Chan 11 - Chahta Holisso Holitopa 1886

Lasalʋs ʋt abeka na in tek ʋhleha hʋt Chisʋs a̱ pit im anoli, 1; 17 Chisʋs ʋt Betani a̱ ʋla, mihmʋt Lasalʋs a̱ falaminchit tanichi. 45 Laua hosh Chisʋs a̱ i̱ yimmi kia, kanimi kʋt Falisi ʋhleha ha̱ ont im anoli; Chisʋs ʋt kohchʋt ia mʋt, tʋmaha Eflihaim ont anta.

¹ Hatak achʋfa Lasalʋs hohchifo, Meli micha itibapishi Mahla itatuklo in tʋmaha Betani ak o̱ ʋtta yosh abeka tok.

² Meli yʋmmak osh Chitokaka ya̱ pa̱shi ahama isht a hʋmmi cha, iyi ma ilap pa̱shi yo̱ isht i̱ kasholichi tok mak o̱ i̱ nakfi yosh Lasalʋs ʋt abeka ha tok.

³ Yohmi hatuk o̱ in tek tuklo kash ot yʋmmak ash pit im anolit, Yakeh! Chitokaka ma! ish holitobli chatuk ʋt abekʋshke, achi tok.

⁴ Mihma ilʋppa Chisʋs ʋt haklo mʋt, Nan abeka ilʋppʋt isht ai illa hi o̱ keyu hoke; amba Chihowa ʋt isht a holitopa na Chihowa Ushi ʋt yʋmmak o̱ isht a holitopa chi̱ mak oke, achi tok.

⁵ Mahla, micha itibapishi, mikmʋt Lasalʋs aiena ka Chisʋs ʋt holitobli tok.

⁶ Yohmi hatuk osh yʋmmʋt abeka tuk a̱ haklo ha yʋt, ai ʋtta tuk ash inli ho̱ ahanta na nitak tuklo tok.

⁷ Atuk osh yʋmma ont ʋbanʋpa ma nan im ai ithʋna ʋhleha hash, Anonti Chutea yakni ya̱ iloh iashke, im achi tok.

⁸ Mihma nan im ai ithʋna ʋhleha hash ot, Pi̱ shahli ma! Chu okla hʋt chekosi kash o̱ tʋli a̱ ishit chi boli bʋnna tuk a̱, anonti yʋmma ish ia chi̱ ho̱? im achi tok.

⁹ Chisʋs ʋt afalaminchi mʋt, Nitak achʋfa ka hʋshi kanʋlli ʋlhpisa auah‐tuklo chatuk keyu cho? Hatak nana hosh nitak o̱ nowʋt a̱ya hokmʋt, yakni ilʋppa ai in tohwikeli ka pi̱sa hatuk osh ik ibetʋblo hoke.

¹⁰ Amba hatak ʋt ninak o̱ nowʋt a̱ya hokmʋto, tohwekeli kʋt ik im iksho hatuk osh, ibetʋbli hoke, achi tok.

¹¹ Ilʋppak o̱ achi tok: yohmi ha yosh i̱ himmak o̱, Hʋpi̱ kana Lasalʋs ʋt nusishke; yohmi kia nusi tuk a̱ ont okchʋli la chi̱ mak osh ia li hoke, im achi tok.

¹² Yohmi ma nan im ai ithʋna ʋhleha hʋt, Chitokaka ma! nusi hatuk okmʋt, hlakofa chi̱ hoke, achi tok.

¹³ Yohmi kia yʋmmʋt illi kak o̱ Chisʋs ʋt miha ha tok; amba nusit foha kak o̱ miha ka, okla im ahoba tok.

¹⁴ Yohmi ma Chisʋs ʋt achukmali fehnʋt, Lasalʋs ʋt illi tuk oke.

¹⁵ Yohmi ka ʋno ʋt yʋmma ont ak anto ke tuk ʋt, hʋchishno na hʋchi yimma chi̱ ka, hʋchishno ak atuk mak o̱ sai yukpʋshke; yohmi kia yʋmma iloh im ai onashke, im achi tok.

¹⁶ Mihma Tamas, yʋmmʋt Titimʋs hohchifo hosh yʋmma nan im ai ithʋna ai itilaui ʋhleha hash, Pishno ak kia iloh ia cha, api̱hʋt hʋp illashke, im achi tok.

¹⁷ Atuk o̱ Chisʋs ash ot ona mʋt, yʋmmak ash ot hollopi tuk a̱ nitak ushta tuk o̱, ont akostininchi tok.

¹⁸ Betani ʋt Chelusalem a̱ pit i̱ bili̱ka kowi tuklo foka tok.

¹⁹ Mihma i̱ nakfi illi Mahla, micha Meli itatuklo ka hopohlʋla chi̱ hosh Chu okla hʋt lauʋt im ai itahoba tok.

