Chemis 5 - Chahta Holisso Holitopa 1886

Chihowa yʋt na palʋmmi isht im atobbi yoka, hatak nan in laua nan ashʋchi ʋt i̱ nukshohompashke, 1, 7 Chob atok a̱ nan im ai ithʋnʋt nana kʋt ik pʋlʋmmi kia nuktaiyala he tuk; 13 nana kʋt palʋmmi ka anumpa ilbʋsha yo̱ anumpohonlikmʋt, anonti nana kʋt isht im achukmakmʋt ʋba taloa isht talohowashke; 16 pishno na kil aia̱hlo nukha̱klot il itim anohonla he tuk, micha ʋba isht it anumpohonla he tuk, 19 itibapishi nan ashʋchi tuk a̱ falʋminchit nan ai a̱hli ka a hilechi aina hi a̱ isht anumpuli.

¹ Inta! hatak nan in laua hʋchia ma! na palʋmmi hʋch on itula chi̱ kʋt, nishkin okchi mintit chitoli hosh hʋsh yaha̱yashke.

² Nana laua hʋchim ai asha tuk ʋt toshbit taha ma, hʋchi̱ na fohka puta ka shu̱shi ai ʋpa bano hoke.

³ Hʋchin tʋli holisso lakna, micha hʋchin tʋli holisso hʋta aiena kʋt laknʋt taha: yohmi kʋt lakna yʋmmak atuk ʋt nan isht hʋchi atokola he; mikmʋt luak o̱ chiyuhmit hʋchi nipi a̱ ahampa chi̱ hoke. Nitak hʋchim ishtaiyopik mak a hi a̱ hʋchim ila̱yak a̱ hʋsh itahobi tuk oke.

⁴ Yakeh! toksʋli ʋhleha hʋchim osapa puta nana ai ʋmo tuk isht ʋlhtoba he tuk, yʋmmak oka hʋchishno ak osh nana ik ʋlhpesalot falaminchit hʋsh ishi tuk a̱, pa̱ha̱yʋshke: yohmikma nan ʋmo tuk ʋhleha pa̱ya kʋt Sabaolh Chitokaka haksobish a̱ ont chukowa hoke.

⁵ Nan isht aiyukpa il impa in lauʋt, haui toba hosh yakni pakna ya̱ hʋsh ma̱ya tuk: ʋlhpoba illa chi̱ hokʋt ilhpihinta chatuk mak o̱, itilauechit hʋchi chu̱kʋsh a̱ hosh ipihinta tuk oke.

⁶ Hatak ai ʋlhpiesa yatuk a̱ anumpa onochit hʋsh bi tok; yohmi kia yʋmmak okʋt ik hʋchi̱ sanalo ki̱sha hoke.

⁷ Yohmi hoka itibapishi li ʋhleha ma! nukchintot hʋsh hoyo na Chitokaka yʋt ʋlashke. Yakeh! hatak osapa toksʋli ʋt nan ʋni hochukma yakni a waya ka anukfillit hoho̱yo; yohmi kʋt yʋmma ahni kʋt nukchintot falaiachi hosh, ʋmmona micha ont ishtaiyopi aiena ka im on umba chatuk oke.

⁸ Yohmi ka hʋchishno ak kia nukchintot hʋchi chu̱kʋsh a̱ ai a̱hlichit hʋsh hlampkochashke: Chitokaka ʋt ai ʋla he tuk ʋt atukonofʋt taha hoke.

⁹ Nanasi kia isht hʋch ik it i̱ potʋnno kashke, itiba pishi li ʋhleha ma! yʋmmak keyukmʋt nana isht hʋchim ʋlhpisa hinla hoke. Yakeh! nan apesa yʋt okhissa itikba ya̱ hikia hoke.

