Choshua 11 - Chahta Holisso Holitopa 1886

¹ Atuk o̱ yakohmi tok; Haso i̱ mi̱ko Chabin ʋt yʋmma puta ka haklo mʋt, Malon i̱ mi̱ko Chobab, micha Shimlon i̱ mi̱ko, micha Achshaf i̱ mi̱ko,

² Micha nʋnih i̱ falʋmmi imma in tʋnʋp mi̱ko ʋhleha, micha Sinnelolh im oka mahli imma yakni patali, micha okfa, micha hʋshi ai okatula imma To ai ʋhli puta,

³ Micha hʋshi akochaka imma, micha hʋshi ai okatula imma aiena Kenanait okla, micha Amolait okla, micha Hittait okla, micha Pelissait okla, micha Chebusait okla nʋnih foka, micha Mispeh yakni Hifait okla Hemon nuta a̱sha aiena ka anumpa pit i̱ pila tok.

⁴ Mihma okla kohchʋt yʋmma, micha in tʋshka chipota moma, okla laua chinto, laua kʋt okhʋta ʋhli shinuk ai asha kak o̱ chohmi hosh, issuba, micha tʋnʋp iti chanʋlli laua fehna aiena ho̱ ishi cha, ia tok.

⁵ Atuk osh mi̱ko ilʋppa puta kash osh itafama mʋt, Melom oka taloha yak o̱ Islael itiba chi̱ hosh ant ai itiba binachi tok.

⁶ Mihma Chihowa yʋt Choshua ya̱, Yʋmma pulla kak o̱ ik chi nukshopo kashke: onnaha himak a̱ chohmikma, momʋt illit taha yo̱ Islael ibbak a̱ fohki la chi̱ hoke; im issuba puta iyi̱kola̱kshish a̱ ish tʋptulikmʋt, tʋnʋp im iti chanʋlli puta ka luak isht ish hukma chi̱ hoke, im achi tok.

⁷ Yohmi ho̱ Choshua ʋt okla tʋnʋp a̱ya moma kʋt api̱ha ho̱, mintit Melom oka taloha yak o̱ ashali̱ka ant itibit okla o̱ yihlepa tok.

⁸ Mihma Chihowa hʋt Islael ibbak a̱ fohki na issot kanchi cha, ahliyuhʋt isht a̱yʋt Siton chito, micha Mislefolh‐maim, micha hʋshi akochaka imma Mispeh okfa ha̱ isht ona tok; micha ahambi cha, achʋfa kia ik in hlakofecho ki tok.

⁹ Mihma Choshua ʋt Chihowa yʋt i̱ mi̱ha tuk mak o̱ yʋmihchi hosh, issuba iyi̱kola̱kshish a̱ tʋptuli mʋt, tʋnʋp im iti chanʋlli puta ka luak isht hukmi tok.

¹⁰ Mihma nitak yʋmmak o̱ Choshua ʋt falama mʋt, Haso ya̱ ishi cha, i̱ mi̱ko ya̱ bʋshpo falaia isht ʋbi tok; cha̱shpo ka Haso ak osh apehlichika yʋmma moma ka i̱ noshkoboka hatok oka.

¹¹ Mihma shilombish moma yʋmma aiasha tuk a̱ bʋshpo falaia halupa isht ʋbit tahlit ʋmohmichi tok: fiopa chi̱ ka achʋfa kia ik hlakofecho tok: micha Haso ya̱ luak isht hukmi tok.

¹² Micha mi̱ko ʋhleha yʋmma in tʋmaha holihta puta, micha i̱ mi̱ko moma ka Choshua ʋt ishi cha, bʋshpo falaia halupa isht issot kanchi cha Chihowa in tishu Moses ʋt im apesa tok mak o̱, okpʋnit ʋmohmichi tok.

¹³ Amba tʋmaha holihta puta kʋt i̱ bokko o̱ hiohma̱ya kʋllo moma kʋno Islael ʋt achʋfa kia ik hukmo hosh Haso ak illa tok: yʋmmʋno Choshua ʋt hukmi tok.

¹⁴ Micha tʋmaha holihta ilʋppa puta ka na wehpoa moma, micha wak aiena kʋno Islael im ʋlla ʋhleha hʋt immi ha chi̱ hosh ishi tok: amba hatak puta kʋno, bʋshpo falaia halupa isht issot ont kanchi cha, fiopa chi̱ ka achʋfa kia okla ik hlakofecho tok.

¹⁵ Chihowa yʋt Moses a̱ im apesa tok mak o̱, Moses ʋt Choshua ya̱ im apesa tok; mihma yʋmmak o̱ Choshua ʋt yʋmihchi tok: Chihowa yʋt nana moma Moses a̱ im apesa tok a̱ ik a tahlo kʋt iksho ki tok.

¹⁶ Yʋmohmi hosh Choshua ʋt yakni yʋmma moma ka ishi kʋt, nʋnih foka, micha oka mahli yakni moma, micha Koshen yakni moma, micha okfa, micha yakni patali, micha Islael i̱ nʋnih puta, micha yʋmmak inli okfa;

¹⁷ Sei pilla ia ka Halak nʋnih ha̱ ʋttʋt ia hosh, Lebanon okfa, Hemon nʋnih nuta Baal Kat ont ʋhli ka ishi tok: micha i̱ mi̱ko moma ka ishi cha, fahamʋt ʋbit tahli tok.

¹⁸ Choshua ʋt mi̱ko ʋhleha puta yʋmmak ash in tanampi na nitak hopaki tok.

¹⁹ Tʋmaha holihta achʋfa kia Islael im ʋlla ʋhleha ha̱ ik it i̱ nanaiyo, amba Hifait okla Kibeon a̱sha kʋt ak illa tok: inla moma kʋno it in tanampi hosh ishi tok.

²⁰ Chihowa ak osh ahni hosh chu̱kʋsh a̱ kʋllochi na Islael a̱ ant itiba chi̱ hatok; yʋmohmi ho̱ ʋbit tahlit ʋmohmicha chi̱ hatok; micha Chihowa ʋt Moses a̱ im achi tok mak o̱ i̱ nukha̱klo keyu hosh, amba okpʋnit tahla chi̱ hatok.

²¹ Micha nitak yʋmma foka kak o̱ Choshua ʋt ona cha, Anakim a̱ nʋnih foka, Heblon, Tebi, Anab, micha Chutah i̱ nʋnih chaha moma, micha Islael i̱ nʋnih chaha moma ka ai ʋbit tahli tok: Choshua ʋt in tʋmaha holihta puta aiena ka okpʋnit ʋmohmichi tok.

²² Islael im ʋlla ʋhleha i̱ yakni ya̱ Anakim achʋfa kia ik hlakofecho tok: Kasa, Kalh, micha Ashtot ak illa ho̱ a̱sha tok.

²³ Chihowa yʋt Moses a̱ im ahanchi tok mak o̱, Choshua ʋt yʋmihchit yakni ya̱ mominchit ishi tok; micha immi ha chi̱ ho̱ Islael a̱ ishtatia ka itakʋshkoa ʋlhpisa mak o̱ ima tok. Mihma yakni ʋt itin tanampi ka issʋt foha tok.