Choshua 20 - Chahta Holisso Holitopa 1886

¹ Chihowa yʋt, Choshua ya̱ im anumpulit,

² Islael im ʋlla ʋhleha ha̱ im anumpulit, yak ish achashke, Moses a̱ tohno li̱ hʋchim anohonli tok mak o̱, tʋmaha holihta kanohmi a hlakofi ya̱ hʋsh il atokolashke.

³ Yʋmohmi ho̱ hatak ʋbi ʋt hatak nana kia ahah! ik ahno, micha ik ithano hosh ʋbikmʋt, malelit yʋmmak o̱ onashke; micha issish hlatapa il aiokha ya̱ hʋchim ahlakofi yashke.

⁴ Atukma kʋna hosh malelit tʋmaha holihta kanohmi kash achʋfona kia ona cha, tʋmaha holihta okhissa ya̱ hikiʋt, nana i̱ kaniohmi kʋt tʋmaha holihta yʋmma hatak im asʋnonchi ʋhleha ha̱ haklohonchikma, okla ishi cha, tʋmaha holihta ya̱ fohki cha, ai ʋtta chi̱ ka imakma, ahantashke.

⁵ Atuk o̱ issish hlatapa il aiokha yʋt hliolit iakaiyakma, ʋbi tuk a̱ ibbak ik fohko kashke; ithana keyu hosh hatak chuka abili̱ka ʋbi tuk, micha cha̱shpo ka i̱ nukkilli tuk keyu hoka.

⁶ Mikma tʋmaha holihta yʋmma ahanta tuk osh nana apesa chi̱ hosh okla moma itʋnahakma itikba hikia hi oke; mikmʋt ahanta na na holitompa isht ʋtta i̱ shahli ʋt nitak yʋmma ahanta tuk ʋt illa hi oke: yohmikma hatak ʋbi ash osh falama cha, in tʋmaha holihta akinli, micha in chuka ak inli tʋmaha holihta ai ʋttʋt maleli tuk ʋt ona hi oke, im achi tok.

⁷ Mihma Kalili Naftali nʋnih talaia Ketesh, micha Eflaim nʋnih talaia Shechem, micha Chutah nʋnih talaia Kichalh‐aba, yʋmmʋt Heblon ak o̱ atokoli tok.

⁸ Mikmʋt Chatan mish tʋnnʋp a̱ hʋshi akochaka pilla Cheliko bili̱ka ya̱, yakni haiaka Luben apehlichi yakni patali talaia kʋt Bese ak o̱ atokoli tok; micha Kat apehlichi Kileat talaia kʋt Lamolh, micha Manasseh apehlichi Bashan talaia kʋt Kolem ak o̱ atokoli tok.

⁹ Tʋmaha holihta ilʋppa puta kak o̱ Islael im ʋlla ʋhleha, micha hatak ik ithano ʋt takla ahanta tuk osh, kʋna kia ahah! ik ahno hosh hatak o̱ ʋbikmʋt, malelit ont chukowa na issish hlatapa il aiokha ʋt okla itikba ik hikio ki̱sha ka ik bo ka hi atok.