Choshua 2 - Chahta Holisso Holitopa 1886

¹ Yʋmohmi ma Choshua, Nun ushi ʋt Shittim ak o̱ hatak tuklo kʋt lumʋt na pisʋt a̱ya chi̱ ho̱ a chʋffichi tok; yohmi mʋt, Hʋsh ia cha, yakni Cheliko yʋmma ont hʋsh pisashke, im achi tok. Yohmi ma itiachi tuk osh ohoyo haui hohchifo kʋt Lahab o̱ in chuka itonachi cha, yʋmmak o̱ a nusi tok.

² Yohmi ma Cheliko i̱ mi̱ko ya̱ ont im anolit, Yakeh! hatak Islael im ʋlla ʋhleha ha̱ a minti kʋt yakni pisʋt a̱ya hosh, himak ninak a̱ ilʋppa ʋlʋshke, achi tok.

³ Yohmi ma Cheliko i̱ mi̱ko ash osh Lahab a̱ anumpa i̱ pilʋt, Hatak chim ʋlʋt chin chuka chukowa tuk a̱ ish kohchashke: yʋmmʋt yakni moma ka pisʋt tahla chi̱ hosh a̱ya hatuk oka, pit im achi tok.

⁴ Mihma ohoyo hash osh hatak tuklo kash o̱ ishit luhmi tok; yohmi cha ilʋppak o̱ achi tok, Hatak okʋto ʋm ʋla mʋhli tuk, yohmi kia kanima a minti ka ak ithano ke tuk:

⁵ Atuk osh yakohmi tuk, okhlilit taha holihta okhissa yʋt ʋlhkʋma chi̱ foka ma, hatak tuklo kash osh kohcha tuk oke: kanima ho̱ hatak tuklo kash osh ia tuk a̱ ak ithanoshke: chekosi hʋsh iakaiyashke; hʋsh sakka hinla hokʋt.

⁶ Yohmi kia aboha pakna ya̱ isht ona cha, nuchi ʋpi achukmalit ashachi tuk osh isht ompohomot luhmi tuk atok.

⁷ Yohmi ma okla iakaiyʋt Chatan imma iʋt okhina akocha puta ka ona tok: mihma okla iakaiya yʋmmʋt akohcha mak inli ho̱, holihta okhissa ya̱ akʋmmi tok.

⁸ Yohmi tuk o̱ tʋshkit ik oklo ki̱sha ho̱, aboha pakna ya̱ ohoyo hash osh im ai ona cha;

⁹ Hatak tuklo kash o̱, Yakni ya̱ Chihowa ʋt hʋch ima tok a̱ ithana lishke; yohmi ho̱ isht a hʋchi̱ nukshopa yʋt pi onʋtoyulʋshke; hʋchishno ak atuk pulla mak o̱ yakni ilʋppa okla ai asha tuk moma kʋt bihinla chiyuhmishke.

¹⁰ Echip yakni ya̱ a kohchʋt hʋsh minti ma, Chihowa ʋt Okhʋta Humma oka ya̱ hʋchi̱ shileli na hʋsh a̱ya tok: micha Amolait okla i̱ mi̱ko tuklo Sihon, micha Ok aiena, yʋmmʋt Chatan mish tʋnnʋp ai asha tuk a̱ kaniohmichit nana ka im okpʋnit hʋsh taiyahli tok a̱, e haha̱klo chatuk okʋt.

¹¹ Hʋchishno ak atuk pulla mak o̱ nana ilʋppa puta ka e haklo mak inli ho̱, pi chu̱kʋsh ʋt bihinla tok; yohmi na hatak kanima kia chilitʋt im anukfila kʋt i̱ fo̱ka kia iksho ki tok: Chitokaka hʋchin Chihowa yʋmmak osh peh pakna ʋba a holitopa, mikmʋt nutaka yakni aiena ka in Chihowa hoka.

¹² Yʋmohmi hoka himak a̱ hʋchim ilbʋsha lishke, ʋno ʋt hʋchi̱ kana li tuk a̱, hʋchishno mʋt a̱ki in chuka achʋfa ya̱ hʋch i̱ kana hi ʋt Chihowa ya̱ anumpa kʋllo isht il onochit,

¹³ A̱ki, micha hʋshki, micha a̱ nakfi ʋhleha, micha itibapishi li ʋhleha, micha in chuka achʋfa aiena ka moma hʋsh okchalinchi cha, pilla he tuk a̱ hʋsh pi hlakofichi cha, ilʋppak o̱ nan isht ithana he a̱hli ka hʋs sʋmashke, im achi tok.

