Choshua 24 - Chahta Holisso Holitopa 1886

¹ Mihma Choshua ʋt Islael apehlichi moma ka hoyot Shechem a̱ ai itʋnahli cha, Islael im asʋnonchi puta, micha i̱ noshkoboka puta, micha i̱ nan apesa ʋhleha, micha okla pehlichi ʋhleha moma ka hoyo tok; mihma Chihowa itikba ya̱ hieli tok.

² Mihma Choshua ʋt okla moma ka, Islael in Chihowa Chitokaka yʋt ilʋppak o̱ achishke, Hʋch i̱ki ʋhleha, Telah Eblaham i̱ki, Naho i̱ki aiena kʋt okhina mish tʋnnʋp ak o̱ ai asha tok: micha naholbʋt toba puta ai okpʋchi tok oke.

³ Mihma hʋch i̱ki Eblaham a̱ okhina mish tʋnnʋp a̱ ai ishit, ilauelit a̱yʋt Kenan yakni moma ka hlopullichit isht a̱ya li tok; micha im ishtatiaka ya̱ apaknʋchit Aisaak a̱ ima li tok.

⁴ Micha Aisaak a̱ Chekob, micha Esau ita tuklo ka ima li tok: micha Esau ya̱ Sei nʋnih hak o̱ immi ha chi̱ ho̱ ima li tok, amba Chekob, micha im ʋlla ʋhleha aiena kʋt Echip ak o̱ ona tok.

⁵ Moses, micha Alon ak kia hʋchi̱ pila li tok; micha Echip a̱ nana palʋmmi onochit, nana ka ititakla a yʋmihinchi li tok; atuk osh i̱ himmakma, hʋchi pehlichit, kohcha li tok oke.

⁶ Micha hʋch i̱ki ʋhleha ha̱ pehlichit Echip a̱ kohcha li tok oke: mihma okhʋta ya̱ hʋsh la tok oke: mihma Echip okla hʋt hʋch i̱ki ʋhleha ha̱ tʋnʋp itichanʋlli puta, micha issuba om binili puta ieshi hosh hliolit Okhʋta Humma ya̱ isht ona tok.

⁷ Mihma Chihowa ya̱ okla i̱ pa̱ha̱ya ma, hʋchishno, micha Echip okla aiena hʋchim ititakla ya̱ okhlili takalichi tok, micha okhʋta ha̱ falʋmminchit onochit ompohomo tok: micha Echip a̱ nana akaniohmihinchi li tok a̱ hʋchi nishkin ʋt pi̱sa tok oke: micha yakni haiaka hʋsh ai asha na nitak laua tok.

⁸ Micha Amolait okla i̱ yakni Chatan mish tʋnnʋp a̱ hʋch isht ʋla li tok; mihma hʋch itibi tok: mihma i̱ yakni ya̱ hʋsh ishi cha, hʋsh a binila chi̱ ho̱, hʋch ibbak a̱ fohki li tok; micha hʋchi tikba ya̱ ai okpʋnit tahli li tok.

⁹ Yohmi ma Sippo ushi Balak Moab i̱ mi̱ko ʋt wakaya cha, Islael a̱ i̱n tanampi tok; micha Beo ushi Balaam ʋt hʋchi kalakshichit miha chi̱ ho̱ pit hoyo tok:

¹⁰ Yohmi kia Balaam a̱ i̱ haponaklo la he keyu ho̱, hʋchi yukpalit anumpuli moma tok; yohmit ibbak a̱ hʋchi a hlakofichi li tok.

¹¹ Mihma Chatan a̱ hlopullit Cheliko ya̱ hʋsh la tok oke; mihma Cheliko okla Amolait ʋhleha, micha Pelissait ʋhleha, micha Kenanait ʋhleha, micha Hitait ʋhleha, micha Kikashait ʋhleha, micha Hifait ʋhleha, micha Chebusait ʋhleha aiena kʋt hʋchin tanampi tok; mihma hʋch ibbak fohki li tok oke.

¹² Mihma fohkul a̱ hʋchi tikba pila li tuk o̱, yʋmmʋt Amolait okla i̱ mi̱ko tuklo ka hʋchi tikba tihlelit tahli tok: yohmi kia hʋchi̱ bʋshpo falaia keyu, micha hʋchim iti tanampo atok keyu hoke.

¹³ Micha yakni ya̱ toksʋlit isht hʋsh asitʋbi tuk keyu ka hʋch ima li tuk oke: micha tʋmaha holihta puta hʋsh ikbi tuk keyu ka, hʋch ima li ma hʋsh ai aha̱shwʋshke; pa̱k ʋpi ahollokchi, micha alif osapushi aiena hʋsh hokchi tuk keyu kʋt hʋsh ai ʋpʋshke, im achi tok.

¹⁴ Yʋmohmi hoka Chihowa ya̱ hʋsh holitobli cha, chu̱kʋsh a̱hli, micha apissali bieka hosh hʋsh im antiashke; micha na holbʋt toba puta hʋch i̱ki ʋhleha hʋt okhina mish tʋnnʋp, micha Echip a̱ aiokpʋchi tok a̱ hʋsh kanchashke; micha Chihowa yak o̱ hʋsh im antiashke.

¹⁵ Micha Chihowa im antia ka ik achukmo hʋsh ahnikmʋt, kʋna ho̱ hʋsh im antia chi̱k mʋt himak nitak a̱ hʋsh atokolashke, na holbʋt toba puta okhina mish tʋnnʋp aiasha na hʋch i̱ki ʋhleha hʋt aiokpʋchi tok ak okmá, keyukmʋt Amolait okla i̱ yakni ya̱ hʋsh aiasha kʋt i̱ na holbʋt toba puta yak okmá nanakmʋt, amba ʋno, micha an chuka achʋfa ʋto Chihowa ak o̱ il im antia chi̱ hoke, im achi tok.

