Chan 20 - Chahta Holisso Holitopa 1886

Meli Maktalene ʋt sepʋlka yash ona, 1, 2 Pita, Chan itatuklo kʋt tu̱shpʋt iʋt, sepʋlka yash it onachi akinli. 11 Meli Maktalene ash ot sepʋlka ya̱ falamʋt ona, atuk o̱ i̱ himmak o̱ Chisʋs fehna kash osh yʋmmak ash inli ho̱ ont i̱ haiaka. 19 Mih nitak akinli opiʋt taha ho̱ nan im ai ithʋna ʋhleha hʋt itʋnahʋt chi̱ya ma, Chisʋs ʋt im ona; 25 Wek inla hosh ont taha ho̱ nan im ai ithʋna ʋhleha hʋt Tamas a̱ pit a momʋt itʋnahʋt chi̱ya ho̱, Chisʋs ʋt anonti i̱ haiaka.

¹ Wek chukowʋt iahpi onnahinli fehna okhlilinchi moma ho̱, Meli Maktalene ʋt sepʋlka yash ona cha, tʋli yash osh sepʋlka ya̱ a kanʋlli tuk o̱, pisa tok.

² Yohmi ma maleli hosh ʋlʋt, Saimon Pita, micha nan‐ithʋna achʋfa Chisʋs ʋt holitobli yatuk ita tuklo ka, Chitokaka ya̱ sepʋlka ya̱ ai ishit kohchi cha kanima yo̱ ont bohli tuk a chini ho̱, kil akostininchoshke, im achi tok.

³ Yohmi ma Pita yʋt, micha nan‐ithʋna achʋfa yash ita tuklo cha iʋt, sepʋlka ya̱ it onachi tok.

⁴ Yohmi kʋt tu̱klot pit tihlaiya tok; atuk o̱ nan‐ithʋna achʋfa yash ot Pita ya̱ imaiya cha, ti̱kba sepʋlka ya̱ ona tok.

⁵ Yohmi cha ont a hlipʋt pit hopo̱koyo mʋt, linen ʋto kahʋt ma̱ya na pisa akinli kia, pit ik chukowo ki tok.

⁶ Yohmi ma Saimon Pita yash ot auet iaka̱yʋt ʋla mʋt, sepʋlka yash pit chukowa cha, linen ʋt kahʋt ma̱ya ka pisa tok.

⁷ Yohmi ma nantapʋski noshkobo isht afoa tuk ʋto linen a̱ ik ibafo̱ko hosh, amba pohlʋt taha cha, ilapissa yo̱ itonla tok.

⁸ Mihma nan‐ithʋna achʋfa na tikba sepʋlka ya̱ ona tuk ash kia pit chukowa cha, pisa mʋt, yimmi tok.

⁹ Yʋmma foka mʋno illi tuk ʋt falamʋt tana hi oka, Holisso Holitopa ya̱ ik ai akostinincho ki̱shʋt okla tok.

¹⁰ Yohmi mʋt nan‐ithʋna ash osh ilap in chuka atuk akinli ho̱ itiachi tok.

¹¹ Yohmi kia Meli ʋto sepʋlka a kocha ya̱ nishkin okchi mihintit hiki̱a tok: atuk osh nishkin okchi mihintit pit aka chunulit, sepʋlka anu̱kaka ya̱ pit hopo̱koyo tok.

¹² Mihmʋt enchil tuklo i̱ na‐fohka tombi kʋt Chisʋs haknip ai itola tuk a̱, achʋfʋt noshkobo imma yatuk ak o̱ a̱sha ma, achʋfʋt iyi pilla hatuk ak o̱ a̱sha na pisa tok.

¹³ Mihma, Ohoyo chia hʋt na katihmi ho̱ ish yaha̱ya cho? im achit okla ma, An Chitokaka ya̱ okla ishit kʋnia tuk a chini ho̱, kanima yo̱ a bohli tuk a̱ ak ithano kak oke, im achi tok.

¹⁴ Micha ilʋppa mak achi mʋt, im ashak‐imma pit filema mʋt, Chisʋs ʋt hiki̱a na pisa kia, yʋmmak osh Chisʋs ash atuk a̱ ik ahno ki tok.

¹⁵ Chisʋs ash ot, Ohoyo chia hʋt na katihmi ho̱ ish yaha̱ya cho? Kʋta ho̱ ish hoyo cho? im achi tok: mihma osapushi apesʋchi mak o̱ im ahoba mʋt, A̱ shahli ma! chishno ak osh yʋmmak ash ai isht ish ia tuk okmʋt, kanima yo̱ ont ish bohli tuk mʋt, is sʋm anoli na ont ishit minti lashke, im achi tok.

