Chemis 1 - Chahta Holisso Holitopa 1886

Na pi̱ palʋmmi kʋt nan isht il aiyukpa he tuk, 1; 3 mikmʋt nan isht il ahopoyuksa Chihowa ya̱ il im asilhha he tuk; 13 nan isht a pi̱ palʋmmi kʋt na pim ashʋchika yʋt Chihowa yak o̱ a mintishke, il acha he keyu; 22 ʋbanumpa ha̱ im antia yo̱ hʋpia hashke. 27 Ʋbanumpa nukfohka a̱hli kʋt nana ha tuk a̱ anoli.

¹ Chemis, Chihowa, micha Chitokaka Chisʋs Klaist in tishu hʋt Islael isht atiaka akʋshkoa auah tuklo kʋt ita fimimpʋt kanima moma ma̱ya puta ka, pit aiokpʋchi hoke.

² Itibapishi li ʋhleha ma! nan isht imomaka pisa ilaiyuka puta ka hʋsh pihi̱sakmʋt, na yukpali i̱ shahli nana kak o̱ hʋchim itilauashke:

³ Na hʋchi yimmi nan isht imomaka pisa yak osh nuktanlʋt achunanchi ya̱ anukfohkichi hoka hʋsh ithaiyanashke.

⁴ Yohmi kia hʋchishno ʋt hʋchi aia̱hlit hʋchi ʋlhtaha ka nan isht ik ai ono kʋt ik hʋchim iksho ka hi a̱, nuktanlʋt achunanchi yak osh a kaniohmi he tuk ʋt ont aia̱hli pullashke.

⁵ Hʋsh kanimi kʋt isht a hopoyuksa hi ʋt ik hʋchim iksho hokmʋt, Chihowa hak o̱, yʋmmak osh hatak moma ka ai okpanchit ima, micha nan isht ik mihacho chatuk ak o̱, im asilhhashke. Yohmikma yʋmmak oka ima he bano hoke.

⁶ Yohmi kia na yimmi hosh nan isht anuktuklo nana kia ikshot asilhhashke; kʋna hosh anuktuklo hokʋto, okhʋta oka banʋtha ho̱ mahli hʋt shalit isht ia na poakahanchi kak o̱, chiyuhmi hoka.

⁷ Yohmi hokʋt hatak yʋmmak okʋt Chitokaka ya̱ nanasi kia im a habena hi a̱ ik im ahobo kashke.

⁸ Hatak im anukfila tuklo yʋt nana a kaniohmi puta kʋt fitikahanchi hoke.

⁹ Il itibapishi hʋt ilbʋsha yatuk osh holitopa kʋt na yukpashke.

¹⁰ Yohmikma nan in laua yatuk osh akanlosit toba kʋt na yukpashke: yohmi kʋt yʋmmak okʋt ont iksho kʋt haiyu̱kpulo pakanli ak o̱ chiyuhma chi̱ hokʋt.

¹¹ Hʋshi ʋt na hushma he lʋshpa ka il ai i̱shit kohcha mak inli hosh haiyu̱kpulo puta ka bʋshechikma, pakanli a̱sha tuk ʋt chilofa na pisa aiokli tuk ʋt okpulo chatuk; yohmi ka hatak nan in laua ahanta kak kia yʋmmak inli ho̱ chiyuhmit nana a kaniohmi yatuk ʋt ont ai iksho ka hi oke.

¹² Hatak nana hosh nan isht imomaka pisa ya̱ pisa cha, ai a̱hlit hlopulli hokʋto na yukpʋshke; yʋmmak okʋto ai a̱hlit hlopulli ha yokʋto, ai okcha̱ya iachuka holitompa Chitokaka yʋt, kʋna hosh ilap a̱ holitoblikma, ima hi ʋt miha tok mak o̱ isha hi okʋt.

