Choshua 7 - Chahta Holisso Holitopa 1886

¹ Yohmi kia Islael im ʋlla ʋhleha hʋt nan i̱ hullochi atuk a̱ isht ashʋchi tok: Chutah ishtatiaka Selah ha̱ ushi, Sabti ha̱ ushi, Kami ya̱ anonti ushi Achan ʋt nan i̱ hullochi atuk ash ishi tok: yohmi ho̱ Chihowa isht anukhobela yʋt libbit Islael im ʋlla ʋhleha ha̱ onʋtoyula tok.

² Mihma Choshua ʋt Cheliko ʋttʋt hatak kanohmi ha̱ Belh‐afen ichapaka, Behlel hʋshi a kohchaka imma Ai ya̱ tihlelit, im anumpulit, Hʋsh ia cha, yakni yʋmma ont hʋsh pisashke, im achi tok. Mihma hatak ash osh ia cha, Ai ya̱ ont pisa tok.

³ Atuk osh yʋmmak ash osh falamʋt Choshua ya̱ im ʋlʋt, Hatak moyuma hokʋto ik aiyo kashke, amba tahlepa sipokni tuklo, tuchina kanima hosh Ai ya̱ ont issot kanchashke: okla yʋmmʋt kanomosi hoka, hatak moma ka yʋmma pit tihlelit chik tikambicho kashke im achi tok.

⁴ Yohmi hatuk o̱ okla hash o̱ a kohchʋt hatak tahlepa sipokni tuchina foka hosh yʋmma pit ilhkoli tok: atuk osh Ai okla ha̱ ont i̱ yihlepa tok.

⁵ Mihma Ai okla hash osh pokoli tuchina akucha hannali foka ho̱ ai ʋbi tok: holihta okhissa itikba a hliolit isht ia mʋt, Shebalim a̱ isht ona hatuk osh takla ya̱ okʋtahʋt ia ka ai issot kanchi tok: yohmi hatuk o̱ okla chu̱kʋsh ʋt bilʋt oka yo̱ chiyuhmi tok.

⁶ Mihma Choshua ʋt i̱ nafohka ya̱ ita hlilʋffi cha, aka pit itulʋt Chihowa im itombi holitopa itikba ya̱ ilap, micha Islael okla im asʋnonchi ʋhleha aiena kʋt hlipkʋchit ma̱ya na opia tok: mihmʋt noshkobo ha̱ lukfi pushi okla o̱ fohopli tok.

⁷ Mihmʋt Choshua ash osh, Ikikkeh! Chitokaka Chihowa ma! nanta katiohmi ho̱ Amolait ʋhleha ibbak a̱ ish pi fohki na pi mosholicha chi̱ ka, okla ilʋppa Chatan a̱ ant ish pi tanʋblichi tuk oh cho? pim ʋlhpesa cha, Chatan mishtʋnʋp mak inli ho̱ il ai asha hatuk okbano!

⁸ Chihowa ma! Islael okla hʋt in tʋnʋp ʋhleha ha̱ nʋli ak o̱ i̱ filihi̱mi ka, nanta hak o̱ miha la chi̱ cho?

⁹ Kenanait ʋhleha, micha yakni ilʋppa hatak aiasha moma kʋt hakla chi̱ hoke; yohmi cha pi afolublit, pi̱ hohchifo ha̱ yakni paknaka ilʋppa a tʋblit kancha chi̱ hoke: yohmikma chi̱ hohchifo chinto ka nanta ho̱ ish i̱ katiohmicha chi̱ cho? achi tok.

¹⁰ Mihma Chihowa yʋt Choshua ya̱, Ish tanashke; nanta katiohmi ho̱ yakohmit ish hlipia cho?

¹¹ Islael ʋt nan ashʋchishke, yohmi cha yʋmmʋt, nana it im apesa im apehi̱sa li tok a̱ kobʋffi aiena tuk oke: nan i̱ hullochi atuk ash yʋmmak fehna ishi hokʋt: micha hu̱kopa aiena tuk; micha holabi aiena tuk; micha yʋmmʋt yʋmmak ash i̱ na chukushpa fehna iba fohkit bohli tuk oke.

¹² Yohmi kak o̱ Islael im ʋlla ʋhleha hʋt in tʋnʋp ʋhleha itikba ya̱ hiela he keyu hosh, amba in tʋnʋp ʋhleha itikba ya̱ nʋli ak o̱ i̱ filihi̱mishke, Chihowa im ai i̱ nukkilli ʋt onʋtoyula hatuk oka: yohmi ka nan i̱ hullochi atuk ash ishi tuk ilʋppak ash o̱ okpʋnit ai ile kohchit hʋsh kanchi keyukma, hʋchi awant a̱ya la he keyushke.

¹³ Wakayʋt, okla ha̱ ish hullochashke; micha onna takla ka hʋsh ile hullochashke; Islael in Chitokaka Chihowa ʋt yakohmichit anumpulishke, Islael chia ma! nan i̱ hullochi atuk ʋt hʋch itintakla takalishke: yohmi hoka nan i̱ hullochi tuk ash ilʋppa ai ile kohchit hʋsh kanchi keyukmʋt, hʋchin tʋnʋp ʋhleha itikba ya̱ hʋsh hiela he keyushke, ish achashke.

