Chan 6 - Chahta Holisso Holitopa 1886

Chisʋs ʋt pʋska lumbo tahlapi, micha nʋni tuklo aiena tuk a̱ hatak tahlepa sipokni tahlapi ka impʋchi, 1, 14 Nan‐ithʋna ʋhleha ash ot okhʋta ilhkoli tuk osh, mahli okpulo itafama; yohmi tuk kia okhʋta paknaka ya̱ a nowʋt ma̱ya hosh Chisʋs ʋt ona. 27 Hatak ʋt imi shilombish ak o̱ ilhpak im atahli bʋnnʋt ma̱ya hi a̱ i̱ miha mʋt, 32 ilap ak osh ai okcha̱ya pʋska mak atuk ʋt miha. 65 Laua hosh ik im ʋlhpeso mʋt, issʋt i̱ filʋmmi; 66 Pita yʋt auah tuklo nan im anukfila ka anoli hosh, Chisʋs ʋt Chihowa ak o̱ Ushi pulla ka yimmi ka anoli.

¹ Nana kʋt ai yakohmi ha ya, Chisʋs ash ot Kalili okhʋta, yʋmmʋt Tibelias okhʋta ho̱ pit tanʋbli tok.

² Mihma abeka puta hatuk a̱ nana ka ai i̱ yʋmihchit anta na pisa tuk ak osh okla laua fehnʋt pit iakaiya tok.

³ Yohmi ma Chisʋs ʋt nʋnih chaha yo̱ pit oiya cha, yʋmmak o̱ nan im ai ithʋna ʋhleha hash pehlinchit binili tok.

⁴ Mihma ʋbanʋblit ont‐ia Chu okla im impa holitopa yʋt ai ona̱ hosi tok.

⁵ Yohmi ma Chisʋs ash ot ʋba chakalit, okla laua fehna hosh im ai ʋla na pisa mʋt, Filip ash o̱, Katima ko̱ pʋska ya̱ il a chumpa na okla ilʋppʋt impa chi̱ cho? im achi tok.

⁶ Ilapʋt nana a kaniohma hinla hokʋto ithana hatuk osh, yʋmmak o̱ imomaka pisa hosh ilʋppa achi tok.

⁷ Mihma Filip ash ot afalaminchi mʋt, Pʋska yʋt iskʋli tahlepa tuklo ʋlhtoba mak osh, momʋt iskʋtinosi aiyuka ho̱ isha hinla kia, ʋlhpesa he keyushke, achi tok.

⁸ Nan im ai ithʋna achʋfʋt, Antilu, Saimon Pita itibapishi hash osh,

⁹ Ʋlla himita yʋt bali palʋska tahlapi, micha nʋni chipunta tuklo aiena ho̱ ishi kʋt ilʋppa a̱shʋshke; yohmi mak osh laua fehna hoka, na katihma heto, im achi tok.

¹⁰ Mihma Chisʋs ash ot, Okla ha̱ ho binolichí, achi tok. Yʋmma hʋshuk ʋt a̱sha fehna tok. Yohmi hatuk o̱ hatak holhtina kʋt tahlepa sipokni tahlapi foka hosh aka binohli tok.

¹¹ Mihma Chisʋs ʋt pʋska yash ishi cha, ʋba pit aiokpʋchi mʋt, nan im ai ithʋna ʋhleha ha̱ ima ma, nan im ai ithʋna ʋhleha hash ot aka binohli tuk ash ima tok: mihmʋt nʋni mʋt kaniohmi ho̱ okla bʋnna hinla tuk a̱ yʋmmak atuk ash inli ho̱ okla chohmichi tok.

¹² Mihma okla hash ot kaiyʋt taha ma, nan im ai ithʋna ʋhleha hash o̱, Boshulli ʋt atampʋt a̱sha ka oh itahobí, nanasi kia ik kʋnio kashke, im achi tok.

