Atʋloa 94 - Chahta Holisso Holitopa 1886

¹ Chitokaka ilai u̱hu̱kha Chihowa ma, Chitokaka ilai u̱hu̱kha ma, ish ile hayakʋchashke.

² Yakni nan im apesa chiah ma, ish ile wʋkayʋchashke; ilefehnʋchi ʋhleha ha̱ ʋlhtoba fʋlʋmminchit ish onucchashke.

³ Hupakih kʋtiohmih fokka ho̱ hʋttak ik ʋlhpeso ʋhleha hʋt, Chihowa ma, hupakih kʋtiohmih fokka ho̱ hʋttak ik ʋlhpeso ʋhleha hʋt im aiyʋchit yu̱hu̱kpa chi̱h choh?

⁴ Lawachit nukwa̱ya iksho hosh ʋnumpo̱ho̱li hoke; nan ik ʋlhpeso yʋmihchi moma kʋt ilefehnʋchi hoke.

⁵ Chihowa ma, chim okla ha̱ litolit kanchi hoke, micha chimmi ha̱ i̱ pʋlʋmmichi hoke.

⁶ Ohoyoh i̱ hʋttak illi, micha oklah inla aiena ka̱ illi̱hi̱chikmʋt, ʋlla ʋlhtakla ya̱ a̱ha̱bi hoke.

⁷ Yohmi kʋt, “Chihowa hʋt pisa he keyuh, mikmʋt Chekob i̱ Chitokaka yʋt ʋkostinincha he keyuh,” achi kak oke.

⁸ Oklah im ai itti̱takla ya̱ ʋlhpoa ohmi hʋchiah ma, hʋsh ʋkostininchashke; mikma̱ im anukfilah iksho hʋchiah ma, kʋtiohmih fokkakmak o̱ hʋchi hupoyuksa chi̱h choh?

⁹ Haksubish a̱ ikbit hilechi tok ʋt hakla he keyu hoh choh? nishkin a̱ ikbi tok ʋt pisa he keyu hoh choh?

¹⁰ Oklushi putta ka̱ na̱ pʋllʋmmi onucchi ʋt im olʋbecha he keyu hoh choh? Hʋttak a̱ nan ithana im abʋchi

¹¹ Chihowa hʋt hʋttak im anukfilah putta kʋt yʋmmʋt nanah keyu hatuk a̱ ithana hoke.

¹² Chihowa ma, kʋna ho̱ na̱ huttupa ish onucchi cha, chi̱ nan ʋlhpisa a kohchi hosh ish im abʋchi kʋt,

¹³ Hʋttak ik ʋlhpeso ya̱ hichukbi ʋt i̱ kulʋt tahah ta̱kla ka̱ nan ik achukmo nittak putta ka̱ a kohchit ish fohʋcha chi̱ ka̱, yʋmmʋt hʋttak na̱ yokpa yoke.

¹⁴ Chihowa hʋt im okla ha̱ kancha he keyukmʋt, immi ha̱ issʋt ia he keyu hoka̱.

¹⁵ Nan ʋpesa kʋt ai ʋlhpiesa fʋlamʋt ona chi̱ hoka̱; mikma̱ chu̱kʋsh ai ʋpissali moma kʋt iakkayʋt ia chi̱ hoke.

¹⁶ Kʋta hosh nan ik achukmo yʋmihchi ʋhleha ha̱ i̱ sʋnalit si ʋpelʋt wʋkaya hinlah choh? kʋta hosh nan ik ʋlhpeso yʋmihchi ʋhleha ha̱ i̱ sʋnalit si ʋpelʋt hikkia hinlah choh?

¹⁷ Chihowa hak osh si ʋpela yatuk keyukma̱, chekosih mak inli ho̱ ʋmish shilombish ʋt a chullusa yak o̱ ont a̱ha̱tta he atuk oke.

¹⁸ “Saiyi ʋt shʋkkʋlʋllishke,” achi likma̱, Chihowa ma, isht ish i̱ hullo ʋt sʋ hʋllʋllih chatuk oke.

¹⁹ Na̱ weki isht ʋm anukfilah la̱wa kʋt sʋ nukfoiyukkakma̱, isht ish hupohlʋli ʋt ʋmish shilombish a̱ yokpalih chatuk oke.

²⁰ Nan okpulo ai o̱ binili, yʋmmʋt nan ʋlhpisa yo̱ nan ik achukmo isht ai ikbi ʋt chibai achʋffa chi̱h choh?

²¹ Ai ʋlhpiesa im ilhfiopak a̱ im asʋnalit ittʋhoba hoke, micha nan okpʋni keyu im issish a̱ ʋnnumpah onucchi hoke.

²² Yohmih kia Chihowa hak osh ahlʋkuffi chaha a̱ tubah mʋt, a̱ Chitokaka yʋt ʋm ai ʋtukko tʋli chito tuba tuk oke.

²³ Atuk osh nan ik ʋlhpeso yʋmihchi ya̱ fʋlʋmminchit onucchih pulla cha, nan ik achukmo isht asha yak atuk mak o̱ ishit kancha chi̱ hoke; pi̱ Chitokaka Chihowa hak osh ishit kancha chi̱ hoke.