Chemis 2 - Chahta Holisso Holitopa 1886

Ʋbanʋmpuli ʋt nan in laua ya̱ holitobli cha, anonti itibapishi ilbʋsha ya̱ kanimanchi ka ʋlhpesa keyu, 1; 13 amba i̱ hullot it i̱ nukha̱kla he tuk; 17 na yimmi kʋt isht ai ʋni kʋt ik im iksho hokʋto illi yoke; 21 Eblaham na yimmi kʋt yʋmma chohmi tok keyu.

¹ Itibapishi li ʋhleha ma! pin Chitokaka Chisʋs Klaist Chitokaka holitopa ya̱ hʋsh i̱ yimmi kʋt, hatak oka iti̱ shahsholechit isht holitoblit hʋch ik ahanto kashke.

² Hatak ʋt na fohka hochukma ho̱ fohka cha, tʋli holisso lakna ibbak ushi abeha abehkʋchi hosh, hʋchim ai itʋnaha ya̱ ʋla ma; anonti hatak ilbʋsha mʋt nafohka hlipa ya̱ fohka hosh ʋla;

³ Yohmi hokma nafohka hochukma ho̱ fohka kak ash o̱ hʋsh holitobli cha, yʋmmak ash o̱, Aiasha achukma ilʋppak o binilí, hʋsh im achi: mikmʋt ilbʋsha ash o̱, Yʋmmak o̱ ish hikiashke; keyukmʋt ai asha li nutaka ilʋppak o̱ ant ish a̱shashke, hʋsh im achi;

⁴ Yohmi kʋt yʋmmʋt hʋchishno inli hʋsh il iti̱ shahsholechi, micha anukfila ai ʋlhpesa keyu nan isht im anukfilli yo̱ hʋsh toba ho̱ keyu̱?

⁵ Itibapishi li a̱ holitopa ʋhleha ma! hʋsh haponaklashke; yakni pakna ilʋppa ilbʋshʋt aiasha kʋt ai yimmi ka yo̱ nan isht ai in laua chi̱, micha kʋna hosh ilap a̱ holitobli tuk ma, ʋba apehlichika yo̱ ima hi ʋt miha tok mak o̱ immi ha chi̱ ka, Chihowa hʋt atokolichi tok keyu̱?

⁶ Amba hʋchishno yokʋto ilbʋsha ya̱ hʋsh kanimanchishke. Hatak nan in laua ʋhleha hʋt hʋchishno a̱ hʋch ilbʋshachit, nan ai apesa kia hallʋlit hʋch isht oho̱na chatuk keyu̱?

⁷ Na hohchifo holitopa yʋmmak o̱ isht a hʋchi hohchifo hatuk ash ik ahobalot okla nanumahanchi keyu̱?

⁸ Ʋba nan ʋlhpisa i̱ noshkoboka, Holisso Holitopa ʋt, Chin chuka panta hatak a̱ ish i̱ hullo kʋt chishno inli kak o̱ ish itilauechashke, achi kak o̱, hʋsh ai a̱hlichi hokmʋt, ʋlhpesa ho̱ hʋchi yʋmohmi hoke:

⁹ Amba hatak puta ka iti̱ shahsholechi hosh hʋsh ahninchi hok mʋto, hʋsh ashʋchi; yohmikmʋt nan ʋlhpisa kobʋffi mak o̱ nan ʋlhpisa yash ot isht a hʋchi atokowa hoke.

¹⁰ Kʋna hosh nan ʋlhpisa ya̱ mominchit ai a̱hlichi hosh, anonti achʋfona ka kobʋffi hokʋt, mominchit kobʋffi mak oke.

¹¹ Hʋsh iti̱ luma̱ka ná, achi mʋt, anonti kʋna kia ish bi ná, achi ak inli tok oka. Yohmi ka hʋch ik iti̱ lʋma̱ko hoh kia, hatak a̱ ish bi hokmʋt, nan ʋlhpisa kobʋffi o̱ ish toba hoke.

¹² Hʋsh anumpuli, micha nana hʋsh a kaniohmi puta kʋt, a yuka keyu nan ʋlhpisa ho̱ kʋna hosh nan isht im ʋlhpisa hi ʋt kaniohma he ʋlhpiesa ka, hʋsh chiyuhmashke.

