Choshua 18 - Chahta Holisso Holitopa 1886

¹ Mihma Islael im ʋlla ʋhleha moma kʋt iti hoyot Shiloh ya̱ itʋnaha cha, okla moma im ʋlhtipo holitopa ya̱ a hilechi tok: mihma yakni ʋt itikba ya̱ i̱ nutaka tok.

² Mihma Islael im ʋlla ʋhleha takla a̱sha kʋt ai unchololi untuklo hosh yakni ai isha he ʋlhpesa kʋt ik esho ki̱sha tok.

³ Mihma Choshua ʋt Islael im ʋlla ʋhleha ha̱, Katiohmi foka ho̱ hʋchin tikba ʋhleha in Chitokaka Chihowa yʋt yakni hʋch ima tok a̱ iʋt hʋch isha chi̱ kʋt hʋchi sʋlaha chi̱ cho?

⁴ Hʋchi iti takla ya̱ ai unchololi achʋfa ka hatak tuchina aiyukali ho̱ hʋsh hilechashke; mikma pila likma, okla wakaya cha, iʋt yakni ya̱ hlopullit a̱ya cha, yakni ai isha he ʋlhpesa ʋt kaniohmi ka atokolit holissochi cha, anonti okla ʋm ʋlashke.

⁵ Micha okla itakʋshkolit untuklochashke: Chutah ʋto oka mahli im ai ʋhli ak inli ho̱ ahanta chi̱ hoke; mikma Chosef in chuka achʋfa ʋto falʋmmi im ai ʋhli ak o̱ ahanta chi̱ hoke.

⁶ Yʋmohmi hoka yakni ʋt kʋshkoa untuklo ho̱ yakni ya̱ holissochit isht hʋs sʋm ʋla na Chitokaka pin Chihowa itikba ya̱ hʋchi̱ nashoelichi lashke.

⁷ Amba Lefait ʋhleha hʋto hʋch iba takla he keyu hoke: Chihowa i̱ na holitompa isht ai ʋtta ak osh ai isha he im ʋlhpesa yoke. Mikma Kat, micha Luben, micha Manasseh ai unchololi iklʋna aiena kʋto Chatan mish tʋnnʋp hʋshi akocha ka yak o̱ Chihowa in tishu Moses ʋt ai ima na yakni ai ishi tok oke, im achi tok.

⁸ Mihma hatak ash osh wakaya cha, ilhkoli tok; mihma Choshua ʋt, yakni ya̱ holissocha chi̱ ka, atokolit i̱ mihʋt, Oh ia cha, yakni ya̱ a nowʋt hlopullit, holissochit hʋsh tahli cha, anonti hʋs sʋm ʋla na ilʋppa Chihowa itikba Shiloh ya̱ hʋchi nashoelichi lashke, im achi tok.

⁹ Mihma hatak ash osh ilhkolit yakni ya̱ hlopullit tʋmaha holihta ʋlhpisa ho̱ kʋshkoa untuklo ho̱ holissochit holisso afohkit tahli cha, anonti Choshua im ʋlʋt Shiloh okla abinanchi yash ʋla tok.

¹⁰ Mihma Choshua ʋt Chihowa itikba Shiloh yak o̱ nashoelichi tok: yʋmmak o̱ Choshua ʋt ita kʋshkoa ʋlhpisa ho̱ yakni ya̱ Islael im ʋlla ʋhleha ha̱ itakʋshkoli tok.

¹¹ Mihma Benchamin im ʋlla ʋhleha hʋt itakʋshkoa ʋlhpisa hosh nashoelit ishi tok; micha nashoeli mʋt, im ai ʋhli ya̱ Chutah im ʋlla ʋhleha, micha Chosef im ʋlla ʋhleha ititakla yak o̱ ai ishi tok.

¹² Mihma im ai ʋhli falʋmmi in tʋnnʋp ʋto Chatan ʋttʋt ia tok; micha ai ʋhli ʋt ia hosh Cheliko ya̱ i̱ falʋmmi in tʋnnʋp ichapaka ona cha, hʋshi ai okatula imma nʋnih chaha yo̱ hlopullit ia tok; micha ont akohcha kʋt yakni haiaka Belh‐afen ak atok.

