Choshua 10 - Chahta Holisso Holitopa 1886

¹ Atuk o̱ yakohmi tok, Choshua ʋt Ai ya̱ ishi cha, okpʋnit ʋmohmichi tuk ʋt Cheliko, micha i̱ mi̱ko ya̱ kaniohmichi tuk ʋt, chohmichit Ai, micha i̱ mi̱ko ya̱ yʋmihchi tuk: micha Kibeon okla hʋt Islael a̱ it i̱ nanaiya cha, ibʋlhto ho̱, Chelusalem i̱ mi̱ko Atoni‐setek ʋt haklo mʋt;

² Kibeon ʋt tʋmaha holihta mi̱ko in tʋmaha holihta chohmi, micha chito kʋt Ai ya̱ i̱ shahli, micha yʋmma hatak ai asha kʋt hlampko, micha chilita hatuk o̱, okla nukshopa fehna tok.

³ Yʋmohmi hatuk osh Chelusalem i̱ mi̱ko Atoni‐setek ʋt Heblon i̱ mi̱ko Hoham, micha Chamulh i̱ mi̱ko Pilam, micha Lachish i̱ mi̱ko Chafia, micha Eklon i̱ mi̱ko Tebi aiena ka anumpa pit i̱ pila cha,

⁴ Mintit hʋs sʋm ʋla cha, hʋs si apela na Kibeon a̱ il ishi cha, e mosholichashke: Choshua, micha Islael aiena ka it i̱ nanaiya hoka, achi tok.

⁵ Yʋmohmi ho̱ Amolait okla i̱ mi̱ko tahlapi, Chelusalem i̱ mi̱ko, Heblon i̱ mi̱ko, Chamulh i̱ mi̱ko, Lachish i̱ mi̱ko, Eklon i̱ mi̱ko aiena kash osh iti hoyʋt itʋnaha tok; micha yʋmma, mikmʋt in tʋshka chipota puta aiena kʋt Kibeon itikba ya̱ binanchi cha, in tanampi tok.

⁶ Mihma Kibeon hatak ʋhleha hʋt Choshua ʋt Kilkal ʋlbina anta tuk o̱, anumpa pit i̱ pila mʋt, Chin tishu, ʋhleha ha̱ ish halʋlli kʋt chibbak a̱ ish mokoffi ná; tu̱shpʋt pim ʋla cha, pi apelʋt, ish pi hlakofichashke: Amolait okla i̱ miko ʋhleha moyuma nʋnih foka aiasha kʋt, iti hoyot itʋnaha cha, pin tanampi hoka, achi tok.

⁷ Yohmi ma Choshua, micha hatak tʋnʋp a̱ya puta, micha hatak hlampko hochukma chilitʋt nukwia iksho puta aiena kʋt Kilkal a̱ ashʋt ia tok.

⁸ Mihma Chihowa ʋt Choshua ya̱ Ish i̱ nukshopa ná: chibbak a̱ fohki li mak oka; hatak achʋfa kia chi tikba ya̱ hikia he keyu hoke, im achi tok.

⁹ Yʋmohmi hatuk o̱ Choshua ʋt Kilkal ʋttʋt ninak a̱ a̱ya na hlopullit, ashali̱ka im ona tok.

¹⁰ Mihma Chihowa yʋt Islael itikba ya̱ komuntʋchit tihleli tok; micha Kibeon a̱ lauachit ai ʋbi cha, hliolit Belhholon ata̱ya hina isht a̱ya cha, ahambit Asekah, micha Makketah ita tuklo ka isht ona tok.

¹¹ Atuk o̱ yakohmi tok, Islael itikba ya̱ yihlepa cha, Belhholon a̱ okʋtahʋt ia ma, Chihowa hʋt hata̱fo hochito ʋba et onochit, Asekah isht ona na okla illi tok: hata̱fo isht illi kak osh Islael im ʋlla ʋhleha hʋt bʋshpo falaia isht ʋbi tuk a̱ i̱ shahli tok.

¹² Yʋmohmi ma Choshua ʋt nitak yʋmma Chihowa ʋt Amolait okla ha̱ Islael im ʋlla ʋhleha ibbak fohki ma, Islael im ʋlla ʋhleha hʋt pi̱sa ho̱, Chihowa ya̱ im anumpulit, Hʋshi chia hʋt Kibeon paknaka peh lumʋt ish hikiashke; mikma, Hʋshi ninak a̱ya chia hʋt Achalon okfa ha̱ ish hikiashke, achi tok.

¹³ Mihma hʋshi ʋt lumʋt hikia ma, hʋshi ninak a̱ya yʋt talaia na okla hash osh in tʋnʋp a̱ okla il ai okha tok. Ilʋppʋt Chashe i̱ holisso ha̱ aholisso keyu cho? Yohmi hosh hʋshi ʋt shutik iklʋna hikia cha, nitak achʋfa ho̱ tu̱shpʋt ik okatulo ki tok.