¹³ Yohmi na yʋmmak ash ot bali palʋska tahlapi ka okla ai ʋpa ma im atampa tuk boshulli a̱sha ka, aiowʋt itahobi mʋt, kishi auah tuklo ka okla alotoli tok.

¹⁴ Yohmi ma Chisʋs ʋt na‐fehna ho̱ yʋmihchi na okla pisa mʋt, Ilʋppak osh hopaii yakni ilʋppa ʋla he tuk mak o̱ pulla mʋhlishke, achi tok.

¹⁵ Yohmi hatuk osh okla mintit iti̱ halʋllit ishit, mi̱ko ikba hinla ka, Chisʋs ʋt akostininchi mʋt, filʋmmit ilap bieka hosh nʋnih chaha yo̱ anonti ia tok.

¹⁶ Atuk o̱ opiʋt taha ma, nan im ai ithʋna ʋhleha hash ot pit okʋtahʋt okhʋta ho̱ ona tok.

¹⁷ Micha peni ont ʋlhbeha mʋt, Kapenaʋm imma ia hosh okhʋta ha̱ a̱sht a̱ya tok. Atuk o̱ ont okhlilit taiyaha ka, Chisʋs ash ot ik im a̱yo ki̱sha tok.

¹⁸ Mihma mahli chito yosh mahli hatuk o̱, okhʋta hash ot poakahanchi tok.

¹⁹ Yohmi hatuk o̱ peni ash okla mo̱fi kʋt, kowi tuchinakmá, keyukmʋt ushtakmá, nana foka ho̱ ona mʋt, Chisʋs ʋt okhʋta paknaka a noho̱wa hosh peni ash i̱ bili̱ka ona na okla pisa tok; yohmi mʋt okla nukshopa tok.

²⁰ Yohmi kia yʋmmak ash ot, Hʋchi nukshopa ná, ʋno sia hash oke.

²¹ Mihma okla na yukpa fehnʋt yʋmmak ash o̱ peni ash ik chukowá, okla im ahni tok; atuk o̱ peni ash ot chekosi fehna okla ai ona he tuk ash yakni a̱ ont ataiya tok.

²² Ont onna ma okla okhʋta mish tʋnnʋp hiohma̱ya kʋt, peni inla mʋt yʋmma iksho ho̱, achʋfa yʋmmak illa tuk o̱ nan im ai ithʋna ʋhleha hʋt ʋlbeha tuk; yohmi ka Chisʋs ʋt nan im ai ithʋna ʋhleha ha̱ ta̱kla peni ont ik chukowo ho̱, amba nan im ai ithʋna ʋhleha ak bano hosh ilhkoli tuk a̱, pisa mʋt;

²³ Yohmi kia Chitokaka yʋt pʋska ʋba pit ai isht aiokpʋchi na okla ai impa tuk a̱ pit bili̱ka Tibelias a̱ a minti kʋt peni inla kanohmi hosh ʋla tok.

²⁴ Yohmi hatuk a̱ Chisʋs, micha nan im ai ithʋna ʋhleha aiena kash ot yʋmmak ash iksho ho̱ okla akostininchi mʋt, yʋmmak kia peni inla kanohmi kash ʋlbeha cha, Chisʋs a̱ hoyot, itʋnowʋt Kapenaʋm a̱ okla ai ʋla tok.

²⁵ Mihmʋt okhʋta ha̱ mish in tʋnnʋp o̱ anta na okla ont pisa mʋt, Pi̱ shahli ma! katiohmi kash o̱ ilʋppa ish la tuk oh cho? im achi tok.

²⁶ Chisʋs ʋt afalaminchi mʋt, A̱hlishke, a̱hli mak o̱ hʋchim achi lishke; Nana a fehna puta ka yʋmihchi li ho̱ hʋs sa pi̱sa tuk ak osh hʋs sa hoyo kak keyu, amba pʋska ya̱ hʋsh pʋt, hʋchi kaiya tuk ak oke.

