Choshua 5 - Chahta Holisso Holitopa 1886

¹ Atuk o̱ yakohmi tok, Amolait okla i̱ mi̱ko ʋhleha Chatan hʋshi ai okatula imma aiasha tuk, micha Kenanait okla i̱ mi̱ko ʋhleha okhʋta lapalika ai asha tuk aiena kʋt, Chihowa ʋt Chatan oka ya̱ Islael im ʋlla ʋhleha itikba ya̱ a shilelit tahli na tanʋblit e taha tuk a̱ haklo mʋt, chu̱kʋsh ʋt bihinla tok; micha Islael im ʋlla ʋhleha hak a tok pulla mak o̱ himmakma hatak nana kia chilitʋt im anukfila kʋt iksho kamohmi tok.

² Nitak yʋmmak fehna ma Chihowa yʋt Choshua ya̱, Bʋshpo halupa hochukma ho̱ ish ikbashke; yohmi cha Islael im ʋlla ʋhleha ha̱ anonti atuklanchit hakshup ish tʋptulashke, im achi tok.

³ Yohmi ho̱ Choshua ʋt bʋshpo halupa hochukma ka ikbi cha, Islael im ʋlla ʋhleha ha̱ hakshup tʋptuli kʋt bokko ak o̱ ont ai ʋhlichi hosh tʋptuli tok.

⁴ Yakohmi kak o̱ Choshua ʋt hakshup tʋptuli tok: Hatak puta kʋt nakni, hatak tʋnʋp a̱ya ʋlhpesa hosh Echip a̱ a kohcha tok okʋto, Echip akohcha hayʋt yakni haiaka itʋnoho̱wa kʋt, illit taha tok.

⁵ Yohmi ka hatak puta Echip a̱ a kohcha tok okʋto hakshʋp tʋptua bano tok; amba Echip a̱ a kohcha hayosh yakni haiaka itʋnoho̱wa ho̱ ʋtta tok yʋmmak okʋno hakshup ik tʋptulo ki̱sha tuk atok.

⁶ Islael im ʋlla ʋhleha hʋt yakni haiaka itʋnoho̱wa na afʋmmi pokoli ushta tok; yohmi na hatak puta, hatak tʋnʋp a̱ya ʋlhpesa hosh Echip a̱ a kohcha tuk ʋt Chihowa im anumpa ha̱ im antia keyu hatuk osh ai iksho ki tok: yakni pishukchi, foi bila aiena bieka ai yanahanli ho̱ pima hi osh i̱ki ʋhleha ha̱ anumpa kʋllo isht il im onochi tok ʋt yʋmma puta hokʋno yakni yʋmma i̱ haiakʋcha he keyu kʋt anumpa kʋllo il onochi tok okʋt.

⁷ Yʋmohmi hatuk osh yʋmma im ʋlla ʋhleha atobbichit hiohlichi kak o̱, Choshua ʋt hakshup tʋptuli tok: takla mihinti kʋt hakshup tʋptuli keyu hatuk o̱, hakshup ik tʋptuo hatuk oke.

⁸ Atuk o̱ yakohmi tok, okla puta ka hakshup tʋptulit okla tahli ma, im ʋlbina aiyukali aiashʋt okla hlakofit in taha tok.

⁹ Mihma Chihowa ʋt Choshua ya̱, Himak nitak ak o̱ Echip isht ahofahya ya̱ hʋchi̱ filʋmmichit kanima pit tonullichi lishke, im achi tok. Yohmi hatuk o̱ yakni yʋmmʋt Kilkal hohchifo na himak nitak a̱ ant ai ʋhli hoke.

¹⁰ Mihma Islael im ʋlla ʋhleha hʋt Cheliko yakni matali Kilkal ak o̱ binanchit ai ashʋt, hʋshi nitak ont auah ushta opiaka yo̱ ʋbanʋblit ont ia ya̱ holitoblit aiasha tok.

¹¹ Mihmʋt ʋbanʋblit ontia ya̱ holitoblit aiasha tuk ont onna ma, onush yakni yʋmma a waya tuk a̱ ʋpʋt ai asha tok; nitak yʋmmak fehna ak o̱ pʋska ik shatʋmmo, micha onush ʋlwʋsha aiena ka ʋpa tok.

¹² Yakni yʋmma onush a waya okla ʋpa tuk ont onna kak o̱, manna ʋt a̱yʋt issa tok; yohmi na i̱ himmak ma Islael im ʋlla ʋhleha hʋt manna ik im iksho ki tok; amba afʋmmi yʋmma Kenan yakni nan a waya kak o̱ ʋpʋt ai asha tok.

¹³ Atuk o̱ yakohmi tok, Choshua ʋt Cheliko lapali ka hikiʋt, ʋba chakalit hopo̱koyo mʋt, i chapaka ya̱ hatak ʋt bʋshpo falaia shu̱fit ieshi hosh hikia na pit pisa tok: mihma Choshua ʋt im ona cha, Pishno ak o̱ pibai achʋfa chia hokmá, keyukmʋt pin tʋnʋp ak o̱ ibaiachʋfa chia hokmá, nanta cho? im achi tok.

¹⁴ Mihma yʋmmak ash osh, Keyú, amba Chihowa in tʋshka ʋhleha hak o̱ i̱ kʋpitʋni sia hosh a̱yʋt himak a̱ ʋla li hoke, im achi tok. Mihma Choshua ʋt aka pit hlipia cha, ai okpʋchi tok; mihmʋt, A̱ shahli hʋt in tishu ha̱ nanta ho̱ im achi cho? im achi tok.

¹⁵ Mihma Chihowa in tʋshka ʋhleha ha̱ i̱ kʋpitʋni hash osh Choshua ya̱, Yakni yʋmma ish ai o̱ hikia kʋt holitopa hoka, chi̱ shulush a̱ ish shu̱fashke, im achi tok: mihma Choshua ʋt yʋmohmi tok.