Chemis 3 - Chahta Holisso Holitopa 1886

Ai o̱ walampli hosh inla ya̱ na kil i̱ miho ka he tok, 1; 5 pisunlʋsh a̱ il im alʋmmashke, haknip a̱ ai achʋfa kitinosi kia, nan achukma hokmá, ik ʋlhpeso chinto hokmá, nana ka yʋmihcha he bano; 13 na hopoyuksa a̱hli hokʋto im anukfila yohbit nanaiya, nukhobela kʋt ik im iksho chatuk.

¹ Itibapishi li ʋhleha ma! nan isht ʋlhpisa chinto i̱ shahli mak osh pi onʋtula hinla ka hʋsh ithana kʋt, nan ithananchi a̱ lauʋt hʋch ik tobo kashke.

² E moma kʋt nana ka il ai ibetʋbli kʋt laua hoke. Hatak nana hosh anumpa ha̱ isht ik ibetʋblo hokmʋt, mihi yosh hatak ai a̱hli, micha haknip a̱ mominchit apesahancha hinla hoke.

³ Yakeh! pim antia chi̱ ka issuba itih ha̱ kapali a̱ e fohki chatuk; micha haknip a̱ mominchit e fullolichi hoke.

⁴ Yakeh! anonti peni hochito, yʋmmʋt na hochito fehna ho̱ mahli kʋllo hosh shalit isht ihi̱ya kia, apesʋchi mak osh kanima ho̱ ia hi a̱ ahnikma, isht afana yʋt iskʋtinosi kia fullolichi chatuk oke.

⁵ Yʋmmak inli ho̱ chohmit isunlʋsh ʋt nana iskʋtinosi ak inli kia, nan aiaka mak o̱ ai isht il atambli chatuk: mikma yakeh! lʋak ʋt iskʋtinosi kia iti laua chinto luachi chatuk.

⁶ Yohmi ka isunlʋsh ʋt luak, micha ai ashʋchi yakni mak oke: yohmi hosh isunlʋsh ʋt pi haknip a̱ ibai achʋfa hatuk osh haknip a̱ mominchit okpa̱hani; micha yʋmmʋt ai okpuloka luak mak o̱ isht libbi hatuk osh, hatak isht ai unchululi puta ka libbichi chatuk oke.

⁷ Nampoa ilaiyuka, micha hushi, micha nana hosh aka a ita balʋlli, mikmʋt okhʋta anu̱ka ai asha puta kʋto kostini chatuk: hatak isht ai unchululi puta kʋt yʋmmak okʋno kostininchi chatuk oke:

⁸ Amba isunlʋsh ak okʋno hatak naha hosh kostinincha hi o̱ keyu; yʋmmak okʋt nan ik ʋlhpeso, kostina hi o̱ keyu, hatak isht illi banot alotowa hoke.

⁹ Yʋmmak o̱ I̱ki Chihowa ha̱ isht il ai okpahanchikmʋt; anonti yʋmmʋt Chihowa ha̱ holba hosh toba tok hatak puta kash yʋmmak ash inli ho̱ anumpa okpʋlo isht e mihachishke.

¹⁰ Itakha mih achʋfa holitoblit isht ai okpʋchi, mikmʋt anumpa okpulo isht mihachi aiena hosh akohonchʋshke. Itibapishi li ʋhleha ma! ilʋppa puta kʋt yakohma he tuk o̱ keyushke.

¹¹ Kʋli hʋt akocha achʋfa ka oka champuli, takba aiena ho̱ akohonchi chatuk o̱?

¹² Itibapishi li ʋhleha ma! fik ʋpi ʋt alif ʋni yo̱ ʋna hinla ho̱? keyukmʋt pa̱k‐ʋpi ʋt fik o̱ ʋna hinla cho? yʋmmak inli chiyuhmit kʋli nanta hak osh hʋpi oka, micha oka kasha̱ha aiena ka kohonchi chatuk keyushke.

¹³ Kʋta hak osh hatak hopoyuksa, micha nan ithana anukfohka achʋkma kʋt hʋchi takla ahanta cho? mih mak osh hopoyuksa chu̱kʋsh yohbi hosh nana kʋt ai ʋlhpiesa ho̱ yʋmohmi kʋt na toksʋli ha̱ isht otʋnihinchashke.

¹⁴ Amba it i̱ potʋnno homi, micha itachowa aiena hosh huchi chu̱kʋsh a fo̱ka hokmʋno, isht hʋch ik ilauato, mikmʋt nan a̱hli ka hʋch ik a holabo kashke.

¹⁵ Na hopoyuksa ilʋppak okʋto ʋba ak o̱ a minti keyu, amba yakni, hatak, micha nan isht ahullo okpulo aiena kak o̱ immi hoke.

¹⁶ Kanima yo̱ it i̱ potʋnno, micha itachowa aiena kʋt a̱shakma, ai itasheha, mikmʋt nana a kaniohmi ik ʋlhpeso moma aiena kʋt yʋmmak oka a takali hoke.

¹⁷ Amba na hopoyuksa ʋba ak o̱ a minti hatuk osh ʋmmona ka hanta achʋkma tuk mʋt, anonti it i̱ nanaiyachi, yohbi, ilap nan ahni ak bano keyu, nan i̱ nukha̱klo, micha nan ai ʋlhpiesa yohma he aiena kʋt alotowa, iti̱ shahsholechi iksho, micha peh il ahobi ʋt ik im iiksho chatuk oke.

¹⁸ Mikma nan ai ʋlhpiesa ʋni a̱ nana̱iyachi ʋhleha yʋmmak osh im anukfila nuktaiyala hosh hoho̱kchi hoke.