¹⁶ Mihma okla hash osh afalamichit Chihowa ya̱ e kanchi cha, na holbʋt toba il im antia hi a̱ Chitokaka yʋt pim olʋbashke.

¹⁷ Chihowa pin Chitokaka ak osh, yʋmmak osh pishno, micha pi̱ki ʋhleha aiena ka Echip yakni, micha aboha yuka a kohchit pisht ʋla tok; micha yʋmmak osh, e pi̱sa ho̱ nan isht atokowa chinto fehna ka yʋmihinchi tok; micha kanima il atia moma, micha okla moma hlopullit il a̱ya ka pi okchalinchi tuk oka,

¹⁸ Micha Chihowa yʋt pi tikba ya̱ okla moma Amolait ʋhleha yakni yash aiena puta ka tihlelit akohhonchi tok; yʋmohmi hoka pishno ak kia Chihowa ya̱ il im antia chi̱ hoke, pin Chitokaka hoka, achi tok.

¹⁹ Mihma Choshua ʋt okla ha̱, Chihowa ya̱ hʋsh im antia he keyu hoke; Chitokaka nan ashʋchi iksho yoka: Chitokaka nuktahanhla hoke; na hʋsh yoshuba, micha na hʋsh ashʋchi aiena puta ka hʋch i̱ kashofa he keyu hoke.

²⁰ Chihowa ya̱ hʋsh kanchi cha na holbʋt toba puta ka hʋsh im antiakma, yohmikma nana achukma ho̱ hʋchi̱ yʋmihinchi tuk kia, filema cha hʋchi hotopalit hʋchi tahla hi oke, im achi tok.

²¹ Mihma okla hash osh Choshua ya̱ Aha! Chihowa yak o̱ il im antia chi̱ hoke, im achi tok.

²² Mihma Choshua ʋt okla hash, Chihowa ya̱ hʋsh im antia chi̱ hosh hʋsh atokoli kʋt hʋchishno akinli hʋsh il atokoli, hʋsh tobʋshke, im achi ma, Nan atokoli pia hoke, okla achi tok.

²³ Yʋmohmi hoka himak a̱ naholbʋt toba puta ka hʋch ititakla ya̱ hʋsh kanchashke, micha hʋchi chu̱kʋsh a̱ Islael in Chihowa Chitokaka ak o̱ isht hʋsh asitiashke, achi tok.

²⁴ Mihma okla hash osh Choshua ya̱, Chihowa pin Chitokaka ak o̱ il in toksahanli cha, im anumpa ha̱ il im antia chi̱ hoke, im achi tok.

²⁵ Yohmi ho̱ nitak yʋmma Choshua ʋt okla ha̱ anumpa it im apesa cha, nan ʋlhpisa, micha nan isht im apesa ya̱ Shechem a̱ ai apesa tok.

²⁶ Mihma Choshua ʋt anumpa ilʋppa puta ka Chitokaka i̱ nan ʋlhpisa holisso ha̱ aholissochi tok; micha tʋli chito ishi cha, baiyi yʋmmʋt Chihowa im ʋlhtipo holitopa bili̱ka hiki̱a tuk o̱ nutaka ya̱ hilechi tok.

²⁷ Mihma Choshua ʋt okla moma kash Yakeh! tʋli ilʋppak osh Chihowa im anumpa puta pim anumpohonli ka haklo tok okʋt pi atokoli ya chi̱ hoke, yʋmohmi hoka hʋchin Chitokaka ya̱ hʋsh kancha he keyu ka hi a̱ hʋchi atokoli yashke.

²⁸ Yohmi ho̱ Choshua ʋt tishelichi na okla hash osh i̱ yakni aiyukali ka onʋt taha tok.

²⁹ Atuk o̱ ilʋppa i̱ himmak ma, yakohmi tok, Chihowa in tishu, Nun ushi Choshua ʋt afʋmmi tahlepa achʋfa cha pokoli aiena hosh illi tok.

³⁰ Mihma ilap i̱ yakni ʋhli Timnalh‐selah, yʋmmʋt Eflaim nʋnih talaia ka Kaash bokko falʋmmi in tʋnnʋp ak o̱ okla hohpi tok.

³¹ Mihma Islael ʋt Choshua ʋt okcha̱ya nitak moma, micha hatak asʋnonchi ʋhleha hʋt Choshua ʋt illi haya, okcha̱ya moma, Chihowa yʋt na fehna Islael i̱ yʋmihinchi ka, pi̱sa tok ʋt okcha̱ya nitak moma kʋno Chihowa ya̱ im antia tok.

³² Mihma Chosef foni Islael im ʋlla ʋhleha hʋt Echip a̱ kohchit isht ʋla tok ʋt Chekob ʋt tʋli hʋta tushahli tahlepa achʋfa ho̱ Shechem i̱ki Hamo ushi ʋhleha ha̱ isht in chumpa tok yakni talaia ho̱ Shechem ak o̱ a hohpi tok: mihma Chosef im ʋlla ʋhleha ha i̱ yakni toba tok oke.

³³ Mihma Alon ushi Eleasa ʋt illi tok; mihma bokko hosh ushi Finehas a̱ immi hatok yʋmmʋt Eflaim nʋnih ak o̱ talaia ho̱ ima tok o̱, a hohpi tok.