Choshua 3 - Chahta Holisso Holitopa 1886

¹ Mihma Choshua ʋt onnahinli fehna tani cha, ilap, mikmʋt Islael im ʋlla ʋhleha moyumʋt Shittim a̱ ashʋt toshowʋt ia hosh Chatan a̱ ona cha, ik tanʋblo hosh yʋmmak o̱ a nusi tok.

² Atuk o̱ yakohmi tok, yʋmma chi̱ya na nitak tuchina ka ona ma, okla pehlichi ʋhleha hʋt ʋlbina ha̱ hlopullit a̱yʋt,

³ Okla ha̱ im anumpulit, Kaniohmi foka ho̱ Chitokaka hʋchin Chihowa nan it im apesa ʋt afoyuka itombi holitopa ya̱ Lefait ʋhleha, na holitompa isht asha yʋt shoyulit itʋnowa na hʋsh pisakmʋt, ilʋppa a toshowʋt yʋmmak o̱ hʋsh iakaiyashke.

⁴ Yohmi akinli kia yʋmma ai itintakla ka haiaka kʋt kubit ʋlhpisa tahlepa sipokni tuklo hosh takalashke: ont atikkonofʋt hʋch ik aiyo kashke, yohmi hosh hʋsh atia hetuk ʋt hʋsh ithana hosh hʋsh itʋnoho̱washke; tikba ka ilʋppa hʋsh a̱ya chatuk keyu hokʋt, achi tok.

⁵ Mihma Choshua ʋt okla ha, Hʋsh ile hullochashke: onnaha ya̱ Chihowa ʋt hʋchim ai ititakla na fehna ha̱ ai yʋmihcha chi̱ hoka, im achi tok.

⁶ Mihma Choshua ʋt na holitompa isht asha ya̱ im anumpulit, Nan it im apesa ʋt afoyuka itombi holitopa ya̱ hʋsh ishi cha, okla ha̱ itikba iʋt hʋsh tanʋblashke, im achi tok. Mihma nan it im apesa ʋt afoyuka itombi holitopa yash okla ishi cha, okla ha̱ itikba ia tok.

⁷ Mihma Chihowa ʋt Choshua ya̱ Himak nitak ak o̱ Islael im ʋlla moyuma itikba ya̱ chi holitoblichit isht ia la chi̱ hoke; yohmi ho̱ Moses a̱ awant a̱ya li tok ʋt, anonti chishno ma chi awant a̱ya la chi̱ ka, okla hʋt ithanashke.

⁸ Yohmi ka na holitompa isht asha nan it im apesa ʋt afoyuka itombi holitopa shoyuli tuk a̱ i̱ mihʋt, Chatan okhina ontalaka fehna hʋsh onakmʋt, yʋmmak inli ho̱ hʋsh hielashke, ish im achashke, im achi tok.

⁹ Mihma Choshua ʋt Islael im ʋlla ʋhleha ha̱, Ilʋppa hʋsh minti cha, Chitokaka hʋchin Chihowa im anumpa ha̱ hʋsh haklashke, im achi tok.

¹⁰ Mihmʋt Choshua ʋt Ilʋppa yakohmi kak o̱ Chihowa okcha̱ya yʋt hʋch ibatakla ahanta cha, nana ka ik ai onancho keyu hosh Kenanait ʋhleha micha Hitait ʋhleha, micha Pelesait ʋhleha micha Kikashait ʋhleha, micha Amolait ʋhleha, mikmʋt Chebusait ʋhleha aiena ka hʋchi tikba ya̱ tihlelit kocha wehla chi̱ ka isht hʋsh ithaiyana chi̱ hoke.

¹¹ Yakeh! yakni moma in Chihowa nan it im apesa ʋt afoyuka itombi holitopa ʋt tanʋbla chi̱ hosh hʋchi tikba Chatan a̱ ont oka hikʋshke.

¹² Yohmi hoka himak a̱ hatak auah tuklo ho̱ Islael ai unchololi auah tuklo ka ish ai atokolashke; yohmi ka isht atiaka achʋfa ka hatak achʋfa hosh iashke.

¹³ Atukma yakohma chi̱ hoke, na holitompa isht asha Chihowa, yakni moma in Chihowa im itombi holitopa shoyuli hatuk iyi pʋtha yʋt Chatan okhina ya̱ oka hika mak inli ho̱, Chatan oka yʋt ita hokofa na, oka ibetʋp imma minti hatuk ʋt itʋnahachit hikia chi̱ hoke, achi tok.

¹⁴ Atuk o̱ yakohmi tok, okla hʋt Chatan tanʋbla chi̱ hosh binah ha̱ asht ia hosh, naholitompa isht asha yʋt nan it im apesa ʋt afoyuka itombi holitopa shoyuli hosh okla itikba hieli hosh itʋnowa;

¹⁵ Atuk osh itombi holitopa yash shoyuli tuk ʋt Chatan ona cha, na holitompa isht asha iyi pʋtha yʋt oka ʋhli ont oka hika mak inli ho̱, (Chatan ʋt onush ʋlmo ai ʋlhpesa ai itintakla ka bok sakti atabli beka yatuk okʋt,)

¹⁶ Oka ibetʋp imma minti hatuk ʋt yokopa cha, itʋnahachit falamʋt hopakichit, Alam tʋmaha holihta Saletan bili̱ka talaia ka ona tok: yohmikma yakni patali okhʋta hʋpi okhʋta imma ia hatuk ʋt tahʋt hokofa na okla hʋt Cheliko ichapaka fehna hak o̱ a hlopulli tok.

¹⁷ Mihma na holitompa isht asha Chihowa nan it im apesa ʋt afoyuka itombi holitopa shoyuli hatuk ʋt Chatan iklʋna ya̱ kʋllot hieli na, Islael okla moyumʋt yakni shila ho̱ tanʋblit, okla moyumʋt Chatan a̱ ont hlopullit taha tok.