¹⁴ Chihowa ʋt hatak im anumpa ha̱ a haiyaklo tok nitak yʋmma chohmi kʋt tikba, micha i̱ himmak a̱ iksho ki tok: Chihowa yʋt Islael a̱ im itibi hatuk oka.

¹⁵ Mihma Choshua ʋt, micha Islael moma kʋt api̱ha ho̱, falamʋt, ʋlbina Kilkal a̱ ona tok.

¹⁶ Yohmi kia mi̱ko tahlapi ilʋppak ash osh yihlepa cha, tʋli chiluk Makketah hikia ka a luma tok.

¹⁷ Atuk o̱ Choshua ya̱ im anolit, Mi̱ko tahlapi kash osh hichukbi Makketah hikia ka a luma hosh a̱shʋt haiakʋshke, achi tok.

¹⁸ Mihma Choshua ʋt, Tʋli hochito hichukbi a̱ hʋsh on tonullichashke; yohmi cha atona chi̱ ka hatak hʋsh hiohlechashke:

¹⁹ Micha hʋsh hieli ná, amba hʋchin tʋnʋp a̱ hliolit, olbʋl a̱ya ka ʋbit hʋsh tahlashke; in tʋmaha holihta puta ka ik chukowá hʋch ik im ahno kashke: Chitokaka hʋchin Chihowa ʋt hʋch ibbak a̱ fohki hatuk oka, achi tok.

²⁰ Atuk o̱ yakohmi tok, Choshua micha Islael im ʋlla ʋhleha hʋt ahambi fehna kʋt ont tahli na taha ma, yʋmma i̱ hlako̱fi kʋt tʋmaha puta aholihta kʋllo ya̱ ont chukowa tok.

²¹ Mihma okla moma kʋt falamʋt Choshua ya̱ im onʋt, Makketah ʋlbina ha̱ achukma̱kʋt ona tok: Islael im ʋlla ʋhleha ha̱ kanima i̱ sanalit achʋfa kia isunlʋsh a̱ ilhkolechi tok keyu hoke.

²² Mihma Choshua ʋt, Hichukbi ya̱ tiwi cha, mi̱ko tahlapi yʋmmak ash hichukbi ya̱ ai ishit kohchit isht hʋs sʋm ʋlashke, achi tok.

²³ Mihma okla yʋmihchi tok; micha mi̱ko tahlapi, Chelusalem i̱ mi̱ko, Heblon i̱ mi̱ko, Chamulh i̱ mi̱ko, Lachish i̱ mi̱ko, micha Eklon i̱ mi̱ko aiena yʋmmak ash hichukbi a̱ a kohchit isht im ʋla tok.

²⁴ Atuk o̱ yakohmi tok; mi̱ko ʋhleha yʋmmak ash Choshua ya̱ isht im ʋla ma, Choshua ʋt Islael hatak ʋhleha moma ka i̱howa cha, hatak tʋnʋp a̱ya i̱ kʋpitʋni ʋhleha apehʋt a̱ya tuk a̱, Bili̱ka ʋlʋt, mi̱ko ʋhleha ilʋppa ikunla ya̱ hʋch iyi ya̱ hʋsh o̱ hilechashke, im achi tok. Mihma bili̱ka okla ʋla cha, ikunla ya̱ iyi ya̱ o̱ hilechi tok.

²⁵ Mihma Choshua ʋt, Ik hʋchi nukshopo kashke, hʋchi chu̱kʋsh ik iello kashke, kʋllot hʋchim anukfila cha nukwia ikshot hʋsh amosholashke: hʋchin tʋnʋp puta hʋch itibi ka Chihowa yʋt yakohmicha chi̱ hoka, im achi tok.

²⁶ Yohmi hayʋt Choshua ʋt, fahamʋt ʋbi cha, iti tahlapi ho̱ atakohlichi tok: mihma iti ya̱ atakohli na opia tok.

²⁷ Atuk o̱ yakohmi tok, hʋshi ʋt okatula ma, Choshua ʋt i̱ miha ma, iti a takohli tuk a̱ akʋchi cha, hichukbi a lumboa tuk ak o̱ pit pila cha, tʋli hochito hichukbi paknaka kahpuli tok o̱, himak nitak fehna chiffo̱ko hoke.

²⁸ Yohmi ma nitak yʋmma Choshua ʋt Makketah ya̱ ishi cha, bʋshpo falaia halupa isht issot kanchi tok: micha mi̱ko ya̱ mosholichit ʋmohmichi mʋt, yʋmma, micha shilombish yʋmma aiasha tuk aieninchi tok; achʋfa kia ik hlakofecho ki tok: micha Cheliko i̱ mi̱ko ya̱ yʋmihchi tuk a̱ chohmichit Makketah i̱ mi̱ko ya̱ yʋmihchi tok.