²⁷ Ilhpak ʋt okpula hi okʋno ahnit hʋch ik toksalo kashke; amba ilhpak ʋt ik taho hosh ai‐okcha̱yʋt bilia ya̱ ona hinla, yʋmma Hatak Ushi ʋt hʋch ima he yʋmmak ash ke: yʋmmak o̱ I̱ki Chihowa yʋt ai atokolit ai im aia̱hlichi hatuk oke, im achi tok.

²⁸ Yohmi ma okla afalaminchi mʋt, Nanta ak o̱ e katiohmi hosh Chihowa i̱ na toksʋli ha̱ e toksʋla hinla cho? im achi tok.

²⁹ Chisʋs ʋt afalaminchi mʋt, Auet sa kanchi tok yʋmmak o̱ hʋch i yimmi ilʋppak osh Chihowa i̱ na toksʋli mak oke, im achi tok.

³⁰ Yohmi hatuk o̱ okla hash ot, E pisa cha, e chi̱ yimma chi̱ kʋno, na‐fehna nanta ho̱ ish yʋmihchi ho? nanta hak o̱ isht ish ahanta cho?

³¹ Pin tikba ʋhleha hʋt chukushmi foka ya̱ manna yo̱ ai ahampa tok; okla ʋpa chi̱ ka pʋska ʋba minti ho̱ ipeta tok, achi kʋt holisso tok oke, im achi tok.

³² Yohmi ma Chisʋs ash ot, A̱hlishke, a̱hli mak o̱ hʋchim achi lishke, Pʋska ʋba minti yʋmma Moses ak osh hʋch ipeta ha tok keyu; yohmi kia A̱ki ak osh pʋska aia̱hli ʋba minti ka hʋch ipeta hoke.

³³ Ʋba mintit ʋla cha, yakni a̱ ai‐okcha̱ya ihi̱ma kak osh, yʋmmʋt Chihowa i̱ pʋska mak oke, im achi tok.

³⁴ Yohmi ma, Chitokaka ma! Pʋska ilʋppak o̱ ish pipihinta na biliashke, im achi tok.

³⁵ Mihma Chisʋs ash ot, Ʋno ak osh ai‐okcha̱ya pʋska ya̱ sia mak oke: kʋna hosh ʋno ak o̱ ʋm ʋla hokʋt nitak nana hohchʋfa he keyu; micha kʋna hosh ʋno a̱ a̱ yimmi hokʋt nitak nana itukshila he keyu hoke.

³⁶ Yohmi kia hʋchishno ʋto hʋs sa pi̱sa kʋt ik hʋchi yimmo ka, hʋchim anoli li tuk oke.

³⁷ A̱ki ʋt ʋma hokʋno momʋt ʋm ʋla hi oke; mikma kʋna hosh ʋm ʋla hokʋno, ik kaniohmi kia falaminchit kocha pit tobli la he keyu hoke.

³⁸ Ʋba ya̱ mintit ʋla li kʋt, ʋno akinli nana ʋm anukfila hosh a yʋmohmi la he tok keyu hokʋt, amba auet sa kanchi tok nan im anukfila ha he tok.

³⁹ Yohmi kʋt auet sa kanchi tok A̱ki ʋt ʋma tok moyuma ka achʋfa kia ik sa̱ kʋnio hosh, amba nitak ont ishtaiyopikma falaminchit tanichi la he ilʋppak o̱ im anukfila hoke.

⁴⁰ Micha Ushi a̱ pisa cha, yʋmmak ash i̱ yimmi hokʋto, momʋt ai‐okcha̱yʋt bilia ya̱ pisa he, ilʋppak o̱ auet sa kanchi tok ʋt aiahni hoke; yohmi ka nitak ont ishtaiyopikma yʋmmak ash o̱ falaminchit tanichi la hi oke.