¹⁶ Chisʋs ash ot, Meli, im achi ma, pit‐filema mʋt, Labboni, yʋmmʋt nan‐ithʋnanchi ma! achi hoke, im achi tok.

¹⁷ Chisʋs ʋt, Ʋba iʋt A̱ki a̱ ak im ono ki̱sha hoka, is sa potoli ná; amba iʋt tibapishi li ʋhleha aiasha kak o̱ ona cha, A̱ki, mikmʋt hʋch I̱ki, an Chihowa, mikmʋt hʋchin Chihowa im ia li ka, ish im anolashke, im achi tok.

¹⁸ Meli Maktalene ash osh ʋla cha, Chitokaka ya̱ pisa tuk, yohmi na ilʋppa puta ka im ahanchi tuk a̱, nan‐ithʋna ʋhleha hash im anoli tok.

¹⁹ Atuk o̱ nitak yʋmmak ash inlit ont shohbi wek chukowʋt iahpi nitak atuk o̱, Chu okla ha̱ i̱ nukshopa hatuk osh nan‐ithʋna ʋhleha ai itʋnahʋt chieya ka, okhissa yʋt ʋlhkʋma ho̱, Chisʋs ash ot ʋlʋt iklʋnna ant hikia cha, Hʋchi nuktanlashke, im achi tok.

²⁰ Ilʋppa mak achi mʋt, ibbak iti chaplinchit, naksi aiena ka i̱ weli tok. Yohmi ma nan‐ithʋna ʋhleha hash osh Chitokaka ya̱ pisa kʋt na yukpa tok.

²¹ Yohmi ma Chisʋs ash ot atuklanchit, Hʋchi nuktanlashke; A̱ki ʋt na sa tohno tok mak o̱, ai itilauechi hosh hʋchishno ma na hʋchi tohno li hoke, im achi tok.

²² Micha ilʋppa makachit in taha mʋt, o̱ fiopa mʋt, Shilombish Holitopa ya̱ oh ishí.

²³ Kʋna im ai ashʋchika yo̱ hʋsh i kashofi hoka, i̱ kashofa he mak oke; mikmʋt kʋna im ai ashʋchika yo̱ hʋch ik i̱ kashofo hokma, ik i̱ kashofo ka he mak oke, im achi tok.

²⁴ Yohmi kia Chisʋs ʋt ʋla ka, auah‐tuklo yatuk a̱ achʋfa, Titimʋs hohchifo Tamas ʋt ta̱kla a̱sha tok keyu.

²⁵ Yohmi tuk o̱ nan‐ithʋna ʋhleha inla yash osh, Chitokaka ya̱ e pisa kʋno; im achi tok. Yohmi kia, Ibbak chofak ai ahonʋhla tuk a̱ pisa lish, chofak pit a hika tuk a̱ sʋbbak ushi pit maiachi lish, anonti naksi a̱ sʋbbak pit hilechi li ho̱ keyukmʋt, sai yimma he keyushke, im achi tok.

²⁶ Atuk o̱ anonti nitak isht untuchina ma nan im ai ithʋna ʋhleha hash osh aboha anu̱ka aiasha ma, Tamas ʋt ta̱kla a̱sha tok; yohmi ma okhissa yʋt ʋlhkʋma ho̱, Chisʋs ʋt ʋla cha, iklʋnna ya̱ ant hikiʋt, Hʋchi nuktanlashke, achi tok.

²⁷ Mihmʋt Tamas ash o̱, Chibbak ushi a̱ auet welit, sʋbbak a̱ pisá; mikmʋt chibbak ma auet welit sa naksi a̱ pit hilechí: yohmi cha, na yimmi iksho hosh ish anta ná, amba chi yimmi kʋt a chim alotowashke, im achi tok.

²⁸ Mihma Tamas ʋt afalaminchi mʋt, An Chitokaka ma! an Chihowa ma! im achi tok.

²⁹ Chisʋs ash ot, Tamas is sa pisa hatuk mak osh chi yimmishke: pisa ho̱ keyu kia, yimmi tok ʋhleha hokʋt na yukpa mak oke, im achi tok.

³⁰ Micha na‐fehna inla kʋt laua ho̱, Chisʋs ʋt nan im ai ithʋna ʋhleha hʋt pi̱sa na yʋmihchi mʋhli tok a̱ holisso ilʋppa ik a holissoshke.

³¹ Amba Chisʋs ʋt Chihowa Ushi Klaist mak a tok a̱, hʋchi yimma he; micha hʋchi yimmi pulla hosh yʋmma hohchifo hatuk mak o̱ okcha̱yʋt bilia ya̱ hʋsh ahayucha he mak o̱, ilʋppa puta kʋt holisso hatuk oke.