Choshua 1 - Chahta Holisso Holitopa 1886

¹ Moses, Chihowa in tishu hʋt illi haya̱, yakohmi tok, Chihowa ʋt Choshua Nun ushi, Moses in tishu hatuk a̱ im anumpulit,

² Moses an tishu hʋt illishke; yohmi hoka himak a̱ wakaya cha, chishno, okla ilʋppa hʋsh moma kʋt Chatan ilʋppa mish‐tʋnnʋp yakni yʋmma Islael im ʋlla ʋhleha yʋmmak o̱ ima li hoka, hʋsh onashke.

³ Yakni moma hʋch iyi pʋtha yʋt ai o̱ hika he puta hokʋno, yʋmma moma ka hʋch ima lishke, yʋmmak o̱ Moses a̱ im achi li hatuk okʋt.

⁴ Yakni haiaka ya̱ hikiʋt ia hosh Lebanon ilʋppa ona cha, okhina chito, okhina Euflates pit afullotʋt, Hitait i̱ yakni ʋt moyuma hosh, okhʋta chito hʋshi ai okatula imma itoyula ka ilʋppak o̱ ont hʋchim ai ʋhla hi oke.

⁵ Chi okcha̱yʋt ish ahanta nitak moma ka hatak nana kia chi tikba hikia he keyushke: Moses a̱ awant a̱ya li tok ʋt, yʋmmak inli ho̱ chohmit chi awant a̱ya la chi̱ hoke: nana ka ak chim ai a̱hlot chissa la he keyu hoke.

⁶ Kʋllot chim anukfila cha, nukwia ikshot ish amosholashke: yakni ilʋppa ima la hi ʋt i̱ki ʋhleha ha̱ anumpa kʋllo isht il onochit im ihi̱ssa li tok a̱, okla ilʋppa immi hachi̱ mak o̱ ish it akʋshkola chi̱ hokʋt.

⁷ Peh kʋllot chim anukfila cha, nukwia ikshot ish amosholi fehnashke; yohmi hosh nan ʋlhpisa moma an tishu Moses ʋt chim apihi̱sa tok a̱ ahah! ahnit ish holitoblashke; ilʋppa isht impak imma hokmá, ʋlhfʋbekimma hokmá nana kia chik i̱ filʋmmo kashke; chi yʋmohmi pulla hosh kanima ish a̱ya puta kʋt chim ai achukma hi oke.

⁸ Nan ʋlhpisa holisso ilʋppʋt chitih ha̱ ik i̱ filʋmmo kashke; amba nitak micha ninak moma ka anukfihinli hosh a holihi̱so ka moma ahah! ahnit ish holitoblashke: ish yohmi hok mak osh ish ata̱ya ya̱ ish ai a̱hlicha hi okʋt, micha ish yohmi hok mak osh nana kʋt chim ai a̱hli achukma hi oke.

⁹ Ʋno ak osh chim apesa li tuk keyu cho? kʋllot chim anukfila cha, nukwia ikshot ish amosholashke: ik chi nukshopo kashke, micha chi chu̱kʋsh ik iello kashke: kanima ish a̱ya puta ka Chitokaka chin Chihowa ʋt chi awant a̱ya hoka, achi tok.

¹⁰ Mihma Choshua ʋt okla pehlichi ʋhleha ha̱ nan im apesʋt,

¹¹ Binah ha hlopullit a̱yʋt, okla ha̱ nan i̱ mihʋt, Pinak ʋt hʋchim ʋlhtahashke; nitak tuchina ta̱kla ka Chatan ilʋppa hlopullit, Chitokaka hʋchin Chihowa ʋt hʋchimmi ha chi̱ ho̱ yakni hʋch ima hoka ont chukowʋt hʋsh isha chi̱ hoke, achi tok.

¹² Mihmʋt Luben ishtatiaka, micha Kat ishtatiaka, mikmʋt Manasseh ishtatiaka ya̱ iklʋna aiena ka Choshua ʋt im anumpulit,

¹³ Moses Chihowa in tishu hʋt nana hʋchi̱ mihʋt, Chitokaka hʋchin Chihowa ʋt afoha hʋch ima hosh yakni ilʋppa hʋch ima hoke, achi tok anumpa ha̱ hʋsh ithaiyanashke.

¹⁴ Hʋchi tekchi, hʋchim ʋlla, micha hʋchi̱ nan ʋlhpoa moyuma kʋto yakni Moses ʋt hʋch ima tok Chatan ola in tʋnnʋp ak inli ho̱ aiashashke: amba hʋchishno hatak hlampko hochukma chilitʋt nukwia iksho hʋchia hokʋto, nahalupa im ʋlhtahʋt moyumʋt tikba iʋt, hʋch itibapishi ʋhleha ha̱ ont hʋsh apelashke.

¹⁵ Yohmi na Chihowa ʋt afoha hʋch ima tok ʋt chohmichit hʋch itibapishi ʋhleha ha̱ afoha imashke; yohmi na yʋmmak kia yakni Chitokaka hʋchin Chihowa ʋt ima ka ishashke: yohmi hok mak o̱ falamʋt yakni hʋshi akochaka imma Chatan ola in tʋnnʋp talaia Moses, Chihowa in tishu hʋt hʋch ima tok a̱ ant hʋsh iesha hi oke, achi tok.

¹⁶ Mihma okla afalamichit Choshua ash o̱, Nana ho̱ ish pi̱ miha ka moyuma e yʋmohma he bano hoke, micha kanima ho̱ pit ish pi tihlelikma, il ia he bano hoke.

¹⁷ Moses a̱ nana moyuma ka il i̱ haponaklo beka tok okʋt, chishno ma e chi̱ haponakla he bano hoke: peh Chitokaka chin Chihowa ʋt Moses a̱ awant a̱ya beka tok ʋt, chohmit chishno ma chi awant a̱ya hokbano, il ahnishke.

¹⁸ Kʋna hoh kia chi̱ nan ʋlhpisa ha̱ i̱ sanalit nana ish i̱ miha ka anumpa moma ik chi̱ haponaklokmʋt, illashke: peh kʋllot chim anukfila cha, nukwia ikshot ish amosholashke, im achi tok.