⁴¹ Yʋmmʋt, Ʋno ak osh pʋska ʋba minti tok mak o̱ sia hoke, achi hatuk o̱, Chu okla hash ot yʋmmak ash o̱ lumasit na‐mihachit ma̱ya tok.

⁴² Mihmʋt, Ilʋppʋt Chisʋs, Chosef a̱ Ushi yoh chokʋsh keyu̱? mikma i̱ki, micha ishki aiena ka iloh ithana keya ho̱? yohmi hokak osh katiohmi ho̱ ʋba mintit ʋla li tok, achi cho? achi tok.

⁴³ Yohmi hatuk o̱ Chisʋs ʋt afalaminchi mʋt, Lumasit nan itiba mihʋt hʋch ik ma̱yo kashke.

⁴⁴ Hatak nana kia ʋm ʋla he keyʋ, amba auet sa kanchi tok A̱ki ak osh halʋlli hok mak a hi oke: mikma nitak ont ishtaiyopikma falaminchit tanichi la hi oke.

⁴⁵ Mihmʋt momʋt Chihowa yak o̱ nan im ai ithʋna he, achi kʋt hopaii puta i̱ holisso ha̱ a holisso tok. Yohmi hatuk o̱ hatak ʋt A̱ki a̱ im a haponaklot, nana ka im ai ithʋna aiyuka hokʋto, ʋm ahanla hoke.

⁴⁶ Hatak nana hosh A̱ki ak o̱ pisa chatuk o̱ keyu; Chihowa yak o̱ a minti tok ak bano yʋmmʋto A̱ki a̱ pi̱sa chatuk oke.

⁴⁷ A̱hlishke, a̱hli mak o̱ hʋch im achi lishke, Kʋna kia a̱ yimmi hokʋto ai‐okcha̱yʋt bilia ya̱ pisa hoke.

⁴⁸ Ʋno ak osh ai‐okcha̱ya pʋska sia mak oke.

⁴⁹ Hʋchin tikba ʋhleha hʋt chukushmi foka ya̱ manna ai ahampa tok ʋt illi tok.

⁵⁰ Pʋska ilʋppak o̱ hatak ʋt ai ʋpa cha, ik illo ka hi o̱, ʋba ya̱ mintit ʋla tok mak oke.

⁵¹ Ʋno ak osh pʋska okcha̱ya ʋba minti tok a̱ sia mak oke; hatak nana hosh pʋska ilʋppa ʋpa hokmʋt, okcha̱ya na bilia he; yohmikma pʋska ipeta la he, yʋmmʋt ʋno sa nipi yakni ʋt ai okcha̱ya hi o̱, isht atobbi la chi̱ kak oke, im achi tok.

⁵² Yohmi hatuk o̱ Chu okla hash ot, Hatak ilʋppʋt katiohmi kak osh ilap nipi ya̱ pipeta na e pa hinla ho̱? achit itachowʋt ma̱ya tok.

⁵³ Mihma Chisʋs ʋt, A̱hlishke, a̱hli mak o̱ hʋchim achi lishke; Hatak Ushi nipi ya̱ ʋpʋt, im issish ma hʋsh ishko keyu hokmʋt, ai okcha̱ya hi ʋt hʋchi anukfo̱ka keyu hoke.

⁵⁴ Kʋna hosh sa nipi a̱ ʋpa cha, sʋssish ma ishko ho kʋto, ai‐okcha̱yʋt bilia ya̱ pisa hoke; atukma nitak ont ishtaiyopikma falaminchit tanichi la hi oke.

⁵⁵ Sa nipi ʋt ilhpak o̱ fehnakma, sʋssish a̱ ishka hi o̱ fehna hoke.

⁵⁶ Kʋna hosh sa nipi a̱ ʋpa cha, sʋssish ma ishko hokʋt, ʋno a̱ a sʋbai acha̱fakma, anonti ʋno mʋt ilapa̱ ai ibacha̱fa li hoke.