¹⁴ Yʋmohmi hoka onnahinlikma ai unchololi hʋsh ai achʋfa aiyukali yak osh iti hoyo hosh ahanlashke; atukma yakohma chi̱ hoke, ai unchololi kanima ho̱ Chihowa yʋt ishi hokma, yʋmmʋt ai unchololi itakʋshkoa ak o̱ iti hoyo hosh ahanlashke, atukma ai unchololi itakʋshkoa kanima ho̱ Chihowa yʋt ishi hokma, yʋmmʋt chuka achʋfa ak o̱ iti hoyo hosh ahanlashke; atukma chuka achʋfa kanima ho̱ Chihowa yʋt ishi hokma, yʋmmʋt hatak achʋfa aiyukali hosh ahanlashke.

¹⁵ Atukma yakohma chi̱ hoke, kanima hosh nan i̱ hullochi atuk ash i̱shit otʋni hokmʋt, ilap, micha nana im asha tuk moma kʋt luak isht luashke: yohmi kʋt Chihowa nan it im apesa ya̱ kobʋffi, micha Islael a̱ nana ik aiʋlhpeso ai yʋmohmi aiena hokʋt yʋmohmashke, im achi tok.

¹⁶ Yohmi hatuk o̱ Choshua ʋt onnahinli fehna tani cha, Islael okla hash ishtatiaka aiyukali yak o̱ itahobi tok; yohmi ma Chutah ishtatiaka yak osh ʋlhtoka tok.

¹⁷ Yohmi ma Chutah isht atiaka itakʋshkoa puta kak o̱ itahobi tok: yohmi ma Saha isht atiaka yak o̱ atokoli tok; yohmi ma Saha ishtatiaka hatak achʋfa aiyukali ho̱ itahobi tok; mihma Sabti ak osh ʋlhtoka tok.

¹⁸ Yohmi ma yʋmma in chuka achʋfa ya̱ hatak achʋfa aiyukali ho̱ itahobi tok; yohmi ma Chutah ishtatiaka Selah ya̱ ushi, Sabti ya̱ ushi, Kami ya̱ ushi, Achan ak osh ʋlhtoka tok.

¹⁹ Mihma Choshua ʋt Achan a̱ Sʋso ma! Islael in Chitokaka Chihowa ya̱ ish holitoblichi cha, ish il im anolashke, chim asilhha lishke: yohmi hoka nana ish kaniohmi tuk okʋt chik san luhmo hosh, is sʋm anolashke, im achi tok.

²⁰ Mihma Achan ash osh afalamichit Choshua ya̱, Islael in Chitokaka Chihowa ya̱ im ashʋchi li tuk o̱ mʋhlishke, yohmi kʋt nana ka ilʋppak o̱, anonti ilʋppak o̱ yʋmohmi li tuk oke.

²¹ Na wehpoa ititakla ya̱ Babulon nafohka achukma fehna, micha tʋli hʋta shekel tahlepa tuklo, mikmʋt tʋli holissso lakna hohli ohmi hosh weki shekel pokoli tahlapi aiena hosh kahʋt ma̱ya na pisa li mʋt, anushkunna lish, ishi li tuk oke: yohmi tuk o̱ yakeh! yakni anu̱kaka luma hosh ʋm ʋlhtipo iklʋna ya̱ chi̱yakma tʋli hʋta yʋt nutaka itonlʋshke, im achi tok.

²² Yohmi ma Choshua ʋt hatak atokolit tihleli tok; yohmi na yihlepʋt ʋlhtipo ya̱ ai ona ma, yakeh! yʋmmak ash osh im ʋlhtipo luma hosh itonla ma, tʋli hʋta yʋt nuta ya̱ itonla tok.

²³ Mihma yʋmmak ash ʋlhtipo ya̱ okla ai ishit kohchʋt, Choshua, micha Islael im ʋlla ʋhleha moma ka isht im onʋt, Chihowa itikba ya̱ ont ashachi tok.

²⁴ Mihma Choshua ʋt, Islael okla moma kʋt api̱ha ho̱, Achan, Selah ushi ash, mikmʋt tʋli hʋta, micha nafohka, micha tʋli holisso lakna hohli ohmi kash aiena, mikmʋt ushi ʋhleha, micha ushetik ʋhleha, micha i̱ wak, micha issuba haksobish falaia puta, micha in chukfi, mikmʋt im ʋlhtipo, micha nana im a̱sha tuk moma aiena ka okla ishi cha, yʋmmak ash Acho okfa ha̱ okla isht ona tok.

²⁵ Yohmi ma Choshua ʋt, Nanta katiohmi ho̱ ish pilbʋshali tuk oh cho? himak nitak a̱ Chihowa yak osh chishno ma chilbʋshala chi̱ hoke, achi tok. Mihma Islael okla hʋt momʋt tʋli isht boli tok: yohmi cha tʋli isht bolit okla issa hayʋt, luak isht hukmi tok.

²⁶ Yohmi mʋt tʋli itʋnaha chito fehna ho̱ isht ompohomot hilechi tok o̱, himak nitak kia hikiʋshke. Yohmi ho̱ Chihowa im ai i̱ nukkilli libbi fehna tuk ʋt ai i̱ filʋmmi tok: yʋmohmi hatuk o̱ yakni yʋmmʋt himak nitak ant ai ʋhlika Acho okfa hohchihi̱foshke.