²⁰ Atuk o̱ Mahla ash osh, Chisʋs ʋt minti ka, haklo makinli hosh, iʋt ont afama tok; amba Meli ʋto aboha anu̱ka yash a̱sha moma tok.

²¹ Mihma Mahla ʋt Chisʋs ash o̱, Chitokaka ma! ilʋppa ant ish anta tuk okma, a̱ nakfi ʋt illa hetuk keyushke.

²² Ik yohmi kia himonasi mak o̱ Chihowa ya̱ nana ho̱ ish im asilhha hoka, Chihowa yʋt chima hinla ka ithana lishke, im achi tok.

²³ Mihma Chisʋs ʋt, chi̱ nakfi ʋt falamʋt tana chi̱ akinli hoke, im achi tok.

²⁴ Mihma Mahla ash ot, Nitak ont ishtaiyopi illi ʋt falamʋt tani yʋmmak okʋno falamʋt tana hi oka, ithana lishke, im achi tok.

²⁵ Chisʋs ʋt, Ʋno ak osh illi a̱ falaminchit tanichi, mikmʋt ai‐okcha̱ya aiena ka sia mak oke. Kʋna hosh ʋno ak o̱ a̱ yimmi hokʋto, ik illi tuk nana kia, okcha̱ya he mak oke.

²⁶ Micha kʋna hosh okcha̱yʋt ahanta hosh ʋno a̱ a̱ yimmi hokʋto, nitak nana illa he heyu hoke. Ilʋppa chi yimmi cho? im achi tok.

²⁷ A̱hli, Chitokaka ma! chishno ak osh Chihowa Ushi, Klaist yakni ilʋppa a̱ya hi a tok mak o̱ chia ka sai yimmishke, im achi tok.

²⁸ Ilʋppa yakohmichit miha mʋt, iʋt itibapishi Meli a̱ lumasit ont i̱ howʋt, Nan‐ithʋnanchi ʋt ʋla cha, chi hoyoshke, achi tok.

²⁹ Yʋmma haklo makinli hosh, ashali̱ka wakayʋt iʋt ont afama tok.

³⁰ Chisʋs ʋt tʋmaha ha̱ ant ik chukowo ki̱sha hosh, Mahla yʋt ai afama tuk ash akinli ho̱ hiki̱a ha tok.

³¹ Mihma Chu okla hʋt apehʋt aboha anu̱ka ya̱ ma̱yʋt hopohlʋli tuk ash ot, Meli ʋt tu̱shpʋt wakayʋt kocha ia na okla pisa mʋt, Ahollopi yʋmmak o̱ ont a yaiya chi̱ hosh ia hoka, achi mʋt iakaiya tok.

³² Atuk o̱ Meli ash ot Chisʋs a hikia kash ona cha, pisa mʋt, iyi ituma ya̱ ont hlipia cha, Chitokaka ma! ilʋppa ant ish anta tuk okma, a̱ nakfi ʋt illa he tuk keyushke, im achi tok.

³³ Yʋmmʋt yaha̱ya ma, anonti Chu okla yʋmma api̱hʋt ai ʋla tuk aiena kʋt yaha̱ya akinli na Chisʋs ʋt pisa hatuk osh, chu̱kʋsh anu̱kaka isht a nukha̱klo fehnʋt ik im ʋlhpieso ki tok.

³⁴ Mihmʋt, Katima yak o̱ hʋsh bohli tuk oh cho? achi ma, Chitokaka ma! minti cha, ant pisá, okla im achi tok.

³⁵ Chisʋs ʋt nishkin okchi minti tok.

³⁶ Mihma Chu okla hash ot, Yakeh! i̱ holitopa fehna tuk o̱ mʋhli, achi tok.

³⁷ Mihma kanimi kʋt, Lʋpa yatuk a̱ hoponayochi tuk ʋt, hatak ilʋppak kia ik illo ka hinla ka, a kanimihcha he tuk keyu chishba? okla achi tok.

³⁸ Yohmi ma Chisʋs ash ot anonti chu̱kʋsh anu̱ka̱ka isht anukha̱klo fehnʋt a̱yʋt ahollopi a̱ ona tok. Yakni chiluk o̱ tʋli yosh isht ʋlhkʋma ha tok.

³⁹ Chisʋs ash osh, Tʋli ya̱ ishit ho kanʋllichí achi, ma̱, Mahla illi tuk a̱ in tek ash osh, Chitokaka ma! illi tuk a̱ nitak ushta hokʋt himak foka ma shua hoke, im achi tok.

⁴⁰ Mihma Chisʋs ʋt, Chi yimmi hokmʋt, Chihowa isht a holitopaka ya̱ ish pisa hinla hoke, ak chim acho ke tuk oh cho? im achi tok.

⁴¹ Mihma illi ai itola tuk ash tʋli ya̱ okla ai ishit kanʋllichi tok. Mihma Chisʋs ʋt nishkin a̱ pit ʋba chakalichi mʋt, A̱ki ma! is sa haiyaklo hatuk a̱ yak oke, chim aiahni lishke.