¹³ Hatak nana kia nan isht anukpʋli pisa hokʋt, Chihowa hak osh sa nukpʋlechi ho̱, ik acho kashke; Chihowa hʋt nan ik ʋlhpeso ya̱ ishit nukpʋla he keyu, mikmʋt ilap ʋt hatak nana kia isht nukpʋlecha hi o̱ keyu hoka.

¹⁴ Amba ilap chu̱kʋsh nan ahni yak osh halʋllit ishit ma̱ha̱yʋt yukachi hok mak o̱, hatak moma kʋt nukpʋli hoke.

¹⁵ Yohmi tuk mak o̱ chu̱kʋsh nan ahni ash osh chakali mʋt, nan ai ashʋchika yo̱ cheli hoke; atukma nan ai ashʋchika ash osh ont ai ʋlhtaha hokʋto, nan illi ho̱ ikbi hoke.

¹⁶ Itibapishi li a̱ holitopa ʋhleha ma! hʋch ik yoshubo kashke.

¹⁷ Na hʋlbina achukma, micha na hʋlbina ai a̱hli puta hokʋto ʋba ak o̱ a minti; yohmi kʋt yʋmmak okʋt inlʋt takohli, micha ilaiyuka kia ik im iksho, nan tohwikeli puta I̱ki ak o̱ a minti hosh aka ʋla hoke.

¹⁸ Immi ha hi osh ikbi tok puta nan i̱ wayahpi e chiyuhma hi o̱, ilap ahni hosh anumpa ai a̱hli yo̱ ishit tobahanchi tok.

¹⁹ Yohmi hoka itibapishi li a̱ holitopa ʋhleha ma! hatak moyuma kʋt tu̱shpa hosh haponaklokmʋt, sʋlaha hosh anumpuli cha, nukhobela mʋt sʋlahashke:

²⁰ Hatak nukhobela im anukfila hʋt Chihowa holitobla hi a̱ nukfohkichi chatuk keyu hoke.

²¹ Yohmi hoka na liteha okpulo puta, micha nan ik ai ʋlhpeso ilaiyuka puta ma mominchit naksika hʋsh bohli cha, anukfila yohbi hosh anumpa hollokchi, yʋmmak osh hʋchim i shilombish puta okchalincha hi ʋt im ʋlhpiesa ka hʋsh ihi̱shashke.

²² Yohmi kʋt anumpa ha̱ haklo illʋt hʋchishno inli isht hʋchik ile yoshublo kish, amba holitoblit im antia yo̱ hʋchia hashke.

²³ Kʋna hosh anumpa ha̱ haponaklo kia, holitoblit im antia keyu hokmʋt, yʋmmʋt hatak osh a pisa ya̱ ilap nashuka ak inli ka ai il a pisa ka chohmi hoka.

²⁴ Yʋmmak ash ot ilap inli ka ile pisa cha, kanima iakmʋt, mih mak inli ho̱ hatak kaniohmi atuk ash osh imi haksi chatuk oka.

²⁵ Amba kʋna hosh a yuka keyu nan ʋlhpisa a̱hli ka pihi̱sʋt achunanchi hokʋto, yʋmmʋt anumpa ha̱ peh haklot imi haksi keyu hatuk osh, amba holitoblit na toksʋli isht ahanta hokʋto, hatak mihi yosh yakohmit ahanta kʋt nan isht ilai yukpa hi oke.

²⁶ Hatak nana hosh hʋchi takla anta kʋt ʋbanumpuli yo̱ ahoba kia, ilap isunlush a̱ ik apesacho hosh, amba ilap chu̱kʋsh ash inli ka haksichit ahanta hokʋto, hatak ilʋppʋt ʋbanumpa yimmi kʋt im a̱hli keyu hoke.

²⁷ Na yimmi a̱hli, litcha ikshot, I̱ki Chihowa itikba takali kʋt, ʋlla ʋlhtakla ʋhleha, micha ohoyo i̱ hatak illi puta aiena ka nana kʋt im a palʋmmit aiasha ka, i̱ nowʋt a̱ya, mikmʋt yakni a̱ isht ik ile litehacho aiena ilʋppak oke.