¹³ Kʋna hosh inla ya̱ ik i̱ nukha̱klo ke tuk okʋto, ilap mʋt i̱ nukha̱klo iksho ho̱ nan im ʋlhpisʋt na palʋmmi pisa he; mikma nan i nukha̱klo yokʋto nan im ʋlhpisʋt im a palʋmmi a̱ ik i̱ nukshopo hoke.

¹⁴ Itibapishi li ʋhleha ma! hatak ʋt ai yimmika yʋt anukfo̱ka miha kia, na toksʋli kʋt ik im iksho hokʋto, yʋmmʋt nanta ho̱ isht im ai achukma hinla ho̱? Ai yimmika illa kʋt yʋmma okchalincha hinla ho̱?

¹⁵ Iksa ibafohka itibapishi, in tek kanima hosh nipi bano cha, nitak yʋmma nana ʋpa he kia ik im iksho;

¹⁶ Yohmikma hʋsh achʋfona kʋt yʋmmak ash o̱ haknip a̱ nan isht apelʋcha he ai ʋlhpesa ka hʋsh ima keyu nana kia, Hʋchi libishʋt, hʋchi kai̱ya hosh na yukpʋt hʋsh itʋnowashke, hʋsh im achi ka, nanta ho̱ isht ai achukma hinla cho?

¹⁷ Yohmi ka ai yimmika yak kia yʋmmak inli ho̱ chohmit, na toksʋli hʋt ik im iksho ho̱, yʋmmak illa hokmʋt, illi hoke.

¹⁸ A̱hli, kʋna kia, Chishno ʋto ai yimmika yosh chi nukfo̱ka ma, anonti ʋno ʋto na toksʋli ak o̱ isht ahanta lishke; nana ka isht ish ahanta keyu hosh nan isht a chi yimmi ha̱ is sʋm otʋninchikma, anonti ʋno ʋto nana ka isht ahanta li hosh nan isht a sai yimmi kʋt chim otʋninchi lashke.

¹⁹ Chihowa hʋt achʋfa ka hʋchi yimmi kʋt, ʋlhpiesa ho̱ hʋchi yʋmohmishke: nan isht ahullo okpulo ʋhleha ak kia yimmi cha, wʋnihinchi hoke.

²⁰ Yohmi kia ai yimmika yokʋt, na toksʋli hʋt ik im iksho yokʋto, illi mak atuk a̱, hatak ik hopoyukso chia hʋt akostininchi ka ish ahni cho?

²¹ Pin tikba Eblaham ʋt ilap ushi Aisaak a̱ alta pakna ʋba isht ai okpʋchit isht ahanta kak osh isht ai ʋlhpiesa tok keyu̱?

²² Yʋmmak okʋt nan ishi ahanta ka ai yimmika yokʋt kaniohmit ibai isht ahanta tok, micha nan isht ahanta pulla ho̱ ai yimmika yʋt isht ai a̱hlit kʋnia tok a̱ ish akostininchi cho?

²³ Micha Eblaham ʋt Chihowa ha̱ i̱ yimmi tok; mihmʋt yʋmmʋt nan ai ʋlhpiesa ha̱ isht im ʋlhpisa tok, achi Holisso Holitopa ʋt ont ai a̱hli tok; mihma yʋmmak ash osh Chihowa i̱ kana isht hohchifo tok.

²⁴ Yohmi hoka na yimmi illa kak keyu, amba nana ka isht ahanta kak o̱ pulla hosh hatak ʋt kaniohmit isht ai ʋlhpiesa ka hʋsh akostininchishke.

²⁵ Yohmi ka yʋmmak inli chohmi hosh ohoyo haui Lehab ʋt nan isht ahanta ilʋppa pulla hosh okla yakni pisʋt a̱ya tuk a̱ pehlichit ishi tuk osh, hina inla ha̱ pit tihleli hosh isht ai ʋlhpiesa tok keyu̱?

²⁶ Hatak haknip ʋt, shilombish ʋt iksho hokʋno, illi yo̱ chatuk a̱, na yimmi hak kia nan isht ahanta kʋt ik im iksho hokʋto, illi ak inli hoke.