Atʋloa 97 - Chahta Holisso Holitopa 1886

¹ Chihowa hʋt mi̱koshke; yakni ʋt yokpashke, tʋshayi lawa kʋt na̱ yokpashke.

² Hushontih, aiokhlileka aiena hosh ʋpakfoiyupa hoke; ai ʋlhpiesa ʋpehi̱sa yosh im ai o̱ binili hulittopa a hikkia yoke.

³ I̱ tʋnʋp ʋt ʋpakfopʋt aiyasha ka̱ hukmit tahla chi̱ hosh, luak ʋt itikba ia hoke.

⁴ I̱ mʋlʋtha yʋt yakni ya̱ tohwikelichi tok oke; yakni ʋt pesa cha, wʋnnichi tok oke.

⁵ Nʋnih chaha putta kʋt Chihowa itikba ya̱, yakni momah i̱ Chitokaka itikba nan akmo yo̱ chohmit bila tok oke.

⁶ Ʋba putta kʋt isht im ai ʋlhpiesa ya̱ ʋno̱ho̱li hatuk o̱, oklah moma kʋt im ahulittopa ya̱ pisa hoke.

⁷ Na̱ holbʋt tuba ayokpʋchi moiyuma kʋt, nanah keyu poiyutta ka̱ isht ilawʋta ʋhleha hʋt hufahyashke; chitokaka moma kʋt hʋsh im ʋkahchunnolashke.

⁸ Chihowa ma, nan ish ʋpehi̱sa pulla kak o̱, Saion ʋt haklo cha na̱ yokpah ma̱, Chutah ushetik ʋhleha yʋt yokpʋshke.

⁹ Yohmi ka̱ Chihowa ma, chishno ak osh chaha kʋt yakni momah i̱ shahli chia kak oke; chi holittopa kʋt chitokaka moma ka̱ ish i̱ shahlih fehnʋshke.

¹⁰ Chihowa i̱ hullo ʋhlehah ma, nan ik achukmo ka̱ hu shittilemáh; i̱ hulittopa ʋhlehah imish shilombish a̱ ieshi hoke, hʋttak ik ʋlhpeso ʋhlehah ibbak a̱ a kohchi hoke.

¹¹ Hʋttak ai ʋlhpiesa ya̱ tohwikeli hosh i̱ hullukchikma̱, na̱ yokpa yosh chu̱kʋsh ʋpissali ʋhleha ha̱ i̱ hullukchi hoke.

¹² Ai ʋlhpiesa ʋhlehah ma, Chihowa hak o̱ hʋsh a yokpashke; micha hulittopa isht ithaiyana ya̱ yakoke hʋsh im achashke.