Atʋloa 91 - Chahta Holisso Holitopa 1886

¹ Kʋna hosh Chaha i̱ Shahli im ai ʋloma̱ka ya̱ binnili kʋt nan oklu̱ha i̱ Shahli i̱ hushintika yak o̱ a̱ha̱tta chi̱ hoke.

² “Ʋm ai ʋtukko, a̱ hulihta kʋllo, a̱ Chitokaka, yʋmmak o̱ anukchieto li yoke,” Chihowa ha̱ achi la chi̱ hoke.

³ Yʋmmak osh hushʋbi nan isht hukh ya̱, ililli ik achukmo aienah ma̱ a chi kohchih pulla chi̱ hoka̱.

⁴ Ilap sʋnahchi ya̱ isht chi ompohoma chi̱ hoke, mikma̱ sʋnahchi ak o̱ ish ai atukko ya chi̱ hoke; im ʋnnumpah a̱hli ʋt telihpa, micha tʋnʋp a̱ya nan isht im ʋlhtaha yoke.

⁵ Ninak o nanah a kumunta, nittak o̱ uskinʋki ʋt hikʋt a̱ya,

⁶ Ililli okpulo yʋt aiokhlileka yo̱ nowʋt a̱ya, ʋbeka okpulo yʋt tʋbokoli ho̱ nan okpʋnit tahlih kia, ish i̱ nukshopa he keyu hoke.

⁷ Chi chapaka ya̱ tʋhlepah sipokni, micha chim ishtimpakimma ya̱ tʋhlepah sipokni pukkoli hosh akkakoha hoh kia, chishno ʋno chi̱ bilincha he keyu hoke.

⁸ Pe chi nishkin ak o̱ pit isht ish hupo̱poyo cha, hʋttak ik ʋlhpeso ʋhleha hʋt nan im ʋlhtoba ka̱ ish pisa hi oke.

⁹ “Chihowa ma, chishno ak osh ʋm ai ʋtukko chia hoka̱.” Chaha i̱ Shahli ak o̱ ish ai a̱ha̱tta ish ikbi hatuk o̱,

¹⁰ Nan ik achukmo ʋt chi onuttula he keyuh, micha na̱ pʋlʋmmi nanah kia chim ʋlhtipo yoka̱ bilincha he keyu hoke.

¹¹ Chishno ai imma ka̱ im enchel putta ka̱ ʋtohno na, ish ata̱ya moiyuma ka̱ chi hʋllʋlla chi̱ hoka̱.

¹² Chiyi ya̱ tʋli isht chik ai isso ka chi̱ kak o̱, ilap ibbak a̱ fohkit isht chi a̱ya chi̱ hoke.

¹³ Koi chito, hahta aiena ka̱ ish a nowa chi̱ hoke; koi himitta, sinti chito aiena ka̱ ish ʋhʋlhicha chi̱ hoke.

¹⁴ “Si ʋsittia hoka̱, hlʋkuffiche la chi̱ hoke; sʋ hohchifo ha̱ ithana hoka̱, achahaka binnilechi la chi̱ hoke.

¹⁵ “Nan ʋm asilhhakma̱, ima la chi̱ hoke; i̱ pʋlʋmmikma̱, ibafoiyukka la chi̱ hoke; hlʋkuffechi lish, hulittobli la chi̱ hoke.

¹⁶ “Nittak fʋllaya ho̱ isht im ai ʋlhpesʋche likmʋt, ʋm ai okcha̱ya ya̱ pisachit yokpali la chi̱ hoke.”