Choshua 14 - Chahta Holisso Holitopa 1886

¹ Mihma yakni ilʋppa puta kʋt Kenan yakni a taloha kak o̱ Eleasa naholitompa isht ʋtta, micha Nun a̱ ushi Choshua, micha Islael im ʋlla ʋhleha apehlichi i̱ki ʋhleha ha̱ i̱ noshkobo ka puta aiena kʋt, i̱ yakni ya chi̱ ho̱, i̱ hopela na Islael im ʋlla ʋhleha hʋt ai ishit a binili tok.

² Chihowa yʋt Moses a̱ tohno tok mak o̱ nashoeli hosh ai unchololi chakkali kash, micha Manasseh ai unchololi iklʋna aiena kʋt yakni ya̱ ishit a binili tok.

³ Moses ʋt ai unchololi tuklo, micha Manasseh ai unchololi iklʋna hokʋno ima na Chatan mish tʋnnʋp yakni ya̱ ishit a binili tok oka; amba Lefai ai unchololi yano yʋmma takla yakni ya̱ ai isha he ʋlhpesa ka ik imo tok.

⁴ Chosef im ʋlla ʋhleha hʋt apehlichi tuklo, Manasseh, micha Eflaim ak atuk oka: yohmi hatuk o̱ Lefai ai unchololi hʋt takla ya̱ a binila he yakni ya̱ ik imo tok: peh, aiasha chi̱, micha i̱ wak, micha im i̱la̱yak ai asha chi̱ tʋmaha holihta puta, micha a bili̱ka fullota aiena ak illa ho̱ ima tok.

⁵ Chihowa yʋt Moses a̱ im achi tok mak o̱, Islael im ʋlla ʋhleha hʋt yʋmihchi cha, yakni ya̱ ita kʋshkoli tok.

⁶ Yohmi ma Chutah im ʋlla ʋhleha hʋt, Choshua ya̱ Kilkal a̱ anta tuk o̱ im ona tok: micha Kenesait Chefunneh ushi Kaleb ʋt, Chihowa yʋt, Katesh‐banea ya̱ il a̱shwa ma, chishno, micha ʋno ya̱ isht pi anumpulit Chihowa im antia hatak Moses a̱ im achi tok a̱ ish ithaiyanʋshke.

⁷ Afʋmmi pokoli ushta li ho̱, Moses Chihowa in tishu hʋt yakni pisʋt hlopulli la chi̱ ho̱, Katesh‐banea ya̱ a sa chʋffichi tok oke: atuk o̱ nana sa chu̱kʋsh foyuka tuk mak osh anumpa isht im ona li tok.

⁸ Yohmi kia itibapishi li ʋhleha si api̱hʋt ia tuk ʋt okla chu̱kʋsh a̱ bileli tok: amba ʋno ʋto Chitokaka an Chihowa ya̱ ai oklu̱hʋt iakaiya li tok.

⁹ Mihma nitak yʋmma Moses ʋt anumpa kʋllo il onochit, Yakni yʋmma chiyi yʋt a noho̱wa tuk ʋt chi̱ yakni, micha chim ʋlla ʋhleha aiena ka i̱ yakni bilia hi oke; Chitokaka an Chihowa ya̱ ai oklulu̱hʋt ish iakaiya tuk okʋt, ʋm achi tok.

¹⁰ Yohmi ka himak a̱ yakeh! achi tok mak osh Chihowa yʋt si okchalinchi na ilʋppʋt afʋmmi pokoli ushta akucha tahlapishke, Islael im ʋlla ʋhleha hʋt yakni haiaka fullokʋchit itʋnowa ma, Chihowa yʋt Moses a im anumpohonli tok fehna ʋttʋt mihintit himak a̱ ant ʋhlishke: yohmi ka yakeh! himak a̱ afʋmmi pokoli untuchina akucha tahlapi li hoke.

¹¹ Himak nitak ak kia ʋno sa hlampko kʋt, nitak yʋmma Moses ʋt sa pila tok a̱ chohmi li momʋshke: tʋnʋp a̱yʋt kohchʋt ia, micha ant chukowa aiena li kʋt, sa hlampko kʋt kaniohmi tok ʋt chohmi hosh sa hlampko momʋshke.

¹² Yʋmohmi hoka himak a̱ Chihowa yʋt nitak yʋmma isht anumpuli tuk nʋnih ilʋppa is sʋmashke; nitak yʋmma Anakim puta kʋt yʋmma aiasha cha, tʋmaha hʋt i̱ hochito cha, a holihta kʋllo ka ish ha̱klo tok okʋt, Chihowa yʋt sʋba foyuka yobakma, tihlelit kocha wehli la chi̱ hoke, im achi tok.

¹³ Mihma Choshua ʋt yukpalit im anumpuli cha, Chefunneh ushi Kaleb ʋt i̱ yakni ya chi̱ ho̱ Heblon a̱ ima tok.

¹⁴ Yohmi ho̱ Heblon ʋt Kenesait Chefunneh ushi Kaleb i̱ yakni toba tok osh, himak nitak a̱ ant ai ʋhli hoke: Islael in Chitokaka Chihowa ya̱ ai oklu̱hʋt iakaiya tuk ak atok.

¹⁵ Mihma cha̱shpo ka Heblon hohchifo kʋt Kichalh‐aba atok; Aba yʋmmak okʋt Anakim ʋhleha ha̱ hatak chito hosh anta tok. Mihma yakni ʋt tʋnʋp iksho ho̱, foha tok.