¹⁴ Mihma hatak tuklo kash osh afalamichit, Nana pi̱ kaniohmit il a̱ya hatuk ilʋppa chik anolokma, pim ilhfiopak a̱ e chim ile kahlishke: atukma yakohma hi oke, Chihowa ʋt yakni ilʋppa pima ha ma, chi̱ kana achukmʋt e chim ai a̱hla hi oke, im achi tok.

¹⁵ Yohmi mʋno ponola atakalichit okhissushi hlopullichit aka pit hiohlichi tok; in chuka hʋt tʋmaha tʋli holihta ya̱ paknaka yo̱ talaia hatuk oka, yohmi cha tʋli holihta pakna yʋmmak o̱ achukʋt ahanta tok.

¹⁶ Micha ohoyo hash osh yʋmmak ash o̱, Hʋch iakaiyʋt itʋnowa yʋt hʋchi afama yoba na, nʋnih hak o̱ hʋsh ona cha, yʋmmak o̱ lumʋt hʋsh chi̱ya na nitak tuchina onashke: yohmi na hʋch iakaiyʋt itʋnowa yʋt falamʋt ʋla hok mak o̱, hʋsh ata̱ya hetuk ʋt hʋsh iashke, im achi tok.

¹⁷ Mihma hatak tuklo kash osh yʋmmak ash o̱, Ish pim ai ahni ho̱ anumpa kʋllo il il onochi tuk ilʋppa anumpa isht pi onʋtola he keyu hoke.

¹⁸ Yakeh! kaniohmi foka ho̱ yakni ilʋppa e la hokma, okhissushi isht pi a kohchi ilʋppa ponolushi tishepa ponola toba ilʋppa isht ish takchashke: yohmi cha chi̱ki, chishki, chi nakfi ʋhleha, micha chi̱ki in chuka achʋfa ya̱ moma chin chuka isht ish lashke.

¹⁹ Yohmikma yakohma hi oke, kʋna hosh chim aboha okhissa akohchʋt tʋmaha itintakla hina bachaya ka ona hokʋto, im issish ʋt ilap noshkobo akinli ho̱ onʋtoyula na, pishno ʋto anumpa isht pi onʋtoyula he keyu hoke; mikma kʋna hosh aboha anu̱kaka fo̱ka hokʋno, kʋna hosh ibbak onochi hokma, im issish ʋt pi noshkobo hak o̱ onʋtoyula hi oke.

²⁰ Yohmi kia nana pi̱ kaniohmi hosh il a̱ya hatuk ilʋppa ish anoli hokmʋno, ish pim ai ahni na anumpa kʋllo il il onochi tuk ilʋppʋt a pi̱ mokofa chi̱ hoke, im achi tok.

²¹ Yohmi ma ohoyo hash osh, Hʋchim anumpa hak o̱ iakaiya hosh nana kʋt ai yohmashke, achi tok. Micha ik iá, im ahni na itiachi tok: mihma ponola tishepa ash o̱ okhissushi ya̱ isht takchi tok.

²² Mihma itiachit nʋnih ash o̱ ona cha, yʋmmak o̱ chi̱ya na nitak tuchina ona tok; yohmi na iakaiyʋt itʋnowa yʋt falamʋt ai ʋla tok: iakaiyʋt itʋnowa yʋt ai itʋnowa puta ka hoyot tahli kia, ik ahayucho ki tok.

²³ Yakohmi ho̱ hatak tuklo kash osh nʋnih hash auet akowa cha, tanʋblit Choshua, Nun ushi a̱ im ona cha, nana kʋt im akaniohmi tuk ʋt moma im anoli tok.

²⁴ Mihmʋt yʋmmak ash osh Choshua ya̱, Chihowa ʋt yakni moma pibbak a̱ fohki tuk pullʋshke: pishno ak atuk pulla mak o̱ yakni yʋmma ai asha kʋt momʋt bihinla chiyuhmi hoka, im achi tok.