Atʋloa 9 - Chahta Holisso Holitopa 1886

Tʋloa pehlichi ʋt Mulh‐labben a tʋloa chi̱ ho̱, atʋloa Lewi ʋt ikbi tok.

¹ Sʋ chu̱kʋsh a̱ mominchi hosh Chihowa ha̱ ayokpachi lish, nanah a fehna ish yʋmi̱hi̱chih chatuk moma ka̱ ʋno̱ho̱li lashke.

² Chishno ak atuk mak o̱ na̱ sʋ yokpa cha, ishit chi ʋlawʋta la chi̱ hoke; chi hohchifo ha̱ nan ulachit ayokpʋche la chi̱ hoke, Chaha i̱ Shahli chiah ma.

³ A̱ tʋnʋp ʋhleha hʋt misha pit filemakmʋt, chi tikba ya̱ ai ibetʋblit, aiokpulokʋt kʋnniashke.

⁴ Nanah a̱ kʋnihmi isht a si ʋhala̱ya, micha nan isht ʋm ai ʋlhpiesa ya̱ is sʋm ʋpesa hoka̱: ai ʋlhpiesa nan ʋpesa yosh chim ai o̱ binili hulittopa ya̱ ish binnilishke.

⁵ Oklushi putta ka̱ nan ish im olʋbechi cha, hʋttak ik ʋlhpeso ya̱ okpʋnit, hohchifo ha̱ musholichit ish kanchi na billiʋt billia hoke.

⁶ Tʋnʋp ak okʋto aiokpulokʋt taha na billiʋshke; tʋmahah putta ka̱ isht ish kanchi na, yʋmma̱ isht ithaiyana yash kia awant musholishke.

⁷ Amba Chihowa hak okʋto binnili na billia hoke; nan ai ʋlhpiesa ai ʋpesa chi̱ hosh im ai o̱ binili hulittopa ya̱ hillechi tuk osh,

⁸ Yʋmmʋt ai ʋlhpiesa hosh yakni ya̱ nan im ʋpesa cha, ai ʋpissali hosh oklah putta ka̱ nan im ʋpesa hi oke.

⁹ Yohmi kak osh Chihowa hʋt ilbʋssha ahlʋkuffi chaha yosh, nan ai i̱ pʋlʋmmi nittak oh kia ahlʋkuffi chaha yokeh.

¹⁰ Yohmi kak o̱ chi hohchifo ha̱ ithaiyana ʋhleha hʋt chi anukchieto hokeh; oklah chi ho̱ho̱yo ka̱ ish kanchih keyu yoka̱, Chihowa ma.

¹¹ Saion a binnili Chihowa ha̱ nan ulachit hʋsh ayokpʋchashke; nan isht a̱ha̱tta tuk a̱ oklah puttah im ai itti̱takla hʋsh ai ʋno̱ho̱lashke.

¹² Issish hlʋtapa ya̱ ho̱ho̱yo yosh ilbʋssha ʋhleha ha̱ ithaiyana hoka̱: yʋmmʋt pa̱ha̱ya tuk a̱ im ʋhaksih keyu hoke.

¹³ Ai illi okhisa ya̱ ai ishit sʋ kohchichi chia hʋt is sa̱ nukha̱klashkeh; a̱ nukkilli ʋhlehah pulla hatuk mak o̱ nan a̱ pʋllʋmmi ka̱ ish pisashke.

¹⁴ Yohmi na a chi holittopa moma ka̱ ʋno̱ho̱lit, Saion tʋmahah okhisa ya̱ chim ai okcha̱ya ya̱ ai isht a yokpa lashke.

¹⁵ Oklushi putta kʋt yakni kula ikbi tuk ʋt ilap inlit pit okakʋniʋshke: nan ishit hukli luhmi tuk a̱, yʋmma̱ ilap iyi ak inli hosh isht a yuka hoke.

¹⁶ Chihowa hʋt ai ʋlhpiesa yʋmihchi kʋt ottaiyanish?ke: yokmi kʋt hʋttak ik ʋlhpeso ya̱ ilap ibbak nan isht ai a̱ha̱tta tuk ak inli ho̱ ishit yukachi hoke. [Ai ulachi. Yukopa.

¹⁷ Hʋttak ik ʋlhpeso ʋhlehah, oklushi momah Chitokaka ya̱ im ʋhaksi ʋhleha hʋt illi aiasha ya̱ onah pulla hi oke.

¹⁸ Ilbʋssha ya̱ im ʋhaksi na billia he keyu hoka̱: chu̱kʋsh akka̱losi ʋhlehah nan aiyahni tuk ʋt akshot a billia he keyu hoke.

¹⁹ Wʋkayáh, Chihowa ma; hʋttak ʋt ik kʋllo kashke; oklushi putta kʋt chi tikba nan ai im ʋlhpisah pullashke.

²⁰ Chihowa ma, nukshopah ish nukfohkashke; oklushi putta kʋt pe hʋttak atuk ʋt ik ithʋná. [Yukopa.