Choshua 23 - Chahta Holisso Holitopa 1886

¹ Atuk o̱ yakohmi tok, Chihowa ʋt Islael a̱ in tʋnʋp moma ka ai i̱ fohʋchit taiyahli tok nitak hopaki ma, Choshua ʋt sipoknit nitak in lauʋt taiyaha tok.

² Mihma Choshua ʋt Islael moma, micha im asʋnonchi ʋhleha, micha i̱ noshkoboka ʋhleha, micha i̱ nan apesa ʋhleha, micha okla pehlichi ʋhleha aiena ka hoyo cha, Sa sipoknit nitak an lauʋt sa taiyahʋshke.

³ Micha Chihowa hʋchin Chitokaka yʋt hʋchishno pulla kak o̱ oklushi ilʋppa puta ka kaniohmihinchi tuk a̱ hʋsh pi̱sʋshke; Chihowa hʋchin Chitokaka yʋmmak osh hʋchim itibi tuk oka.

⁴ Yakeh! hʋchim ishtatiaka puta i̱ yakni ya chi̱ ka, oklushi a̱sha moma puta ka nashoeli hosh hʋch itakʋshkolit, Chatan ʋttʋt a tʋptulit kanchi li tuk ʋt mominchit hʋshi ai okatula imma okhʋta chito ont ʋhli ka hʋch ima li tuk oke.

⁵ Mikma Chihowa hʋchin Chitokaka yʋt hʋchi tikba akohchit hʋsh a pi̱sa ka a tihlelit kocha wehla chi̱ hoke; mikmʋt Chihowa hʋchin Chitokaka yʋt hʋchim ahanchi tok mak o̱ i̱ yakni ya̱ hʋsh ishi cha, hʋsh abinila chi̱ hoke.

⁶ Yʋmohmi hoka kʋllot hʋchim anukfila fehna hosh Moses i̱ nan ʋlhpisa holisso ha̱ a holihi̱so ka mominchit holitoblit hʋsh yʋmihinchashke; yʋmohmi hosh shanaiyʋt naksika isht impak imma, micha ʋlhfʋbek imma kanima ka pit hʋch ik fulloto kashke.

⁷ Yʋmohmi hosh oklushi ilʋppa puta hʋchi takla a̱sha moma ka hʋch ik ibafohko kashke; micha i̱ na holbʋt toba puta hohchifo ha̱ anukfillit hʋch ik miho kashke; micha isht hochi̱fot anumpa kʋllo hʋch ik il onocho kashke, micha hʋch ik in toksalo kashke, micha hʋch ik im akachunolo kashke:

⁸ Amba yʋmohmit mihinti himak nitak a̱ ant ʋhli hokʋt, Chihowa hʋchin Chitokaka yak o̱ hʋsh asitiashke.

⁹ Chihowa hʋt okla chito, micha okla kʋllo aiena ho̱ hʋch itikba a tihlelit kocha wehli tuk oke: amba hʋchishno yokʋno hatak nana kia hʋch itikba hikia he keyu tuk himak nitak a̱ ant ʋhlishke.

¹⁰ Hatak hʋsh achʋfa kʋt tahlepa sipokni ho̱ tihlela hi oke: Chihowa hʋchin Chitokaka ak osh miha tuk okʋt hʋchim itibi hoka:

¹¹ Yʋmohmi hoka achukmalit ahah! hʋsh il ahni cha, Chihowa hʋchin Chitokaka ya̱ hʋsh holitoblashke.

¹² Keyu hosh kaniohmi hosh falamʋt hʋsh ia cha, oklushi a̱sha moma ilʋppa puta, ilʋppa hʋchi takla a̱sha ka asitiʋt itauwayʋchit, hʋsh iba chukowakma, micha hʋch iba chukowakma,

¹³ Chihowa hʋchin Chitokaka yʋt himak pilla ma oklushi ilʋppa puta moma ka hʋchi tikba tihlelit kohcha wehla he keyu hoke: amba nan isht hʋch ibetʋbli, micha nan isht hʋchi hokli, micha nan isht hʋchi fʋma yosh hʋchi naksi ya̱ onʋtoyula chi̱ hoke; micha kʋti hosh hʋchi nishkin a̱ shamʋlli na yakni achukma ilʋppa Chihowa hʋchin Chitokaka yʋt hʋch ima tok a̱ ai illit hʋchin taha chi̱ pulla kʋt hʋsh ithaiyanashke.

¹⁴ Micha yakeh! himak nitak a̱ yakni moma a ma̱ya chatuk mak o̱ ia la chishke; mihma hʋchi chu̱kʋsh moyuma, micha hʋchimi shilombish moyuma isht hʋsh ithaiyana ka, nana achʋfa kia nana achukma moma ka Chihowa hʋchin Chitokaka yʋt hʋchishno ya̱ isht hʋchi anumpohonli tok ʋt ont ik ai a̱hlo keyushke; nana moma kʋt ont ai a̱hlit tahʋshke; micha nana achʋfa kia ik ai a̱hlo kʋt ikshoshke.

¹⁵ Yʋmohmi hoka yakohma hi oke, nana achukma moma Chihowa hʋchin Chitokaka yʋt miha tuk ʋt hʋchi onʋtoyula tuk oke; yohmi tuk okʋt nana ik achukmo moma Chihowa yʋt hʋchi onochit, yakni achukma Chihowa hʋchin Chitokaka yʋt hʋch ima tuk ʋt ai okpʋnit hʋchi tahla chi̱ hoke.

¹⁶ Chihowa hʋchin Chitokaka nan it im apesa anumpa hʋchim apesa tok a̱ hʋsh kobʋffi cha, na holba puta ka ont im antiʋt hʋsh im akachunolikma, yohmikma Chihowa im ai i̱ nukkilli ʋt libbit hʋchi̱ sanalikma, chekosi fehna yakni achukma hʋch ima tok a̱ ai illit hʋchi taha hi oke, im achi tok.