Choshua 22 - Chahta Holisso Holitopa 1886

¹ Yʋmohmi ma Choshua ʋt Lubenait ʋhleha, micha Katait ʋhleha, micha Manasseh apehlichi iklʋna aiena kash hoyo tok.

² Micha Chihowa in tishu Moses ʋt hʋchim apesa tok a̱ mominchit hʋsh ieshi tuk oke, micha nana ho̱ hʋchim apihi̱sa li tuk puta ka moma ʋm anumpa ha̱ hʋs sʋm antia tuk oke.

³ Hʋch itibapishi ʋhleha ha̱ hʋch ik isso ho̱ nitak laua ilʋppa himak nitak a̱ ant ʋhlishke; amba Chitokaka hʋchin Chihowa yʋt nana apesa tok a̱ holitoblit hʋsh ieshi tuk oke.

⁴ Atuk o̱ himak a̱ Chitokaka hʋchin Chihowa ʋt hʋchi itibapishi ʋhleha ha̱ im achi tok mak osh fohʋchishke: yʋmohmi hoka himak a falamʋt hʋchim ʋlbina aiyukali yakni hʋsh ishi tok Chatan mish‐tʋnnʋp Moses Chihowa in tishu hʋt hʋch ima tok a̱ hʋsh onashke.

⁵ Yohmi kia ahah! ahni fehnʋt, nan ʋlhpisa puta Chihowa in tishu Moses ʋt atokolit hʋchi̱ miha kʋt, Chitokaka hʋchin Chihowa ya̱ holitoblit, ai ahni bieka ho̱ anoho̱wʋt, nan apihi̱sa puta ka ieshit, micha asitiʋt, micha chu̱kʋsh aioklu̱hʋt, micha shilombish aioklu̱hʋt hʋsh im antiashke, ahanchi tok a̱ hʋsh im antihi̱yashke, im achi tok.

⁶ Yʋmohmi hosh Choshua ʋt yukpalit aiokpʋchi cha, tishelichi tok; mihma ilhkolit im ʋlbina aiyukali ona tok.

⁷ Atuk o̱ Manasseh ai unchololi iklʋna ka Bashan ak o̱ Moses ʋt yakni ai ima tok: amba iklʋna achʋfa kʋno Choshua ʋt Chatan ola in tʋnnʋp hʋshi ai okatula imma itibapishi takla yak o̱ ai ima tok. Micha yʋmmak kia Choshua ʋt im ʋlbina aiyukali pilla mʋt, yukpalit ai okpʋchi tok;

⁸ Micha im anumpulit, Im i̱la̱yak chito, micha wak laua, tʋli hʋta, micha tʋli holisso lakna, micha tʋli lakna, micha tʋli, micha nafohka laua fehna aiena ka i̱shit falamʋt hʋchim ʋlbina aiyukali hʋsh onashke: hʋchin tʋnʋp hʋsh wehpuli tuk ʋt hʋch itibapishi ʋhleha ha̱ hʋsh itakʋshkoashke, achi tok.

⁹ Mihma Luben im ʋlla ʋhleha, micha Kat im ʋlla ʋhleha, micha Manasseh ai unchololi iklʋna aiena kʋt falama cha, Islael im ʋlla ʋhleha ha̱ issʋt, Shiloh Kenan yakni talaia ka akohchʋt, Kileat yakni Chihowa yʋt tohno na Moses ʋt anumpohonli tok mak o̱, yakni ai ishi tok osh immi chatuk ʋt ona tok.

¹⁰ Atuk osh Chatan ʋhli Kenan yakni bachaya ka okla ona mʋt, Luben im ʋlla ʋhleha, micha Kat im ʋlla ʋhleha, micha Manasseh ai unchololi iklʋna aiena kʋt Chatan bili̱ka ya̱ alta ikbit pi̱sa hi o̱ alta chito fehna ho̱ ikbi tok.

¹¹ Mihma Islael im ʋlla ʋhleha hʋt, Yakeh! Luben im ʋlla ʋhleha, micha Kat im ʋlla ʋhleha, micha Manasseh ai unchololi iklʋna aiena kʋt Kenan yakni ichapaka, Chatan ʋhli, Islael im ʋlla ʋhleha akocha ya̱ alta ai ikbit hilechishke, achi ho̱ haklo tok.

¹² Atuk o̱ Islael im ʋlla ʋhleha hʋt haklo mʋt, in tanampit ia chi̱ hosh, Islael im ʋlla ʋhleha moma kʋt iti hoyot Shiloh ya̱ ai itʋnaha tok.

