Choshua 13 - Chahta Holisso Holitopa 1886

¹ Mihma Choshua ʋt sipoknit nitak laua ka pisa tok; mikma Chihowa yʋt, Chi sipoknit nitak laua ho̱ ish pisʋshke; mihma immi ha chi̱ hosh yakni ya̱ isha chi̱ ka laua hosh aiasha momʋshke.

² Yakni ilʋppak osh a̱sha moma hoke; Filistin okla ai ʋhli fullota, micha Keshuli ʋt moma,

³ Siho, yʋmmʋt Echip itikba talaia ka ʋttʋt ia hosh falʋmmi pilla Eklon, yʋmmʋt Kenanait im aholhtina ya̱ ont ʋhli: Filistin okla i̱ hochitoka tahlapi, Kasahlait ʋhleha, micha Ashtohlait ʋhleha, Eshkalonait ʋhleha, Kittait ʋhleha, micha Eklonait ʋhleha, Afait ʋhleha ak kia aiena:

⁴ Oka mahli ha̱ ʋttʋt i̱ falʋmmi imma ia hosh Afek Amolait ʋhleha im ai ʋhli ya̱ ona ka ititakla ya̱ Kenanait ʋhleha yakni moma, micha Mealah yʋmmʋt Sitonian ʋhleha i chapaka talaia aiena kʋt;

⁵ Micha Kiblait ʋhleha i̱ yakni, micha hʋshi a kochaka imma Lebanon, Hemon nuta Baal‐kat a̱ ʋttʋt ia hosh Hamalh ont chukowa ka ont ʋhli hoke.

⁶ Nʋnih foka okla puta Lebanon a̱ ʋttʋt ia hosh Mislefolh‐maim, ont ʋhli, micha Sitonian ʋhleha moma, yʋmma puta kak o̱ Islael im ʋlla ʋlhleha itikba ya̱ tihlelit kohcha wehli la chi̱ hoke: peh chim apesa li tok mak o̱, nashoeli hosh yakni ʋt immi ha chi̱ ho̱, ish ita kʋshkolashke, im achi tok.

⁷ Yʋmohmi hoka, himak a̱ yakni ilʋppʋt immi ha chi̱ ho̱, ai unchololi chakkali kash, micha Manasseh ai unchololi iklʋna aiena ka ish itakʋshkolashke,

⁸ Yʋmma iklʋna hokʋto Luben ai unchololi, micha Kat ai unchololi aiena ka ta̱kla Chatan mish tʋnnʋp hʋshi akochaka imma Moses ʋt ima, Moses Chihowa in tishu pulla hosh ima na ishit abinili tok,

⁹ Aloe Anon okhina ontalaka talaia, yʋmmʋt tʋmaha holihta yosh okhina iklʋna talaia ka ʋttʋt ia hosh Meteba yakni patali mominchi hosh Tibon a̱ ont ʋhli;

¹⁰ Micha Amolait ʋhleha i̱ mi̱ko Sihon, yʋmmʋt Heshbon a̱ a mi̱ko tok in tʋmaha holihta puta moma kʋt Ammon in chipota im ai ʋhli ya̱ ont ʋhli;

¹¹ Micha Kileat, micha Keshulait ʋhleha im ai ʋhli; micha Maachahlait ʋhleha im ai ʋhli, micha Hemon nʋnih ʋt moma, micha Bashan moma hosh Salkah ont ʋhli:

¹² Bashan ʋtta Ok apehlichika moma, yʋmmʋt hatak chaha ishtaiyopi yosh Ashtololh, micha Etlei ita tuklo ka a mi̱ko tok aiena moma kak o̱ ima tok oke: ilʋppa puta ka Moses ʋt issot kanchi cha, i̱ yakni ya̱ im ai ishi tok okʋt,

¹³ Yohmi kia Islael im ʋlla ʋhleha hʋt Keshulait ʋhleha, micha Maachahlait ʋhleha ha̱ aieninchit tihlelit ik kocha wehlo tok; amba Keshulait ʋhleha, micha Maachahlait ʋhleha aiena kʋt Islael a̱ apehʋt aiasha na himak nitak a̱ ant ai ʋhli hoke.

¹⁴ Lefai ai unchololi ak illa ho̱ yakni ai isha he ʋlhpesa ya̱ ik imo tok: im achi tok mak o̱, nan ʋbit luak isht hukmi hosh Islael in Chitokaka Chihowa ya̱ isht ai aiokpʋchi yak osh ai isha he ʋlhpesa yoke.

¹⁵ Mihma Moses ʋt Luben im ʋlla ʋhleha ai unchololi ita kʋshkoa ʋlhpisa ho̱ yakni ai isha he ʋlhpesa ya̱ ima tok.

