachaya tok.

¹² Yʋmohmi mʋt hatak tahlepa sipokni tahlapi foka ho̱ ishi cha, aiehcha chi̱ ka Behlel, Ai itintakla tʋmaha holihta ya̱ i̱ hʋshi ai okatula imma ho̱ ont ashachi tok.

¹³ Yʋmohmi mʋt okla moyuma, tʋshka chipota ʋhleha tʋmaha holihta i̱ falʋmmi imma ai asha tuk, micha aiehchi tʋmaha holihta i̱ hʋshi ai okatula imma aiasha tuk aiena ka achukmalit kahpuli na im ʋlhtaha ma, Choshua ʋt ninak yʋmma okfa hash iklʋna ya̱ ona tok.

¹⁴ Atuk o̱ yakohmi tok, Ai i̱ mi̱ko ʋt yʋmma pisa mʋt, tushpʋt onnahinli fehna okla tani cha, tʋmaha holihta yʋmma hatak ʋhleha hʋt Islael itiba chi̱ hosh yʋmma, micha okla moyuma aiena kʋt hʋshí kanʋlli ʋlhpisa ont ai ʋlhpesa tukma, okfa hash itikba ai ona tok: yohmi kia tʋmaha holihta im ashaka ya̱ im aiehchi hosh aiasha ka, ik akostinincho hatok.

¹⁵ Mihma Choshua, Islael okla moyuma aiena kash osh ik alauecho ho̱ ile chohmichit, itikba yakni haiaka hina ya̱ pit ai yihlepa tok.

¹⁶ Mihma okla moyuma Ai aiasha tuk ʋt itʋnaha cha, yʋmma okla pit ahliyuha tok: yohmit Choshua ya̱ ahliyuha hosh tʋmaha holihta ya̱ akocha wiha tok.

¹⁷ Yohmi ka Islael okla ha̱ ik ahliyuho hosh Ai, Behlel kanima ka anta kʋt hatak achʋfa nana kia iksho ki tok: micha tʋmaha holihta pit tiwʋt talaia na Islael okla ha̱ ahliyuha tok.

¹⁸ Mihma Chihowa ʋt Choshua ya̱, Tʋli halupa ontʋla tʋbi chibbak fo̱ka ka Ai imma pit ish welashke; yʋmma chibbak a̱ fohki la chi̱ hoka, im achi tok. Mihma Choshua ʋt tʋli halupa ontʋla tʋbi ibbak fo̱ka hatuk a̱ tʋmaha holihta imma pit weli tok.

¹⁹ Yohmi ma im aiehchit aiasha tuk ʋt chekosi fehna kocha wihʋt, ibbak a̱ ʋba weli mak inli ho̱, yihlepʋt tʋmaha holihta ya̱ ont chukowʋt, ishi tok; micha tu̱shpʋt tʋmaha holihta yash hukmi tok.

²⁰ Yohmi tuk o̱ Ai okla hash osh filemʋt, im ashaka imma pit hopo̱koyo mʋt, yakeh! tʋmaha holihta yash osh shobullit ʋba pit hikia na pisa tok: yohmi cha ilʋppimma, keyukmʋt yʋmmimma kanima pit ai yihlepa hi ʋt iksho ki tok: yohmi ma okla yakni haiaka pit yihlepa tuk ash osh falamʋt, ahliyuhʋt ma̱ya tuk a̱ o̱ yihlepa tok.

²¹ Yohmi kʋt Choshua, micha Islael okla moyuma aiena kʋt, aiehchit a̱sha tuk ash osh tʋmaha holihta ya̱ ishi na, tʋmaha holihta yʋt shobullit ʋba pit hikia na pisa hatuk osh, filema cha, Ai hatak ʋhleha hash ʋbit tahli tok.

²² Mihma inla yash osh tʋmaha holihta ya̱ a kohchʋt o̱ yihlepa tok; yohmi hatuk o̱ Islael okla ha̱ iklʋna ka yo̱ hieli tok; yohmi ka kaniohmi kʋt ilʋppa in tʋnʋp ashakma, anonti kaniohmi kʋt yʋmma in tʋnnʋp asha tok: yohmi hatuk osh issot kanchi tok; yohmi cha achʋfa kia okchalinchit ik hlakofecho ki tok.

²³ Micha Ai i̱ mi̱ko ano okcha̱ya na okla ieshi cha, Choshua a̱ i̱sht im ona tok.