⁵⁷ A̱ki okcha̱ya yʋt ʋno a̱ auet sa kanchi tok o̱, A̱ki ak o̱ ʋno ʋt ai okcha̱ya li hatuk a̱, kʋna hosh ʋno a̱ sʋpa hokʋt, yʋmmak inli ho̱ chohmit ʋno ak o̱ si ai okcha̱ya hi oke.

⁵⁸ Ilʋppak osh pʋska ʋba minti tok mak oke; hʋchin tikba ʋhleha hʋt manna ya̱ ʋpa tuk osh anonti illi tok a̱ a chohmi ho̱ keyu; kʋna hosh pʋska ilʋppa ʋpa hokʋto okcha̱yʋt bilia he mak oke, im ahanchi tok.

⁵⁹ Kapenaʋm a̱ nan ai ithʋnanchit ahanta mak osh sinakak anu̱kaka ya̱ ilʋppa puta ka ai ahanchi tok.

⁶⁰ Yohmi hatuk o̱ nan im ai ithʋna ʋhleha hʋt ilʋppa haklot in taha mʋt, la̱wa kʋt, Ilʋppʋt anumpa kʋllo fehnʋshke, kʋta hosh haponakla hinla cho? achi tok.

⁶¹ Nan im ai ithʋna ʋhleha hʋt yʋmma lumasit nan isht a miha ka, Chisʋs ʋt ilapo inlit akostininchi mʋt, Ilʋppʋt hʋchi ibetʋblichi hoh cho?

⁶² Yohmi kʋto Hatak Ushi ʋt ti̱kba ma ai ʋtta tok ʋba ya̱ ia na hʋsh pisa hok mʋto?

⁶³ Okchalinchi ʋt shilombish ak oke; yohmikma nipi ʋto nana ho̱ isht ai ʋlhpesa keyu hoke; anumpa hʋchim anumpuli li yʋmmak osh shilombish okmʋt, anonti isht ai‐okcha̱ya yoke.

⁶⁴ Yohmi ka hʋsh kaniohmi mʋt ik yimmo kʋt hʋsh a̱shʋshke, im achi tok. Ʋmmonʋt isht auehinchi kak inli ho̱ kʋna hak osh ik yimmo ka he, mikma kʋna hak osh ilapa ishit inla ibbak fohka he aiena ka Chisʋs ʋt ithana tuk a tok.

⁶⁵ Mihmʋt, Yohmi hatuk o̱ A̱ki ak osh anukfohkichi ho̱ keyukma, hatak nana hosh ʋm ʋla he keyu hoke, hʋchim achi li kʋno, achi tok.

⁶⁶ Yʋmmak fehna kak o̱ nan im ai ithʋna ʋhleha hʋt lauʋt filamoʋt taha mʋt, i himmak ma apehʋt ik itʋnowo ki tok.

⁶⁷ Yohmi ma Chisʋs ash ot auah‐tuklo kash o̱, Hʋchishno ak kia filʋmmit a̱ya hi a̱ hʋchim anukfila cho? im achi tok.

⁶⁸ Mihma Saimon Pita yʋt afalaminchi mʋt, Kʋta hak o̱ il im ia hinla cho? chishno ak osh ai okcha̱yʋt bilia isht anumpa ha̱ ish ieshishke.

⁶⁹ Micha chishno ak osh Chihowa okcha̱ya Ushi, Klaist mak o̱ chia pulla ka il ithanʋt, pi yimmi fehna hoke, im achi tok.

⁷⁰ Chisʋs ash ot, Auah‐tuklo ho̱ hʋchi atokoli li tok o̱, hʋsh achʋfona kʋt nan‐isht‐ahullo okpulo yo̱ chia keyu̱? im achi tok.

⁷¹ Yʋmmak osh auah‐tuklo ka ai iba chʋfa yatuk osh, yʋmmak ash ishit inla ibbak fohka chi̱ ha tok oka Saimon, ushi Chutas Iskaliot ak o̱ isht anumpuli ha tok oke.