¹³ Micha ai ʋhli ʋt ilʋppa ʋttʋt Lus pilla ia mʋt, Lus ichapaka (yʋmmʋt Belhel), oka mahli imma ona tok; micha ai ʋhli ʋt okʋtahʋt nʋnih hosh okfa Belh‐holon im oka mahli in tʋnnʋp bachaya ka bili̱ka Atalolh‐atta ya̱ ona tok.

¹⁴ Micha yʋmma ʋttʋt, nʋnih Belh‐holon itikba bachaya oka mahli imma ak o̱ ʋttʋt oka mahli pilla ia hosh okhʋta chukbika apakfopʋt ia tok: micha ont akohcha kʋt Kichalh‐baal, yʋmmʋt Kichalh‐chealim, Chutah im ʋlla ʋhleha ha̱ in tʋmaha holihta yoke. Ilʋppak osh hʋshi ai okatula ai ʋhli hoke.

¹⁵ Mikma oka mahli ai ʋhli ʋt Kichalh‐chealim ataha kak o̱ ʋttʋt, micha ai ʋhli ʋt hʋshi ai okatula imma hak o̱ kohchʋt ia cha, kʋli oka Neftoah taloha ka ona tok:

¹⁶ Micha ai ʋhli ʋt ia hosh nʋnih hosh Hinnom okfa itikba bachaya kʋt atahaka ona tok; micha yʋmmʋt falʋmmi pilla hatak chaha okfa talaia hoke; micha Hinnom okfa ha̱ okʋtahʋt oka mahli pilla Chebusi ya̱ ichapaka ona cha, Enlochel a̱ ona mʋt;

¹⁷ Micha falʋmmi ha̱ isht ia mʋt, kohchʋt En‐shemesh a̱ isht ona tok; micha kohchʋt Kolilolh pilla iʋt, yʋmmʋt Atummim atia ichapaka yoke; micha okʋtahʋt ia hosh Luben ushi Bohan in tʋli ya̱ ona tok;

¹⁸ Micha hlopullit ont a̱ya mʋt, Alabah i̱ falʋmmi imma ichapaka pilla ia cha, okʋtahʋt Alabah ya̱ ona tok:

¹⁹ Micha ai ʋhli ʋt hlopullit falʋmmi pilla ia hosh, Belh‐hoklah ichapaka ya̱ ona tok; micha ai ʋhli ont akohcha kʋt okhʋta hʋpi i̱ falʋmmi okhʋta filʋmminchi Chatan ʋt oka mahli ont atahaka ak atok. Ilʋppak osh oka mahli ai ʋhli yoke.

²⁰ Micha i̱ hʋshi akochaka Chatan ak osh ai ʋhli atok. Ilʋppak osh Benchamin im ʋlla ʋhleha itakʋshkoa ʋlhpisa hosh i̱ yakni ai ʋhli fullota tok.

²¹ Mihma Benchamin im ʋlla ʋhleha apehlichi itakʋshkoa ʋlhpisa hosh tʋmaha holihta puta kʋt Cheliko, micha Belh‐hoklah, micha okfa Kesis,

²² Micha Belh‐alabah, micha Semalaim, micha Belhel,

²³ Micha Afim, micha Palah, micha Oflah,

²⁴ Micha Chefa‐haammonai, micha Ofni, micha Kaba; tʋmaha holihta auah‐tuklo, micha chuka alokoli puta ai it ieshi;

²⁵ Micha Kibeon, micha Lamah, micha Beelolh,

²⁶ Micha Mispeh, micha Chefilah, micha Mosah,

²⁷ Micha Lekem, micha Ilpeel, micha Talalah,

²⁸ Micha Selah, micha Elef, micha Chebusi, (yʋmmʋt Chelusalem) Kibealh, micha Kichalh; tʋmaha auah ushta, micha chuka alokoli puta ai it ieshi. Ilʋppak osh Benchamin im ʋlla ʋhleha itakʋshkoa ʋlhpisa hosh yakni ai isha he ʋlhpesa ha tok.