Chemis 4 - Chahta Holisso Holitopa 1886

Nan ashʋchi il‐aiyuka ka ahah! im ahna he i̱ miha, 1; 13 mihmʋt nan okcha̱ya ilʋppʋt ont ataha kia kil ithano, yohmi hokʋt pishno, micha nana ho̱ il, ieshi moma kʋt Chihowa hosh nan ai ahni kak a chi̱ ka il im asilhhashke.

¹ It in tanampi, micha itibi puta kʋt hʋchi takla ya̱ takali kʋt, katima ko̱ a toba cho? hʋchishno hʋchi haknip isht ai yukpa he ahni kʋt hʋchi haknip a̱ a tanahampi kak o̱ a toba ilʋppak o̱ keyu̱?

² Nana ka hʋchi bʋnna fehna ho kak osh hʋch ik esho; hʋsh bi mʋt, ishi ka hʋchi bʋnna kia, hʋsh isha hi o̱ keyushke; itibit it in tanampi aienʋt hʋsh aiasha kia, hʋch ik asilhho kak okʋt, hʋch ik eshoshke.

³ Hʋsh asilhha kia, hʋch ik esho; yʋmmak oka hʋchishno hʋchi haknip isht ai yukpa he ahni pulla kak o̱ isht yopomot hʋsh tahla chi̱ kʋt, ai ʋlhpiesa keyu ho̱ hʋsh asilhha hokʋt.

⁴ Hatak haui, ohoyo haui ʋhleha hʋchia hʋt yakni anushkunna hokʋto, Chihowa ha̱ in tanampi chatuk a̱, hʋch ik ithano cho? Yohmi hoka kʋna hoh kia yakni a̱ it i̱ kanʋt ahanta chi̱ mak okmʋt, Chihowa ha̱ in tʋnʋp oke.

⁵ Chu̱kʋsh pi anukfo̱ka kak osh il it i̱ potʋnna hi a̱ ahni ka Holisso Holitopa ʋt achi ka, ik a̱hlo ho̱ hʋchim ahobo cho?

⁶ Yohmi kia yʋmmak okʋto i̱ shahlichit isht i̱ kana ya̱ ima hoke; yohmi hatuk osh Chihowa hʋt ilefehnʋchi puta ka i̱ sanalikmʋt, amba chu̱kʋsh akanlosi yokʋno i̱ kanʋt apelahanchi, achi hoke.

⁷ Yohmi hoka Chihowa ak o̱ hʋsh il im issa cha, hʋsh im antiashke. Nan isht a hullo okpulo a̱ hʋsh i̱ sanalashke, yohmikma yʋmmak okʋt hʋch i̱ kanulla hinla hoke.

⁸ Chihowa ai i bili̱ka pit hʋsh kanʋllashke, yohmikma ilap mʋt hʋchi̱ bilincha chi̱ hoke. Nan ashʋchi ʋhleha hʋchia hʋt hʋch ibbak a̱ hʋsh kashofikma, anonti im anukfila mia tuklo hʋchia mʋt hʋchi chu̱kʋsh a̱ hʋsh kostininchashke.

⁹ Il ilbʋshachit nukha̱klot yaiyʋt hʋsh ai ashashke; yukpʋt hʋsh ai asha tuk a̱ na ya̱ya tobakma, na hʋchi yukpa yatuk ʋt chu̱kush isht nukhaklo yo̱ tobashke.

¹⁰ Chitokaka itikba ya̱ a hʋsh il akanlosechashke; yohmikma yʋmmak okʋt halʋllit hʋchi wakela chi̱ hoke.

¹¹ Itibapishi li ʋhleha ma! hʋchishno hʋchi bi̱ka ya̱ nan it i̱ mihachit hʋch ik anumpulo kashke. Kʋna hosh itibapishi ha̱ na mihachit anumpuli kʋt itibapishi hash o̱ anumpa onochi hokʋt, nan ʋlhpisa ak o̱ nanumachi, micha nan ʋlhpisa hash o̱ kanimanchi mak oke; amba nan ʋlhpisa ya̱ ish kanimanchi hokmʋt, nan ʋlhpisa ya̱ holitobli mak o̱ chia keyu, amba nan ʋlhpisa kanimanchi mak o̱ chia hoke.

¹² Nan ʋlhpisa ikbi ʋt yʋmmak okʋto okchalinchi, micha ʋbi aiena kʋt im ai ʋlhpesa he bano mak osh achʋfa kʋt a̱shʋshke; chishno ak osh kʋta chia hatuk osh inla ya̱ anumpa ish onochi cho?

¹³ Inta! himak nitak, onna ha̱ kanima ka tʋmaha yʋmmak o̱ il ona cha, afʋmmi achʋfa ka yʋmmak o̱ a̱shwʋt, nan ita tobʋt nan isht ahayuchit il aha̱shwashke, achi hʋchia ma!

¹⁴ Onna ha̱ nana a kaniohma hi a̱ hʋsh ithana keyu kʋt. Hʋchim ilhfiopak ʋt nanta ho̱? oka shobulli yʋmmak okʋt chekosi takla hokʋno otʋni tuk osh kʋnia chatuk a̱, yʋmmak o̱ iti̱laui hoke.

¹⁵ Yohmi hoka Chitokaka ak osh yʋmma ahni hokma, pi okcha̱ya cha ilʋppa, keyukmʋt yʋmma kanima ka pi yʋmohma chi̱ chishke, hʋsh acha he tuk oke.

¹⁶ Amba himak okʋno hʋchishno hʋsh il atambli kak osh isht hʋchi yukpʋshke; nan isht ai yukpa yʋmma chohmi puta kʋt ʋlhpesa keyu bano hoke.

¹⁷ Yohmi hatuk o̱ kʋna hosh nana ai ʋlhpesa ka yohma hi ʋt ithana hosh, yʋmmak ash ik yohmo hokʋto, mihi yosh ashʋchi mak oke.