Choshua 4 - Chahta Holisso Holitopa 1886

¹ Atuk o̱ yakohmi tok, okla hash osh momʋt Chatan a̱ a hlopullit taiyaha ma, Chihowa hʋt Choshua ya̱ im anumpulit,

² Okla ha̱ hatak auah tuklo ho̱ ish ai atokolashke, yohmi kʋt Islael ai unchololi achʋfa ka hatak achʋfa ho̱ ish ai atokolashke.

³ Yohmi cha im apesʋt, Chatan iklʋna na holitompa isht asha iyi yʋt kʋllot a hieli tuk fehna, tʋli auah tuklo ho̱ hʋsh ai ishashke; yohmi cha yʋmma ishit hʋsh a̱ya tuk osh, himak ninak a̱ hʋsh a nusa chi̱ ka ʋlbina ha̱ hʋsh ashachashke, ish im achashke, im achi tok.

⁴ Mihma Choshua ʋt hatak auah tuklo Islael im ʋlla ʋhleha ha̱ ai unchololi achʋfakma, hatak achʋfa ai atokoli tuk ʋt, i̱ howʋt it ahobi cha;

⁵ Choshua ʋt Chitokaka hʋchin Chihowa im itombi holitopa yash itikba iʋt Chatan iklʋna ai onʋt, Islael im ʋlla ʋhleha isht atiaka auah tuklo ka ʋlhpi̱sa ho̱, tʋli achʋfa aiyukali ka ishit hʋchi tahchi ya̱ onochit hʋsh shoyulashke.

⁶ Yohmi na ilʋppak osh nan isht atokowa yʋt hʋch itin takla ya̱ itoyulashke; yohmi tuk o̱ himak a pilla kia hʋchim ʋlla ʋt i̱ki ʋhleha ha̱ i̱ ponaklot, Tʋli ilʋppak o̱ nanta ho̱ isht hʋsh apesa hoh cho? achi hokma,

⁷ Afalamichit, Chihowa nan it im apesa ʋt afoyuka itombi holitopa itikba ya̱ Chatan oka yʋt hokofa tok; yʋmmʋt Chatan a̱ tanʋbli ma, Chatan oka yʋt hokofa tok a̱ hʋsh im achashke; yohmi na tʋli ilʋppak o̱ Islael im ʋlla ʋhleha hʋt isht ithana na bilia hi oke, im achi tok.

⁸ Mihma Islael im ʋlla ʋhleha hʋt, Choshua ʋt nan im apesa tuk mak o̱ ai yʋmohmi tok; micha yohma chi̱ Chihowa ʋt Choshua ya̱ im anumpuli hatuk oka, tʋli auah tuklo Islael im ʋlla ʋhleha isht atiaka holhtina ka ʋlhpi̱sa ho̱, Chatan iklʋna ya̱ ont ai ishit, isht a̱yʋt abinachi ya̱ isht onʋt, aka kahpuli tok.

⁹ Mihma Choshua ʋt Chatan iklʋna na holitompa isht asha Chihowa nan it im apesa ʋt afoyuka itombi holitopa shoyuli iyi yʋt a hieli tuk a̱ tʋli auah tuklo ho̱ hiohlichi tok: yohmi tok o̱ himak nitak kia yʋmma aiashʋshke.

¹⁰ Na holitompa isht asha itombi holitopa yash shoyuli hatuk ʋt Chatan iklʋna ya̱ hieli na, Chihowa ʋt nana im apesa ho̱ Choshua ʋt okla ha̱ im anumpohonli tuk a̱ ont ʋlhtaha tok; yʋmmʋt Moses ʋt Choshua i̱ miha tok mak atok; yohmi ho̱ okla hʋt tu̱shpʋt tanʋbli tok.

¹¹ Atuk o̱ yakohmi tok, okla hʋt momʋt tanʋblit taiyaha ma, okla hʋt pi̱sa ho̱, Chihowa im itombi holitopa, micha na holitompa isht asha aiena kʋt tanʋbli tok.

¹² Moses it im anumpuli tok mak o̱ Luben im ʋlla ʋhleha, micha Kat im ʋlla ʋhleha, micha Manasseh ishtatiaka iklʋna aiena kʋt na halupa im ʋlhtaha hosh Islael im ʋlla ʋhleha hʋt pi̱sa ho̱, tanʋbli tok;

¹³ Tahlepa sipokni pokoli ushta foka hosh na halupa im ʋlhtahʋt tanampa chi̱ hosh Chihowa itikba ya̱ tanʋblit, Cheliko yakni matali ya̱ ona tok.

¹⁴ Nitak yʋmmak fehna ak o̱ Chihowa ʋt Choshua ya̱ Islael moma itikba a holitoblichi tok; yohmi na yʋmmak ash osh nitak okcha̱yʋt ahanta ont ai ʋhlika, Moses a̱ okla holitobli beka tuk ʋt chohmit okla holitobli beka tok.

¹⁵ Mihma Chihowa ʋt Choshua ya̱ im anumpulit,

¹⁶ Na holitompa isht asha nan isht atokowa itombi holitopa yash shoyuli tuk ʋt, Chatan a̱ okla auet a kohcha chi̱ ho̱ ish i̱ mihashke, achi tok.

¹⁷ Yʋmohmi hatuk o̱ Choshua ʋt naholitompa isht asha i̱ mihʋt, Chatan a̱ auet hʋsh a kohchashke, achi tok.

¹⁸ Atuk o̱ yakohmi tok, na holitompa isht asha Chihowa nan it im apesa ʋt afoyuka itombi holitopa shoyuli hatuk ʋt, Chatan iklʋna ya̱ lokolit auet akohcha cha, naholitompa isht asha iyi pʋtha yʋt yakni shila ont o̱ hika mak inli ho̱, Chatan oka yʋt ata̱ya yatuk a̱ falamʋt auet fohkʋt sakti a̱ atabli tuk ʋt moma tok.

¹⁹ Mihma hʋshi isht ia ʋmmona nitak ont ishit pokoli fehna ak o̱ okla hash osh Chatan a̱ auet a kohcha cha, Cheliko yakni hʋshi akochaka imma ʋhli Kilkal a̱ ont binanchi tok.

²⁰ Mihma tʋli auah tuklo Chatan ai ishi tuk yʋmmak ash Choshua ʋt Kilkal ak o̱ itʋbʋnit hilechi tok.

²¹ Yohmi cha Islael im ʋlla ʋhleha ha̱ im anumpulit, Himak a pilla ma hʋchim ʋlla ʋhleha hʋt i̱ki ʋhleha ha̱ i̱ ponaklot, Tʋli ilʋppʋt nanta ho̱ isht ʋlhpisa hoh cho? achi hokma,

²² Islael im ʋlla ʋhleha hʋt yakni shila yo̱ Chatan ilʋppa a tanʋbli tok a̱ im anolit hʋsh ithʋnanchashke.

²³ Chitokaka hʋchin Chihowa ʋt Okhʋta Humma ya̱ pi tikba a̱ shilelit tahli na ont il ia tok a̱ chohmichit Chitokaka hʋchin Chihowa ʋt Chatan oka ya̱ hʋchi tikba a shilelit tahli na tanʋblit hʋsh taha tuk okʋt.

²⁴ Yohmi na yakni moma hatak aiasha kʋt Chihowa ibbak ʋt kʋllo kʋt nana moma i̱ shahli ka ithaiyana chi̱ hatok; yohmi na Chitokaka hʋchin Chihowa ya̱ hʋsh holitobli na bilia hi atok.