⁴² Yohmi kʋt is sa haiyaklo a bilia chatuk a̱ ithaiyana li kʋno; yohmi kia okla ilʋppa hiohma̱ya kʋt, chishno ak osh auet is sa kanchi tok a̱ ai yimma chi̱ kak o̱, yʋmma achi li tuk oke, achi tok.

⁴³ Yakohmichit anumpulit ont in taha mʋt, chitoli hosh anumpulit, Lasalʋs ma! auet kohchá, achi tok.

⁴⁴ Mihma illi atuk ash ot ibbak, iyi aiena ka ahollopi ishit shema yʋt isht ʋlhfo̱wa ho̱ ant kohcha tok; mihma nashuka yano nantapʋski yosh isht ʋhlfoyuka tok. Mihma Chisʋs ʋt, Oh i̱ hotofi na ik iá, im achi tok.

⁴⁵ Yohmi ma Chu okla Meli a̱ im ai itahoba tuk osh, Chisʋs ʋt nana ka ai yʋmihchi na pisa mʋt, laua hosh i̱ yimmi tok.

⁴⁶ Yohmi kia kanimi hokʋto falamʋt iʋt, Falisi ʋhleha ha̱ im ona cha, nana ka Chisʋs ʋt ai yʋmihchi tuk ash okla im anoli tok.

⁴⁷ Yohmi ma na‐holitompa isht a̱sha pehlichi ʋhleha, micha Falisi ʋhleha aiena kash ot hatak hochito̱ka nan apesa ʋhleha ha̱ itahobi mʋt, Hatak ilʋppʋt na‐fehna la̱wa ka yʋmihchi ka, nanta mak o̱ katiohmi hosh iloh aiasha cho?

⁴⁸ Ilʋppa ant ik yohmí, iloh im ahni hokma, hatak moma kʋt i̱ yimma chi̱ hoke; yohmikma Loman okla hʋt ʋla cha, pi̱ yakni, micha pim okla talaia aiena kash ai okpʋnicha hinla hoke, achi tok.

⁴⁹ Mihma achʋfʋt Kaiafas hohchifo hosh afʋmmi yʋmma fehna ka na holitompa isht a̱sha pehlichi i̱ shahli a̱ ai ibafohka hatuk osh, Nana ka hʋch ik akostinincho kʋmohmishke.

⁵⁰ Mikmʋt hatak achʋfa hosh okla ha̱ ʋlhtobʋt illi na okla talaia kash ot momʋt ik illo ka hi a̱, a hʋpim ʋlhpiesa hatuk a̱ hʋch ik anukfilloshke, im achi tok.

⁵¹ Yohmi kʋt ilap nana aiahni hosh ilʋppa anumpuli ha tok keyu; amba afʋmmi yʋmma fehna ka na‐holitompa isht a̱sha pehlichi i̱ shahli hosh anta hatuk okʋt, Klaist ʋt okla yʋmma ʋlhtobʋt illa he.

⁵² Yohmi kʋt okla yʋmmak bana hi o̱ keyu; amba Chihowa im ʋlla ʋhleha kanima ai it afimimpʋt a̱sha tuk aiena ma hoyot a miha chʋfa ho̱ ai itahoba he ak o̱, tikbanli anoli ha tok.

⁵³ Yʋmohmi hatuk o̱ nitak yʋmma ai ʋhlit mihinti ka, yʋmma ʋba chi̱ kʋt nana it im apesʋt okla ma̱ya beka tok.

⁵⁴ Yohmi hatuk o̱ Chisʋs ʋt himmakma haiaka fehnʋt Chu okla itintakla ya̱ ik a hikiki̱o ki tok; amba yʋmmak ash ʋttʋt ia mʋt, yakni haiaka pit a bili̱ka tʋmaha Eflihaim hohchifo ho̱ nan im ai ithʋna ʋhleha ha̱ pehliechit ahanta tok.

⁵⁵ Atuk o̱ Chu okla nan im ʋbanʋblit ont ia yʋt ai ona̱ hosi tok; mihma ilap nan ai il atahlit ma̱ya chi̱ kʋt, nan‐ʋbanʋblit ont ia yʋt ik ai ono ki̱sha ho̱ yakni yʋmma a̱sht Chelusalem a̱ ia kʋt laua tok.

⁵⁶ Atuk osh Chisʋs ash okla hoyot, tempel anu̱kaka ya̱ hiohma̱yʋt, Impa holitopa a̱sha ka ik lo ka chi̱ hokmá, nana ka hʋchim ahoba cho? it im achit ma̱ya tok.

⁵⁷ Na‐holitompa isht a̱sha pehlichi ʋhleha, mikmʋt Falisi ʋhleha aiena kash ot, yʋmmʋt kanima yo̱ anta ka hatak nana hosh akostininchi hokmʋt, anoli na okla isha hinla kʋt anumpa ʋlhpisa ka bohli tuk a tok oke.