²⁴ Atuk o̱ yakohmi tok, Islael okla hʋt Ai okla ha̱, osapa, yakni haiaka aiena ai ahliyuhʋt isht a̱yʋt, yʋmma okla ai ʋbit tahli tok: yʋmmak ash osh bʋshpo falaia halupa ya̱ onʋtohonlʋt, momʋt illit taiyaha ma, Islael okla hash osh momʋt falamʋt Ai ya̱ ona cha, bʋshpo falaia halupa isht issot kanchi tok.

²⁵ Atuk o̱ yakohmi tok, hatak, micha ohoyo, aiena nitak yʋmma akakoha kʋt, momʋt tahlepa sipokni auah tuklo yʋmmʋt Ai okla moyuma tok.

²⁶ Choshua ʋt tʋli halupa ontʋla tʋbi ya̱ ibbak isht ieshit pit weli tuk ʋt, Ai okla ha̱ mominchit ʋbit ik tahlo hokʋto, ik isso tok oka.

²⁷ Yohmi ho̱ wak puta, micha tʋmaha holihta yʋmma na wehpoa aiena bano ho̱ Chihowa yʋt Choshua ya̱ nan i̱ miha tuk anumpa ha̱ iakaiya hosh Islael okla hʋt ilap immi ikbi tok.

²⁸ Mihma chiffo̱kot ai asha na bilia he mak o̱ Choshua ʋt Ai ya̱ hukmit kanchi tok: yohmi tok o̱ aiokpulokʋt kʋniʋt himak nitak a̱ ant ai ʋhlishke.

²⁹ Mihmʋt Ai i̱ mi̱ko ano nuksitelit iti a takalichi na takali na opia tok; atuk o̱ hʋshi ʋt okatula mak inli ho̱ yʋmma haknip a̱ iti ya̱ ai akʋchi cha, tʋmaha holihta ont a chukowa okhissa ont pila cha, yʋmma tʋli itʋnahachi chito ai ikbit hilecha chi̱ ka Choshua ʋt i̱ miha tok; yʋmmʋt hikia na himak nitak a̱ ant ai ʋhlishke.

³⁰ Yohmi ma Choshua ʋt Chitokaka Islael in Chihowa ya̱ nʋnih Ebal ak o̱ alta ya̱ im ai ikbi tok.

³¹ Yohmi ka Moses, Chihowa in tishu hʋt Islael im ʋlla ʋhleha ha̱ nan im apihi̱sa tok o̱, Moses i̱ nan ʋlhpisa holisso ha̱ a holihi̱so hatuk oka, Alta tʋli atushahli keyu, yʋmma hatak ʋt tʋli halupa nana kia onochi tuk keyu ho̱ isht ai ikbi tok: yohmi cha yʋmmak o̱ nan ʋbit Chihowa ya̱ isht aiokpʋchi om bohlit a hukmi cha; anonti isht aiokpʋchi isht it i̱ nanaiyʋchi aiena ka ai ʋbit okla aiasha tok.

³² Mihma Islael im ʋlla ʋhleha momʋt pi̱sa ho̱, Moses i̱ nan ʋlhpisa ya̱ tosholit tʋli atok ash o̱ a holissochi tok.

³³ Mihma Islael moma, micha im asʋnonchi ʋhleha, micha okla pehlichi ʋhleha, micha i̱ nan apesa ʋhleha aiena, micha hatak ik ithano ak kia iti takla ʋtta tok ak inli chohmit, itombi holitopa ya̱ ilʋppa in tʋnnʋp, micha yʋmma in tʋnnʋp Lefait ʋhleha naholitompa isht asha Chihowa nan it im apesa ʋt afoyuka itombi holitopa shoyuli itikba tahlala̱ka hieli tok; a moyuma hosh iklʋna kʋt Kelisim nʋnih i chapaka ya̱ hielikma, anonti iklʋna kʋt Ebal nʋnih i chapaka ya̱ hieli tok: yʋmohmi hosh Islael okla ha̱ yukpala hi o̱ Moses, Chihowa in tishu hʋt tikba ka im apihi̱sa tok mak o̱, yʋmohmi tok.

³⁴ Yohmi hayak o̱ nan ʋlhpisa anumpa puyuta, nan isht ai yukpa he, anonti isht ai i̱ palʋmma he aiena nan ʋlhpisa holisso ha̱ a holihi̱so tok a̱ it im anumpohonli tok.

³⁵ Islael okla moyuma, ohoyo, ʋlla chipunta, micha hatak inla yʋt yʋmma iba takla ma̱ya hatuk aiena itikba ya̱ Choshua ʋt, Moses ʋt nana im apihi̱sa tok moyuma ka anumpa achʋfa kia ik ai it im anumpulo ka iksho ki tok.