¹³ Mihmʋt Islael im ʋlla ʋhleha hʋt Luben im ʋlla ʋhleha, micha Kat im ʋlla ʋhleha, micha Manasseh ai unchololi iklʋna aiena Kileat yakni a̱sha ka naholitompa isht ʋtta Eleasa ushi Finehas a̱ i̱ pila tok.

¹⁴ Mihma holitompa pokoli Islael apehlichi moma ka chuka achʋfa holitopa i̱ shahli ka achʋfa aiyukali tok; micha moma kʋt i̱ki ʋhleha in chuka achʋfa ya̱ Islael tahlepa sipokni puta ka i̱ noshkoboka bieka tok.

¹⁵ Atuk osh Kileat yakni ya̱ Luben im ʋlla ʋhleha, micha Kat im ʋlla ʋhleha, micha Manasseh ai unchololi iklʋna aiena ka im ona cha, im anumpulit yak ahanchi tok.

¹⁶ Chihowa im okla moma kʋt yak ahanchishke, Ilʋppʋt nan ashʋchi nanta mak o̱ yʋmohmit, Islael in Chihowa ya̱ hʋsh i̱ sanali cha, Chihowa iakaiya ka hʋsh i filʋmmichi hosh himak nitak a̱ alta ikbit Chihowa ya̱ hʋsh i̱ sanali cho?

¹⁷ Peo nan ashʋchi tuk ʋt ik pim ahobo hatuk o̱? yʋmma himak nitak a̱ ik pi̱ kashofo ki̱sha, Chihowa im okla iti takla ya̱ ililli hʋt a̱sha tok ak inli kia,

¹⁸ Yohmi kia himak nitak a̱ Chihowa iaka̱ya ka hʋsh i̱ filʋmmi cho? atukma yʋmohma chi̱ hoke, himak nitak a̱ Chihowa ya̱ i̱ yoshubʋt hʋsh i̱ sanali hoka, onnakma Islael moma kak o̱ i̱ nukkilla chi̱ hoke.

¹⁹ Yohmi kia yakni hʋsh ieshi ak osh ik kashofo hokma, hlopullit yakni Chihowa immi, Chihowa im ʋhltipo holitopa a hikia kak o̱ hʋsh la cha, pi ta̱kla hʋsh ieshashke: amba Chitokaka pin Chihowa im alta ichaplit alta hilechit, Chitokaka ya̱ i̱ filʋmmit hʋch ik i̱ sanalo kashke, micha pishno ma pi̱ filʋmmit hʋchi ik pi̱ sanalo kashke.

²⁰ Selah, ushi Achan ʋt nan i̱ hullochi atuk ash isht ashʋchi ho̱ Islael okla moma kak o̱ Chihowa im ai i̱ nukkilli ʋt onʋtola tok keyu cho? mihma hatak yʋmmʋt ilap bano hosh nan ashʋchi tuk ʋt illi tok keyu hoke, achi tok.

²¹ Mihma Luben im ʋlla ʋhleha, micha Kat im ʋlla ʋhleha, micha Manasseh ai unchololi iklʋna aiena kʋt afalaminchit, Islael tahlepa sipokni puta i̱ noshkoboka ʋhleha ha̱ im achi mʋt,

²² Chitokaka Chihowa na holbʋt toba moma i̱ shahli, Chitokaka Chihowa na holbʋt toba moma i̱ shahli, yʋmmʋt ithanʋshke, mikma Islael ak kia ithana chi̱ hoke; Chihowa im asanali hokmá, keyukmʋt i̱ yoshuba hokmá, nana hatuk ma, (himak nitak a̱ ik pi okchalincho kashke.)

²³ Chihowa iakaiya kʋt il i̱ filʋmma chi̱ hosh, keyukmʋt hukmit isht aiokpʋchi il onocha chi̱ hokmá, keyukmʋt, ilhpak isht ai okpʋchi il onocha chi̱ hokma, keyukmʋt, it i̱ nanaiyʋchi isht aiokpʋchi il onocha chi̱ hokma, nana hosh alta il ikbi tuk okma, Chihowa ak inli hosh pim a hoyashke;

²⁴ Micha ilʋppa fehna kak o̱ pi nuktʋhlʋt il ahanchi kʋt, Nitak inlakma hʋchim ʋlla ʋhleha hʋt pim ʋlla ʋhleha ha̱ Islael in Chitokaka Chihowa ya̱ nanta isht hʋchi ahalaia cho?

