Atʋloa 90 - Chahta Holisso Holitopa 1886

Ʋnnumpah ilbʋssha Chitokaka immi hʋttak Moses ʋt ikbi tok.

¹ Pi̱ Shahlih ma, isht ai unchululi putta ka̱ chishno ak osh pim ai a̱ha̱tta chia hatuk oke.

² Nʋnih chaha putta kʋt ik tobo ki̱shah ma̱, yakni, yakni moma ka̱ chik ikbo ki̱shah mʋt, a̱ha̱ttʋt billia tuk osh abillia he Chitokaka chia hoke.

³ Hʋttak a̱ fʋlʋmminchit lukfi pushi yo̱ ish ikba chi̱ kʋt, “Hʋttak im ʋlla ʋhleha hʋt hʋsh fʋlamashke,” ish achishke.

⁴ Afʋmmih tʋhlepah sipokni achʋffa kʋt ant a̱yakmʋt, chi nishkin itikba ya̱ pilashash osh ant ihya ka̱ chohmih, micha ninak o̱ a hiket atoni achʋffa kak o̱ chohmi hoke.

⁵ Okchito ohmit shat isht ish ia na, nusi kak o̱ ittillawwi hoke; hʋsshuk ʋt onnahinlikma̱ ʋliktit ia kak o̱ chohmi hoke.

⁶ Yohmi ka̱ onnahinlikma̱ pʋkanli cha ʋliktit ia hoke; opyakma̱ bʋshli tuk o̱, bʋsshi hoke.

⁷ Chi nokua kak o̱ pi tahakmʋt, chi nukhubela kak o̱ pi komunta hoka̱.

⁸ Nan ik pi ai ʋlhpeso putta ka̱ chi tikba ish tʋkalechi cha, na̱ luma pim a̱sha ka̱ chi nʋsshuka atohwikeli ya̱ ish tʋkkalechi hoke.

⁹ Chi nukhubela kak o̱ pi̱ nittak moma kʋt kʋninihya hoka̱: im anukfilah achʋffah chomihchit pim afʋmmih putta ka̱ e tahli hoke.

¹⁰ Pim afʋmmih nittak okʋto yʋmma̱ afʋmmih pukolih untuklo kak oke; mikmʋt hlampko hatuk o̱ afʋmmih pukolih untucchenah yoba hokmʋno, yohmih kia nan a hlampko yʋt nanah ʋtaklʋma micha nanah keyu bieka hoke; tu̱shpʋt ant ia hatuk o̱, helit e tʋmoa hoka̱.

¹¹ Chi uokua yʋt kʋllo ka̱, micha chi̱ nukshopa he ʋlhpesa kak o̱ chohmit chi nukhubela ya̱ kʋta hosh ithanah choh?

¹² Ʋcchukmalit ish pithʋnanchikma̱, pi̱ nittak putta ka̱ e hutihna cha, chu̱kʋsh hupoyuksa yo̱ il ʋhayuchashke.

¹³ Chihowa ma, hupakih kʋtiohmih fokka ha chi̱h choh? Ish fʋlama cha, chi̱ tishuh ʋhleha ha̱ ish i̱ nukha̱klashke.

¹⁴ Onnahinlikma̱ nan isht ish i̱ hullo isht ish pi fehublikma̱, pi̱ nittak poiyuttah hlupulli ka̱ tʋlo̱ho̱wʋt na̱ pi yokpashke.

¹⁵ Nittak kʋnohmi ho̱ nan ish pi̱ pʋlʋmmichi tuk o̱, afʋmmih kʋnohmi ho̱ nan ik achukmo e pi̱hi̱sa tuk a̱ chomihchit ish pi yokpalashke.

¹⁶ Chi̱ tishuh ʋhleha ha̱ nanah ish yʋmi̱hi̱chi ʋt i̱ hayakashke, mikma̱ chim ahulittopa yʋt im ʋlla ʋhleha ha̱ onuttoiyulashke.

¹⁷ Mikma̱ pi̱ Chitokaka Chihowa isht i̱ kana yʋt pi onuttoiyulashke; mikma̱ pibbak nan a toksʋli ya̱ ish pim ai ahlichikmʋt, pibbak nan a toksʋli ya̱ ish ai a̱hlichashke.