Choshua 17 - Chahta Holisso Holitopa 1886

¹ Manasseh ai unchololi ak kia nashoelit ishi ʋt in talaia tok; Chosef ushi ya̱ ʋttahpi atuk okʋt; Manasseh ushi akni fehna Machi Kileat i̱ki ishi kʋt ilʋppak atok: hatak tʋnʋp a̱ya atuk okʋt, yohmi hatuk osh Kileat; micha Bashan itatuklo kak osh in taloha tok.

² Manasseh ushi inla itakʋshkoa ʋlhpisa hosh nashoelit ishi ʋt im a̱sha ak inli tok. Abiese im ʋlla ʋhleha ha̱ immi, micha Helek im ʋlla ʋhleha ha̱ immi, micha Asliel im ʋlla ʋhleha ha̱ immi, micha Shechem im ʋlla ʋhleha ha̱ immi, micha Hefe im ʋlla ʋhleha ha̱ immi, micha Shemita im ʋlla ʋhleha ha̱ immi aiena ak atok: ilʋppa puta kak osh Chosef ushi Manasseh im ʋlla nakni itakʋshkoa ʋlhpisa tok.

³ Yohmi kia Manasseh ushi ʋt Machi yokma, yʋmma ushi ʋt Kileat okma, yʋmma ushi ʋt Hefe yokma, yʋmma ushi Selofehat ʋt ushi iksho hosh, amba ushetik bano tok: micha ilʋppa puta kak osh ushetik ʋhleha hohchifo hatok, Mahlah, micha Noah, Hoklah, Milkah, micha Tisah atok.

⁴ Micha Eleasa, micha Nun ushi Choshua, micha hatak holitompa ʋhleha aiena ka itikba ya̱ ona cha, Chihowa yʋt Moses a̱ im apesa kʋt, pitibapishi ʋhleha ta̱kla yakni il ai isha he ʋlhpesa ka pima chi̱ ka i̱ miha tok, achi tok: yʋmohmi ho̱ Chihowa yʋt im apesa tok mak o̱, i̱ki itibapishi ʋhleha ta̱kla yakni ai isha he ʋlhpesa ka ima tok.

⁵ Mihma Chatan mish tʋnnʋp a̱ Kileat, micha Bashan aiena ka ishi mʋt, nashoeli ho̱ yakni kʋshkoa pokoli hosh Manasseh ibbak a̱ fohka tok.

⁶ Manasseh ushetik ʋhleha hʋt ushi ʋhleha ibai ishi hatok oka; mihma Manasseh ushi ʋhleha inla yʋt Kileat yakni ak o̱ ishi tok.

⁷ Mihma Manasseh im ai ʋhli kʋt Asha ʋttʋt ia hosh Michmehlah ya̱ ona, yʋmmʋt Shechem itikba itoyula kak atok: micha ai ʋhli ʋt isht impak imma yak o̱ a̱ya hosh Entappuah okla ai asha ya̱ ona tok.

⁸ Mihma Manasseh ʋt Tappuah yakni ak o̱ ishi tok: amba Tappuah Manasseh im ai ʋhli talaia kak osh Eflaim im ʋlla ʋhleha hak o̱ immi hatok.

⁹ Micha ai ʋhli ʋt okʋtahʋt ia hosh oka mahli imma Kanah okhina ya̱ ona tok. Eflaim in tʋmaha holihta ilʋppa puta kʋt Manasseh in tʋmaha holihta puta kak o̱ takla aiasha hoke: Manasseh im ai ʋhli ak kia, okhina ya̱ i̱ falʋmmi in tʋnnʋp atok, micha ont akohcha kʋt okhʋta ak atok.

¹⁰ Oka mahli imma ʋt Eflaim okma, falʋmmi imma ʋt Manasseh atok; mihma okhʋta hak osh im ai ʋhli hatok: micha falʋmmi ha̱ Asha yak o̱ ai itafama mʋt, hʋshi akochaka ya̱ Issaka ak atok.

¹¹ Micha Manasseh ʋt Issaka, micha Asha ya̱ Belh‐shean, micha tʋmaha puta ai it ieshi, micha Ibleam, micha tʋmaha puta ai it ieshi, micha To okla, micha tʋmaha puta ai it ieshi, micha Ento okla, micha tʋmaha puta ai it ieshi, micha Taanach okla, micha tʋmaha puta ai it ieshi, micha Mekitto okla, micha tʋmaha puta ai it ieshi nʋnih yakni tuchina ho̱ i̱shi tok.

¹² Yohmi kia Manasseh im ʋlla ʋhleha hʋt tʋmaha holihta yʋmma okla ai asha tuk a̱ tihlelit kocha wehla he keyu tok; amba Kenanait ʋhleha hʋt yakni yʋmma ai asha pulla kak o̱ ahni tok.

¹³ Yohmi kia yakohmi tok, Islael im ʋlla ʋhleha hʋt, hlampkot taha mʋt, Kenanait ʋhleha ha̱ nutakʋchi cha, noshkobo atobbichi tok; yohmi kia tihlelit kocha wehlit ik ʋmohmicho tok.

¹⁴ Mihma Chosef im ʋlla ʋhleha hʋt Choshua ya̱ im anumpulit, Nanta katiohmi ho̱ nashoelit ishi achʋfa, micha yakni kʋshkoa achʋfa bano ho̱ is sʋma cho? Chihowa ʋt cha̱shpo himak nitak ant ʋhli ka sai yukpali pulla na okla chito tobʋt sa taiyaha hoka, achi tok.

¹⁵ Mihma Choshua ʋt afalamichit, Okla chito hʋchia hatuk osh, Eflaim nʋnih ʋt hʋchim atikkonofa fehna hokmʋt, yakni iti foka ya̱ hʋsh ona cha, Pelissait ʋhleha i̱ yakni, micha hatak chaha i̱ yakni yʋmma iti a̱ chanlit hʋsh akakohlashke, im achi tok.

¹⁶ Mihma Chosef im ʋlla ʋhleha hʋt, Nʋnih hʋt ik pim onoshke: mikma Kenanait ʋhleha moma okfa yakni aiasha kʋt tʋli iti chanʋlli im a̱sha bano hoke; Belh‐shean, micha in tʋmaha puta ai asha kʋt, micha Chesleel okfa aiasha aiena kʋt im a̱sha hoke, achi tok.

¹⁷ Mihma Choshua ʋt Chosef im ʋlla ʋhleha Eflaim, micha Manasseh aiena ka, Okla chito hʋchia hoke, micha hʋchimmi hlampko ʋt chito hoke: nashoelit ishi achʋfa bano hʋsh iesha he keyu hoke.

¹⁸ Amba nʋnih ak osh hʋch immi ha chi̱ hoke; iti foka yoka, micha chanlit hʋsh akakohla chi̱ hoke: micha akohchʋt ia yʋt hʋch immi ya chi̱ hoke; tʋli iti chanʋlli im a̱sha, micha hlampko kia Kenanait ʋhleha ha̱ tihlelit kocha hʋsh wehla chi̱ hoke, achi tok.