¹⁰ Itibapishi li ʋhleha ma! hopaii Chitokaka i̱ hohchifo pulla hatuk mak o̱ anumpohonli tok ʋhleha hʋt na palʋmmi pisa, micha nukchinto tok puta mak o̱ nan isht ithanʋt hʋsh hobacha chi̱ kʋt hʋsh anukfillashke.

¹¹ Yakeh! kʋna hosh nuktanlʋt achunanchi mak o̱ yʋmmak okʋt na yukpa, il ahni chatuk. Chob ʋt nuktanlʋt achunanchi tok okʋno hʋsh ha̱klo chatuk: yohmi cha Chitokaka nana ai ahni tok ash hʋsh akostininchi: yohmi kʋt Chitokaka yʋt nan i̱ nukha̱klo fehna, micha i̱ kana fehna hoka hʋsh akostininchiske:

¹² Yohmi kia itibapishi li ʋhleha ma! ik kaniohmi nana kia ʋba shutik, keyukmʋt yakni, keyukmʋt anumpa kʋllo isht ai ʋlhpisa inla nana kia anumpa kʋllo ai isht hʋch ik il onocho kashke: amba yau, hʋsh achikma, ik ai a̱hli; mikmʋt keyu, hʋsh achikma, keyu mak ashke: yʋmmak keyukma nan isht hʋchim ʋlhpisa hʋt hʋchi on itula hi oke.

¹³ Kʋna kia na palʋmmi pisa kʋt hʋchi takla ahanta cho? yohmikmʋt ʋba pit anumpohonlashke; kʋna kia na yukpa kʋt a̱sha̱? yohmi hokmʋt ʋba isht taloa mak o̱ isht taloashke.

¹⁴ Kʋna kia abeka kʋt hʋchi takla ahanta cho? yohmi hokmʋt ilap ak osh iksa pehlichi ʋhleha ha̱ hoyashke: yohmikma yʋmmak ash osh ʋba isht anumpulit, Chitokaka i̱ hohchifo ho̱ nan ahama ya̱ okla ahʋmmichashke.

¹⁵ Yohmi hokma na yimmi hosh ʋba isht anumpuli pulla kak osh abeka ya̱ hlakoficha he; mikma Chitokaka yʋt yʋmmak ash tanicha hi oke: mikma nana ho̱ ai ashʋchi tuk ok mak heno i̱ kashofa he mak oke.

¹⁶ Nan hʋsh ai ashʋchi pʋta ka hʋchishno bi̱ka yʋt hʋsh it im anohonlashke; mikmʋt hʋchi hlakofa chi̱ kʋt, ʋba isht hʋsh it im anumpuli pullashke. Hatak ai ʋlhpiesa hosh na yimmi hosh ʋba pit anumpohonli kʋt nana ka ai a̱hlichi fehna chatuk oke.

¹⁷ Elias ʋt hatak im anukfila im a kaniohma he ʋt hʋpishno ak inli chohmi tok; yohmi hatuk osh ik umbo ka hi a̱ ai a̱hli fehnʋt ʋba pit anumpohonli tok; yohmi ma yakni yʋmma ik ai umbo ho̱ afʋmmi tuchina cha hʋshi hannali aiena tok.

¹⁸ Yohmi ma anonti yʋmmak ash inli hosh ʋba pit anumpohonli ma, Chitokaka yʋt umbachi na yakni a̱ nana kʋt a waha̱ya tok.

¹⁹ Itibapishi li ʋhleha ma! hʋsh kanima hosh ʋbanumpa ha̱ i̱ filʋmmit hʋsh a̱ya na anonti achʋfʋt nukfohkichit falaminchi hokma,

²⁰ Kʋna hosh hatak nan ashʋchi ʋt yoshubʋt ata̱ya tuk a̱ nukfohkichit falaminchi hokʋt, yʋmmʋt hatak shilombish a̱ ai illi ya̱ a hlakoficha he; mikmʋt nan ai ashʋchika laua ho̱ ompohoma he aiena hoka ithaiyanashke.