¹⁶ Micha im ai ʋhli kʋt, Aloe, Anon okhina ontalaka talaia, yʋmmʋt tʋmaha holihta yosh okhina iklʋna talaia, micha Meteba bili̱ka yakni patali moma:

¹⁷ Mikmʋt Heshbon, micha in tʋmaha holihta yakni patali aiasha kʋt moma aiena; Tibon, micha Bamolh‐baal, micha Belh‐baal‐meon,

¹⁸ Micha Chahasa, micha Ketemolh, micha Mefaalh,

¹⁹ Micha Kichalhaim, micha Sibmah, micha Salelh‐shaha okfa bokko talaia,

²⁰ Micha Belh‐peo, micha Ashtolh‐piskah, micha Belhcheshimolh,

²¹ Micha tʋmaha holihta yakni patali aiasha kʋt moma, micha Amolait ʋhleha i̱ mi̱ko Sihon im apehlichika moma, yʋmmʋt Heshbon a̱ a mi̱ko tok ak atuk o̱ micha Mitian i̱ holitompa ʋhleha, Efi, micha Lekem, micha Su, micha Hu, micha Leba, yʋmmʋt Sihon i̱ hochitoka hosh yakni yʋmma a̱sha tuk o̱ aieninchit Moses ʋt fahamʋt kanchi tok.

²² Beo ushi Baalim hatak fʋppo ak kia Islael im ʋlla ʋhleha hʋt bʋshpo falaia ishit ʋbi na illi ka ta̱kla illi tok.

²³ Micha Luben im ʋlla ʋhleha im ai ʋhli kʋt Chatan, micha im ai ʋhli ak atok. Ilʋppak osh tʋmaha holihta puta chuka alokoli puta ai itieshi kʋt Luben im ʋlla ʋhleha hʋt itakʋshkoa ʋlhpisa hosh immi hatok oke.

²⁴ Mihma Moses ʋt yakni ai isha he ʋlhpesa ya̱ Kat ai unchololi ya̱ ima tok; yohmi kʋt Kat im ʋlla ʋhleha hʋt itakʋshkoa ʋlhpisa ho̱ ima tok.

²⁵ Mihma im ai ʋhli kʋt Chase ʋttʋt ia hosh Labbah itikba Aloe ont ʋhli ma, ititakla ya̱ Kiliat tʋmaha holihta ʋt moma, micha Ammon in chipota i̱ yakni ʋt iklʋna aiena;

²⁶ Micha Heshbon a̱ ʋttʋt ia hosh Lamalh‐mispeh, micha Betonim itatuklo ka ont ʋhli; micha Mahanaim a̱ ʋttʋt ia hosh Tebi ya̱ ai ʋhli ka ont ʋhli;

²⁷ Micha okfa ha̱ Belh‐alam, micha Belh‐nimlah, micha Sukkolh, micha Safon, micha Heshbon i̱ mi̱ko, Sihon im apehlichika kashapa kash, Chatan, micha im ai ʋhli, Chatan mish‐tʋnnʋp hʋshi akochaka imma Sinnelolh okhʋta ʋhli fehna ya̱ ont ʋhli tok.

²⁸ Ilʋppak osh tʋmaha holihta puta, chuka alokoli puta ai iti eshi kʋt Kat im ʋlla ʋhleha hʋt itakʋshkoa ʋlhpisa hosh immi hoke.

²⁹ Micha Moses ʋt Manasseh ai onchololi iklʋna ya̱ yakni ai isha he ʋlhpesa ya̱ ima tok: Manasseh ai unchololi, mihma ilʋppak osh iklʋna itakʋshkoa ʋlhpisa hosh immi hatok.

³⁰ Micha im ai ʋhli kʋt Mahanaim a̱ ʋttʋt ia ka Bashan ʋt moma, micha Bashan i̱ mi̱ko, Ok im apehlichika ʋt moma, micha Chai in tʋmaha puta moma, pokoli hannali hosh aiena kʋt Bashan a̱ a̱sha:

³¹ Micha Kiliat ʋt iklʋna, micha Ashtololh, micha Etlei, Bashan ʋtta Ok im apehlichika tʋmaha holihta yosh Manasseh ushi Machi im ʋlla ʋhleha ha̱ immi hatok: Machi im ʋlla ʋhleha iklʋna hosh itakʋshkoa ʋlhpisa hosh immi hatok.

³² Yakni ilʋppa puta Chatan mish‐tʋnnʋp Cheliko bili̱ka hʋshi akochaka imma Moab yakni patali yak o̱ immi ha chi̱ ho̱ Moses ʋt i̱ hopela tok.

³³ Amba Lefai ai unchololi yokʋno Moses ʋt yakni ai isha he ʋlhpesa ik imo tok: im achi tok mak o̱ Islael in Chitokaka Chihowa ak osh ai isha he ʋlhpisa hatok.