Choshua 16 - Chahta Holisso Holitopa 1886

¹ Mihma Chosef im ʋlla ʋhleha hʋt na shoelit ishi kʋt Chatan Cheliko bili̱ka ʋttʋt hʋshi akochaka imma ya̱ a̱ya hosh Cheliko oka ya̱ ona cha, ont ia hosh Behlel nʋnih yakni haiaka ya̱ ona,

² Micha Behlel a̱ kohchʋt ia mʋt, Lus a̱ ona cha, ont hlopullit a̱ya mʋt, Achi ai ʋhli Atalolh a̱ ona,

³ Micha okʋtahʋt hʋshi ai okatula pilla ia hosh Chafleti ai ʋhli ya̱ ona cha, ont a̱yʋt, okfa Belhholon ai ʋhli ya̱ ona cha, Kese ya̱ ona: micha ont akohcha kʋt okhʋta ak atok.

⁴ Yohmi ho Chosef im ʋlla ʋhleha, Manasseh, micha Eflaim moma kʋt yakni ya̱ ai isha he ʋlhpesa kʋt ishi tok.

⁵ Mihma Eflaim im ʋlla ʋhleha itakʋshkoa ʋlhpisa hosh im ai ʋhli kʋt yakohmi tok: hʋshi akochaka imma i̱ yakni ai ʋhli kʋt Atalolh‐ata ʋttʋt ia hosh nʋnih foka Belh‐holon a̱ ont ʋhli tok.

⁶ Micha ai ʋhli ʋt kohchʋt okhʋta pilla ha̱ ia hosh Michmehlah falʋmmi in tʋnnʋp a̱ ona; micha ai ʋhli ʋt hʋshi akochaka imma ya̱ ia mʋt, Taanalh‐shiloh ya ona cha, i̱ hʋshi akochaka ont ia hosh Chanohah ya̱ ona tok:

⁷ Micha okʋtahʋt Chanohah ya̱ ʋttʋt ia hosh Atalolh a̱ ona cha, Naalolh a̱ ona mʋt, Cheliko ya̱ ona cha, Chatan a̱ ont kohcha tok;

⁸ Ai ʋhli ʋt hʋshi ai okatula pilla Tappuah ʋttʋt kohchʋt ia hosh Kanah okhina ya̱ ona, micha ont akocha kʋt okhʋta ak atok. Ilʋppak osh Eflaim im ʋlla ʋhleha apehlichi itakʋshkoa ʋlhpisa hosh yakni ai isha he ʋlhpesa kak atok.

⁹ Micha Manasseh im ʋlla ʋhleha i̱ yakni ak o̱ Eflaim im ʋlla ʋhleha hʋt tʋmaha holihta inla ya̱ ai ishi tok; tʋmaha holihta moma, chuka alokoli puta ai it ieshi tok.

¹⁰ Mihma Kenanait ʋhleha Kese ai asha tuk a̱ tihlelit okla kocha ik wehlo tok: amba Kenanait ʋhleha hʋt Eflaimait ʋhleha ha̱ takla ai asha na himak nitak a ant ai ʋhli cha, i̱ nutakʋt noshkobo atobbi hoke.