²⁹ Mihmʋt Choshua ʋt, micha Islael moma kʋt api̱ha ho̱, Makketah ya̱ a̱shʋt ia mʋt, Libnah ya̱ ona cha, Libnah ya̱ itibi tok.

³⁰ Mihma Chihowa ʋt yʋmmak kia, i̱ mi̱ko aiena ka Islael ibbak a̱ fohki tok: mihma yʋmmak ash, micha shilombish moma yʋmma anu̱kaka aiasha tuk aiena ka bʋshpo falaia halupa isht issot kanchi tok; achʋfa kia ik hlakofecho tok; amba i̱ mi̱ko ya̱ Cheliko i̱ mi̱ko ya̱ yʋmihchi tuk mak osh chohmichi tok.

³¹ Mihmʋt Choshua ʋt, micha Islael moma kʋt api̱ha ho̱, Libnah ya̱ a̱shʋt ia mʋt, Lachish a̱ ona tok; micha ont a binachi cha, itibi tok.

³² Mihma Chihowa yʋt Lachish a̱ Islael ibbak a̱ fohki na nitak atukla ma ishi cha, yʋmmak ash, micha shilombish yʋmma anu̱kaka aiasha tuk aiena ka bʋshpo falaia halupa isht issot kanchi tok; Libnah ya̱ yʋmihchi tuk moma mak inli ho̱ chohmichi tok.

³³ Yohmi ma Kese i̱ mi̱ko Holam ʋt Lachish a̱ apela chi̱ hosh ʋla tok; mihma Choshua ʋt yʋmmak kia, micha im okla aiena ka ʋbit tahli cha, achʋfa kia ik i̱ hlakofecho ki tok.

³⁴ Mihmʋt Choshua ʋt, micha Islael moma kʋt api̱ha ho̱, Lachish a̱ a̱shʋt ia mʋt, Eklon a̱ ona tok: micha okla a binachi cha, itibi tok.

³⁵ Micha nitak yʋmma okla ishi cha, bʋshpo falaia halupa isht issot kanchi tok; micha nitak yʋmma shilombish moma yʋmma anu̱kaka aiasha tuk a̱ ʋbit tahlit ʋmohmichi tok: Lachish a̱ yʋmihchi tuk moma mak inli ho̱ chohmichi tok.

³⁶ Mihmʋt Choshua ʋt, micha Islael moma kʋt api̱ha ho̱, Eklon a̱ a̱shʋt ia mʋt, Heblon a̱ ona cha, itibi tok.

³⁷ Micha yʋmmak ash, micha i̱ mi̱ko atuk, micha in tʋmaha holihta puta, micha shilombish moma yʋmma anu̱kaka aiasha hatuk aienaka okla ishi cha, bʋshpo falaia halupa isht issot kanchi tok; Eklon a̱ yʋmihchi tuk akinli ho̱ chohmichit achʋfa kia ik hlakofecho tok: amba yʋmmak ash ʋmohmichit okpʋni cha shilombish yʋmma aiasha tuk a̱ mominchit ʋbit tahli tok.

³⁸ Mihma Choshua ʋt, Islael moma kʋt api̱ha ho̱, falamʋt Tebi ya̱ ona cha, itibi tok.

³⁹ Mihmʋt ishi cha, i̱ mi̱ko atuk, micha in tʋmaha holihta puta aiena ka ishi mʋt, bʋshpo falaia halupa isht issot kanchi tok; micha shilombish moma yʋmma anu̱kaka aiasha tuk a̱ lushummit ʋbit tahli, achʋfa kia ik hlakofecho tok: Heblon a̱ yʋmihchi tuk, micha Libnah ya̱, mikmʋt i̱ mi̱ko atuk aiena ka yʋmihchi tuk mak o̱ chohmichit, Tebi, micha i̱ mi̱ko aiena ka yʋmihchi tok.

⁴⁰ Yohmi hosh Choshua ʋt nʋnih foka yakni moma, micha oka mahli pilla, micha okfa, mikmʋt kʋli foka, micha i̱ mi̱ko atuk moma ka issot kanchi tok: achʋfa kia ik hlakofecho hosh, amba Islael in Chitokaka Chihowa yʋt im apesa tuk mak osh fihompa moma ka okpʋnit ʋmohmichi tok.

⁴¹ Mihma Choshua ʋt Katesh banea ya̱ ʋttʋt Kasa ont ʋhli, micha Koshen yakni moma Kibeon ont ʋhli aiena ka issot kanchi tok.

⁴² Micha mi̱ko ilʋppa puta, mikmʋt i̱ yakni ya̱ Choshua ʋt himonna achʋfa ho̱ ishi tok; Islael in Chitokaka Chihowa ak osh Islael a̱ im itibi hatuk oka;

⁴³ Mihmʋt Choshua ʋt, Islael moma kʋt api̱ha ho̱, falamʋt ʋlbina Kilkal a̱ talaia ka ona tok.