²⁵ Chihowa yʋt Chatan ak osh, pititakla ai ʋhli ya chi̱ ho̱ apesa tok oka, Luben im ʋlla ʋhleha, micha Kat im ʋlla ʋhleha aiena hʋchia ma! Chihowa ya̱ hʋsh ahalaia keyu hoke, im acha hinla: Yohmi hosh pim ʋlla ʋhleha hʋt Chihowa ya̱ holitobli ka hʋchim ʋlla ʋhleha hʋt issʋcha hi oke, il achi tuk.

²⁶ Yohmi hosh il achi kʋt, Himak ano alta ya̱ il atahlashke, onochit a hukmit isht aiokpʋchi keyu, ʋbit onochit isht aiokpʋchi keyu:

²⁷ Amba pititakla, micha pim isht atiaka piaka̱ya ka nan atokoli yosh hikia chi̱ ho̱, na hukmit isht il aiokpʋchi, micha nan ʋbit isht il aiokpʋchi, micha iti̱ nanaiyʋchi isht il aiokpʋchi aiena ka Chihowa itikba ya̱ isht il ai ahanta hi osh il ikbashke; yohmikma hʋchim ʋlla ʋhleha hʋt nitak inlakma pim ʋlla ʋhleha ha̱ Chihowa ya̱ hʋsh ahalaia keyu hoke, ik acho kashke.

²⁸ Yʋmohmi hosh il achi kʋt, Yakohma hi oke, nitak inlakma pishno yʋmma pim achikma, keyukmʋt, pim isht atiaka ya̱ yʋmma im achikma, anonti Yakeh! Chihowa im alta holbʋt toba, onochit a hukmit isht aiokpʋchi keyu, micha ʋbit onochit isht aiokpʋchi keyu, amba pititakla nan atokoli yosh hikia chi̱ ho̱ pi̱ki ʋhleha hʋt ikbi tok oke, il im acha he, il achi hatuk.

²⁹ Himak nitak a̱ Chihowa im alta im ʋlhtipo holitopa yosh itikba hikia kak o̱ keyu ho̱ onochit a hukmit isht aiokpʋchi ya chi̱, ilhpak onochit isht aiokpʋchi ya chi̱, keyukmʋt ai ʋbit onochit isht aiokpʋchi ya chi̱ ka, alta il ikbi cha, Chihowa ya̱ il im antia tuk ʋt, i̱ filʋmmit Chihowa ya̱ il i̱ yoshuba hi a̱, Chihowa yʋt pim alʋmmashke, im achi tok.

³⁰ Atuk o̱ naholitompa isht ʋtta Finehas, micha okla moma i̱ holitompa ʋhleha, Islael tahlepa sipokni puta noshkoboka aiena kak osh apehʋt a̱sha tuk ʋt, Luben im ʋlla ʋhleha, micha Kat im ʋlla ʋhleha, micha Manasseh im ʋlla ʋhleha aiena kʋt im anumpa ha̱ haklo mʋt, im achukma tok.

³¹ Mihma Eleasa ushi na holitompa isht ʋtta Finehas ʋt Luben im ʋlla ʋhleha, micha Kat im ʋlla ʋhleha, micha Manasseh im ʋlla ʋhleha aiena ka, Himak nitak a̱ Chihowa yʋt pibafoyuka ka il akostininchishke, nan ashʋchi ilʋppa yʋmohmit, Chihowa ya̱ hʋch ik i̱ sanalo hoka: himak a̱ Islael im ʋlla ʋhleha ha̱ Chihowa ibbak a̱ hʋsh a hlakofichishke.

³² Micha Eleasa ushi, Finehas na holitompa isht ʋtta, micha holitompa ʋhleha aiena hash osh Luben im ʋlla ʋhleha, micha Kat im ʋlla ʋhleha aiena ka i̱ filʋmmit, Kileat yakni ya̱ akohchʋt Kenan yakni ya̱ onʋt, Islael im ʋlla ʋhleha ha̱ im ona cha, anumpa isht im ona tok.

³³ Mihma Islael im ʋlla ʋhleha hʋt nana ka haklo mʋt, im achukma tok: micha Islael im ʋlla ʋhleha hʋt Chitokaka ya̱ aiokpʋchi mʋt, Luben im ʋlla ʋhleha, micha Kat im ʋlla ʋhleha aiena kʋt aiasha yakni yʋmma iʋt itibit okpʋna he ik ahno tok.

³⁴ Mihma Luben im ʋlla ʋhleha, micha Kat im ʋlla ʋhleha aiena kʋt alta yash Et hochifo tok: Chihowa ʋt Chitokaka yoka pititakla ya̱ na pim atokoli ya chi̱ hoka, achi tok.